رسالة غريبة قبل فرحي بيومين!!!
أنا مع خطيبي بقالنا ٣ سنين، ومخطوبين من أكتر من سنة.
عندي صديقي المقرب “ديف” اللي عرفته من أول سنة في الكلية (احنا كلنا في أوائل التلاتينات).
النهارده الصبح صحيت على رسالة طويلة جدًا من “ديف”، بعتها حوالي الساعة ٦ الصبح.
باختصار، الرسالة كانت كلها فضفضة من قلبه. بيقول إنه بقاله سنين بيحبني، وكان دايمًا مستني إن يحصل بيني وبين خطيبي حاجة تخلينا نبعد عن بعض عشان آخد بالي منه. طلب مني أفسخ الخطوبة وأهرب معاه (؟؟) وقالي: “كان لازم أقولك قبل ما يبقى فات الأوان.”
حقيقي حاسة باشمئزاز وحزن. مافيش جوايا أي مشاعر ناحيته غير الصداقة.
كتبت ردود ومسحتها مرة ورا التانية.
لحد دلوقتي ماقلتش لخطيبي. مش عايزاه يقلق خصوصًا وإحنا قربنا نتجوز.
عارفة إن لازم أقوله، بس مش عارفة أبدأ الموضوع إزاي.
والأصعب إن ديف بقى صاحب خطيبي كمان.
متضايقة إنه اختار وقت سيئ جدًا عشان يسبب لي كل التوتر ده.
كان عنده فرص كتير على مدار السنين عشان يقولي اللي في قلبه. بس استني لحد ما خلاص قربت أتجوز؟ يعني فاكر إني ممكن كده بكل بساطة ألغي فرحي وأسيب خطيبي عشان مجرد رسالة؟
بفكر أقول له ما يحضرش الفرح. بصراحه خايفة يعمل حاجة غريبة في الفرح. ومش متأكدة لو عايزة أكلمه تاني حتى ، بس فكره إني أخسر صديقي بتكسر قلبي. والفرحة مش هتبقى كاملة من غيره.
هو حطني في موقف صعب ومش مريح خالص.
ياريته لو كان بعد أو قالي من زمان. مش عايزة أجرحه، بس لازم أوضح له إني ما عنديش أي مشاعر ناحيته، والفرح زي ما هو، ومش عايزاه يحضر.
احنا صحاب بقالنا أكتر من ١٠ سنين، وانا بعيط طول اليوم بسبب الموضوع ده. وزعلانه إنه طول الوقت ده كان عنده نية تانية غير الصداقة.
أتعامل مع الموضوع ده إزاي؟ فرحي خلاص كمان أقل من ٤٨ ساعة…
**تحديث: ** هوري الرسالة لخطيبي أول ما يرجع من عند أخوه. مش هرد علي ديف قبل ما أقول لخطيبي الاول.
🌹 التحديث
أنا و جوزي (مبسوطة أوي إني أقدر أقول الكلمه دي دلوقتي) رجعنا من شهر العسل امبارح!
لما خطيبي رجع من عند أخوه، خليته يقعد ووريتله الرسالة. قرأها، وشوفت نظرة عينيه بتتغير وغضبه عمال بيزيد.
طبعًا بدأت أعتذرله، قال لي إني مش محتاجة أعتذر خالص.
اتكلمنا وقال لي إنه كان حاسس إن ديف بيحبني، بس شاف أن ديف كان بيتعامل بأحترام. وفعلاً، كان فيه حدود، في التعامل بينا دايما. حتى خليته يشوف الرسايل اللي بينا عشان يعرف إن مافيش أي حاجه مش كويسة، أنا حتي عمري ما اتكلمت معاه عن خطيبي ولا اشتكيت له لما كنا بنتخانق. كنت بكلم ماما بس 😂
بعدين خطيبي سألني عايزة أعمل إيه. وقلتله بصراحة رغم إن الموضوع مزعلني، بس أنا مش عايزاه يحضر فرحنا” كنت خايفة يعمل أي حركة بايخة”
كتبنا رسالة قصيرة قلنا فيها: “[ديف]، آسفة لو فهمت صداقتي غلط. الفرح هيحصل، والأفضل إنك متحضرش. عشان أكون واضحة، خليت [خطيبي] يقرا الرسالة وهو معايا في قرار إني مش عايزك في الفرح.”
كنا عايزين نوضح إنها رغبتي أنا، مش بس رغبة خطيبي. عارفينه كويس، أكيد هيقول إن خطيبي أجبرني على القرار.
بعدين قرأ الرسالة وسابها من غير رد فترة، بصراحة بدأت أتوتر وخطيبي سألني لو عايزة أعمله بلوك. جزء مني كان عايز، وجزء تاني كان عايز يسمع رده.
وأخيرًا رد، وكانت الرسالة طويلة قوي. كانت رسالة بشعة. قال إني كدابة واني بضلله من سنين، ودعا عليه إن خطيبي يسيبني وإننا منعرفش ننجب أطفال. الرسالة كلها كلام مؤلم لدرجه اني بكيت.
خطيبي خد موبايلي وخرج من الأوضة وأنا بعيط. أعتقد إنه كلمه، بس مش متأكدة. اللي أعرفه إنه بعد حوالي ساعة رجع واداني موبايلي وقال لي إن ديف اتعمله بلوك من كل حاجة، ومش هيحضر، وإن وصيفتي في الفرح عارفه الوضع وهتتعامل مع الموضوع.
حسيت إنه كان حمل واتشال من على كتافي. وبعد ما قريت الرسالة، خلاص أكيد مش زعلانة إنه مش هيحضر.
وفرحنا كان عظيم بجد! عشنا أجمل يوم في حياتنا، وسط الناس اللي بنحبهم وبيحبونا.
لسة مش مصدقة اللي حصل، و من يومها ما سمعتش عن ديف حاجة.
ده التحديث! مش درامي زي ما ناس كتير كانت متوقعة، بالعكس أنا مبسوطة 😍
#قصص
