“جاي” العاطفي الحساس 😊 🫶
أنا مهندس وبشتغل مع فريق مكون من 7 مهندسين. كلهم كويسين ومريحين، ماعدا واحد عصبي جدًا. يعني مش بيعرف يختلف باحترام، لاء.. علي طول بيزعق ويرفع صوته ويقرب جدًا لوشك. بجد لا يطاق.
بدأت اشتكي لمديري من تصرفاتة، بس المدير طنّش وقال إن دي طبيعته. وقالي “ده بقه هادي شوية دلوقتي. ده أنت مشوفتش زمان من ١٠ سنين ده كان عامل ازاي”!!
استغربت قوي وفكرت هو في عصبية أكتر من كده؟!
المشكلة أن الشركة بتاعتنا صغيرة لدرجة إنه مفيش قسم موارد بشرية (HR)، عندنا بس الإدارة العليا. ودي مش مفيدة في حاجة.
قررت أجرب معاه طريقة مختلفة 🤨 بطلت أقول عليه “عصبي” أو أقول أن اللي بيعمله ده “خناق” أو “صراخ” أو “عصبية”. بدل كده بقيت أستعمل كلمات زي “عاطفي”، أو “بيعمل نوبة غضب”، أو “بيتصرف زي العيال الصغيرة” أو “حساس”.
بقيت أقول تعليقات بسيطة كده. زي مثلاً لو كان عندي اجتماع معاه وهو أتعصّب، أقول للي حوالينا:
“واو، غريب إزاي “جاي” بقى “عاطفي” كده. مش فاهم عنده طاقة إزاي يعمل “نوبة غضب” الساعة 9 الصبح، ده الواحد يا دوب لسة صاحي من النوم.”
ولما مديري طلب مني أقوله ملخص اجتماع، قلت له: “دان، جاك، وجيمس كان عندهم تعليقات ممتازة على التقرير بتاع العميل. لكن “جاي كالعاده مقدرش يتحكم في أعصابه وعمل نوبة غضب تاني، بس انت عارف بقه هو عامل إزاي.”😅
لما زميلي سألني هو ليه بيزعق؟! قولت: “بصراحة، مش عارف. هو شكلة متحمس قوي لدرجة أنه مش عارف يسيطر علي نفسه.”
كنت قاصد أكرر الكلام ده كل شوية، وفعلاً شوية من زمايلي ابتدوا يكرروا نفس كلامي.
أعتقد أن الموضوع كان من غير وعي منهم هما مكنوش واخدين بالهم قوي من نيتي، بس ابتدوا يقولوا حاجات زي (أهو “جاي” عمل نوبة غضب تانية)، (يووووه تاني شغل العيال ده).😁
بعد كده أتجرأت أكتر وقولتله في وشه: “بص، أنا مش فاهم أنت بتحاول تشرح إيه وإنت عاطفي وحساس كده.”
وطبعًا الكلام ده انتشر جدًا.
بعد شوية، بقت سمعتة في الشغل إنه عاطفي ومش بيعرف يفكر بالعقل، وطبعًا ده كان بيضايقه جدًا. بس على الأقل، بطل يزعق لي زي الأول.
بص، الحقيقة هو اتعصب تاني الأسبوع ده مرة واحدة، وأنا قلتله: “مش عارف أتكلم معاك وإنت حساس قوي كده”.
انفجر في وشي وقالي: “انت ليه دايمًا بتتهمني بكده؟!”
هزيت كتافي وقلتله: “يا عم، ده إنت شكلك على وشك العياط، روح بص في المراية كده.”
اتعصب جدًا لما قلت كده، “إنه ممكن يعيط” 😅 وكان وشه أحمر قوي من العصبية.
حاسس إني زودتها شوية لما خليت الناس كلها بقت شايفاه كأنه طفل بيعيط على طول. بس برضه الطريقة دي نفعت لما “الأساليب العادية” ما جابتش نتيجة.
هل أنا غلطان لأني وصفت زميلي في الشغل إنه عاطفي لما بيتعصب؟
(القصة مترجمة من ريديت..أصحاب القصة أجانب).
