طلبت من حماتي تمشي وتسيب حفل زفافي🚶♀️🧴
أنا راجل، لسه متجوز من حب حياتي.
أنا في العادي بتعامل كويس جدًا مع عيلة مراتي، بس يوم الفرح حصلت حاجة غريبة.
في المرات اللي شوفت فيها حماتي، عادة مكنتش بتحط عطور، أو على الأقل أنا مكنتش ملاحظ ده قبل كده.
قبل الفرح، مراتي طلبت من والدتها إنها تكون وصيفة الشرف. علشان كده يوم الزفاف، حماتي كانت واقفة قريب مننا قوي. هي كانت واقفة جنب مراتي بالظبط، والمكان أصلاً صغير، عشان كده كانت قريبة مني أنا كمان، وده خلاني شامم كويس ريحة العطر اللي حماتي مستخدماه.
عدي وقت قصير وبدأت عيني تدمع وبقيت بتنفس بصعوبة. حاولت أتماسك شوية وأستحمل. بس اللي خلي الموضوع فوق احتمالي إن حماتي قررت تحضني جامد 😫
بعدها بدأت أحس بحكة في عيني وزوري وجالي صداع جامد، ده غير الأعراض الأولي، وفعلاً كنت تعبان قوي 😥
مراتي سألتني: “مالك؟ إيه اللي بيحصل؟” قولتلها إن عطر مامتها هو السبب.
طلبنا من حد معانا في الفرح إنه يجيبلي دواء الحساسية. أخدت الدواء بس ما ساعدنيش قوي وكنت لسه تعبان جدًا.
الناس بدأت تتصور معانا، بس أنا في الوقت ده مكنتش قادر أتصور أي صورة حماتي موجودة فيها.
قولت لمراتي إحنا لازم نلاقي حل، لأن الأعراض كانت لسه مستمرة.
قولتلها أنا عايز أكمل حفل الزفاف للآخر، ومش عايز اضطر أمشي، من فضلك قولي لمامتك تفضل بعيدة عننا علشان تسهل الموضوع عليا شوية.
للأسف، حماتي فضلت لازقة فينا والعطر فضل موجود حواليا كأنّه كائن شرير بيطاردني.
مراتي طلبت من مامتها تحاول تغسل المكان اللي رشت فيه العطر على فستانها.
حماتي قالت إنها رشت العطر على الفستان كله وكمان على جسمها.
في الوقت ده قالولي إحنا مش عارفين نساعدك إزاي؟
قولتلهم طيب، عندي اقتراح. ممكن حماتي تروح البيت تغيّر الفستان وترجع تاني، أو حتى تروح أي محل فساتين قريب وتشتري واحد بسرعة وأنا اللي هدفع تمن الفستان الجديد.
قلت لحماتي يا تنفذي الاقتراح ده من فضلك أو تروحي خالص دلوقتي، وإحنا بعد كده هنزورك ونجيبلك معانا كيك 🍰
لأن الموضوع كان واصل معايا لدرجة إني كنت خلاص فعلاً همشي وأسيب الفرح.
مراتي وحماتي اعترضوا على كلامي لأن مراتي كانت عايزة مامتها معاها طول الوقت!
أنا عارف إن اليوم مهم جدًا لمراتي وطبيعي تكون عايزة مامتها معاها، بس أنا كمان مكنتش قادر أستمتع بيوم فرحي.
في الآخر انتهى اليوم بأني فضلت قاعد في مكان بعيد عن الحفلة مع أصحابي وبدأت أتحسن شوية.
مراتي خرجت وقالتلي “مش هترجع الحفلة تاني؟”
قولتلها بصراحة طول ما مامتك لسه جوه، مستحيل أدخل تاني.
الفرح خلص، بس مراتي كانت غضبانة وروحت مع مامتها وباباها ورفضت تروح البيت معايا اليوم ده ☹
على فكرة، دي مش أول مرة يحصل لي حساسية من العطور. الموضوع ده حصلي قبل كده أكتر من مرة، ومراتي عارفة الحكاية دي.
_______________
(القصة مترجمة من موقع ريديت، أصحاب القصة أجانب).
