عايزة ابنك يسمع كلامك من أول مرة ومن غير زعيق ولا محاضرات؟ شوفي السنة النبوية في التعامل مع الأطفال.
“يا غلام، سمِّ الله، وكُل بيمينك، وكُل مما يليك”.
كنت بقرأ كتاب “الأطفال من الجنة” للكاتب جون جراي.. الكاتب بيعلم الأمهات إزاي تطلب بطريقة صح من أطفالها علشان يسمعوا كلامها بسهولة ومن غير مقاومة.
الكاتب بيقول:
1. بلاش صيغة السؤال:
اطلبي الحاجة اللي إنتِ عايزاها من غير ما تتحايلي عليه ومن غير ما تسأليه.
يعني بدل ما تقولي: ممكن تغسل أسنانك؟
إنتِ كده بتسأليه، وعقل الطفل بيحب المقاومة وبيحب يقول “لأ”.
فلما بتقولي “ممكن تغسل أسنانك؟” أو “ممكن تنضف أوضتك؟” الطفل تلقائي هيقولك: “لأ مش ممكن”.
لكن لو قولتي: “نضف أوضتك”.. إنتِ هنا حددتي بوضوح إنتي عايزة إيه. ومن غير مايكون عند الطفل فرصه يقول أه أو لاء.
2. سحر كلمة “لو سمحت”:
كلمة “لو سمحت” أو “من فضلك” مهمة جداً.. بتخلي الطفل يتقبل الجملة أكتر من صيغة الأمر الناشفة (نظف أوضتك)، لكن “من فضلك” بتخليه يسمعك لانك احترمتيه.
الكاتب بيقول أنتِ نفسك لو جوزك ولا مديرك كل شوية يقولك أوامر مش هتحسي إنك تعبتي وزهقتي؟ لأن الإنسان عموماً حتى لو طفل بيكره الأوامر.
3. بلاش الأسئلة المستفزة:
بلاش أسئلة من نوعية: “ليه أوضتك لسه مش مترتبة لحد دلوقتي؟”، “إمتى هتبطل تعمل كده؟”، “هو أنت هتفضل كده على طول؟”.
إنتِ هنا بتبعتي لطفلك رسائل سلبية بتخليه مش عايز يسمعك أصلاً، وبيبقى عايز يهرب من الحوار كله. لأنك بتحسسيه إنه شخص مش مسؤول أو غلطان.. ومحدش فينا بيحب يحس الإحساس ده.
4. كمان خليكي مباشرة (بلاش محاضرات):
إحنا الامهات بنحب نقول محاضرات: “أنت ليه قاعد على الموبايل لحد دلوقتي؟ أنت مش عارف إن ده غلط؟ هو أنت مفيش فايدة فيك؟ مخك هيبوظ.. أنا تعبت منك..أنا عايزه أسيب البيت ده وأمشي….”
رغي كتير مش بيخلص! جون جراي بيقول بدل المحاضرة دي كلها، قولي بالظبط اللي إنتِ عايزاه بهدوء: “من فضلك سيب الموبايل دلوقتي”، أو الأحسن: “قدامك 5 دقائق وبعد كده من فضلك سيب الموبايل”.
5. قللي التفسيرات وقت الطلب:
الطفل مش بيبقى عايز يسمع ليه لازم يغسل أسنانه، وأن الحلويات بتدمر الضروس والسوسة هتاكلك.. كل ده هدر وقت وطاقة على الفاضي ومش بيجيب نتيجة وقتها. لو الطفل مش فاهم فعلاً وسألك بعدين فهميه، بس وقت ما تطلبي، اطلبي وبس.
6. اطلبي بطريقة ايجابية:
بدل ما تقولي “أنت عامل دوشة ليه؟” ⬅️ قولي: “من فضلك خليك هادي”.
بدل “أوضتك مكركبة خالص” ⬅️ قولي: “من فضلك رتب أوضتك”.
بدل “أنت بتكلمني كده ليه؟” ⬅️ قولي: “لو سمحت كلمني بأسلوب كويس”.
لما قريت الكتاب أخدت بالي أن الرسول ﷺ علمنا كده بالظبط لما قال للطفل: “يا غلام، سمِّ الله، وكُل بيمينك، وكُل مما يليك”.
الرسول ﷺ طلب من الغلام مباشرة الحاجة الصح وبطريقة إيجابية ومن غير محاضرة ومن غير تفسيرات كتير ملهاش لازمة.
الرسول ماقالش: “أنت بتاكل بإيدك الشمال ليه؟”.
ماقالش: “ممكن تاكل بإيدك اليمين؟”.
ماقالش: “هو أنت مش عارف إن ده غلط؟”.
ماقالش: المسلم لازم ياكل بإيده اليمين ولازم تخلي بالك من كذا وكذا والصح تعمل كذا.
الرسول ﷺ وجهه للصح فوراً وبكل هدوء وحزم.
