بتتصرف كأنها مهووسة بالعيلة دي 👨👩👧
قولت أشوف رأي حد عشان الموقف ده غريب جدًا ومش عارف أتصرف فيه إزاي.
أنا و”ماجي” مرتبطين ببعض من 3 شهور بس، فالعلاقة لسه جديدة. الأمور ماشية كويس، ماعدا المشكلة دي:
من كام أسبوع، ماجي بدأت شغل جديد وبسرعة قربت من زميلها الجديد “جو” وبقوا أصحاب قوي.
للتوضيح، أنا معنديش أي مشكلة إن ماجي يبقى عندها أصدقاء رجالة، بس ماجي وجو بقوا قريبين من بعض بشكل غريب وفي وقت قصير جدًا.
“ماجي” قالتلي قبل كده إنها بتراقب زمايلها في الشغل عشان تشوف مين فيهم جد في شغله ومين ممكن تهزر معاه ويبقوا أصحاب. وقالت إن الموضوع سهل بالنسبالها، لإن جو كان بيقولها مين الكويس ومين لأ.
بس ماجي لسه تعرف جو من فترة قصيرة، ليه بقا واثقة فيه للدرجة دي؟
ماجي وجو بيقضوا وقت كتير مع بعض بره الشغل لدرجة إني بصراحة بدأت أحس إن الموضوع غريب. بعدين اكتشفت إنهم مش بيخرجوا لوحدهم، وعرفت أن عادةً مرات جو وأولاده بيكونوا معاهم، وده خلاني أستبعد فكرة الخيانة، بس برضه الموضوع لسه غريب. لأن أغلب الناس مش بيخلوا حد لسه متعرفين عليه يقضي وقت كتير مع عيالهم كده.
ماجي بقت بتفضل العيلة دي عن باقي أصحابها التانيين، ومره رفضت عزومة صاحبتها عشان تخرج مع عيلة جو!
أنا قابلتهم لأول مرة، وكانت تجربة غريبة جدًا. ماجي أصلًا مش بتحب الأطفال قوي، بس كانت مهووسة بأطفال جو. لدرجة أنها قعدت على الأرض وزحفت مع البيبي!
الطفلة الكبيرة كان خجولة ومش مرتاحة معايا، لكن أول ما شافت ماجي كانت مبسوطة جدًا وجريت عليها وقعدت في حضنها، فواضح إن ماجي قضت وقت كتير مع العيلة دي في الأسابيع اللي فاتت.
ماجي قبل كده قالتلي إنها مبتحبش خالص تقعد مع أطفال، ودايمًا بتحاول تزوغ لو حد طلب منها كده، بس واضح إنها قعدت تاخد بالها من أطفال جو قبل كده!
التصرفات دي غريبة علي ماجي قوي. وكأن ده كله مش كفاية، لاء ده كمان وأحنا قاعدين مع بعض العيلة قالت نكتة غريبة “إنهم عايزين ماجي تعيش في بيتهم علي طول”.
الكلام كان غريب جدًا مع كل الحاجات اللي بتحصل دي. (يا رب يكون مجرد هزار بس!).
في عيد الشكر، قررنا إن كل واحد فينا يحتفل مع عيلته لإن علاقتنا لسه جديدة. جو وعيلته مكانوش قادرين يسافروا بعيد عشان يقضوا العيد مع عيلتهم، فـ ماجي عزمتهم عند أهلها. وده طبعًا شيء لطيف، بس المشكلة إن أهلها عايشين بعيد “علي بعد كام ساعة”، وكلهم باتوا هناك، فالموضوع مكنش مجرد عزومة عادية!
اتصوروا شوية صور، وفي صورة منهم ماجي بتحضن بنت جو الكبيرة! وكتبت تعليق إنها مبسوطة إن “العيلة اللي بتحبها واختارتها” قدرت تيجي تحتفل بعيد الشكر معاها.
كل ده عكس شخصيتها تمامًا! قبل كده قالتلي إنها بتضايق لما حد متعرفوش كويس يصرّ إنه يحضنها، أو لما الناس تقول “بحبك” بسهولة كأنها كلمة سهلة. وفجاه كده كل حاجة اتغيرت 180 درجة!
هي يادوب تعرف الناس دي من شهرين، وفجأة بقت جزء من العيلة دي كأنها واحدة منهم!
هي حاليًا شايلة هم عيد ميلاد البنت الكبيرة، وبتخطط تجيب لها هدية عيد ميلاد وكمان هدية للكريسماس، غير هدية تانية للبيبي!
أنا عمري ما جبت هدية لأولاد زمايلي في الشغل، غير لو كان فيه حفلة في المكتب.
مش عارف حتى أفتح الموضوع معاها إزاي. أنا فاهم إن دي حياتها الشخصية، بس الموضوع غريب وبصراحة مخليني مش مرتاح، فحاسس إني لازم أتكلم، بس مش عارف أقول إيه؟
عندكم أي نصيحة؟ ده مش طبيعي، صح؟
🌿تحديث:
اكتشفت اللي بيحصل، وحاسس نفسي غبي جدًا.
روحت لماجي عشان أطلب منها تفسّرلي اللي بيحصل ده، وكنت مقرر لو سمعت حاجة مش عجباني هسيبها، عشان يا إما هي بتخوني، أو عندها مشكلة نفسية وهوس وأنا مش هقدر اتعامل مع ده.
جاتلي الفرصة لما شوفت الهدايا اللي ماجي جايباها لأطفال “جو وكيت”. سألتها ليه بتعامل الأطفال دول معاملة خاصة كده رغم إنها أصلاً مش بتحب الأطفال قوي؟!
ماجي قالتلي إن أولاد جو بالنسبالها حاجة تانية، لإنها كانت قريبة منهم وشافتهم وهما بيكبروا قدام عنيها! وبتعتبرهم عيلتها!
عشان كده حبت تجيبلهم هدايا حلوه في الكريسماس وتفرحهم.
قالتلي إنها “زمان” كانت بتجيب هدايا الكريسماس ل “جو وكيت” وهما كمان بيجيبولها، بس كلهم اتفقوا بعد كده إن مش لازم هدايا، ف ماجي بقت بتعملهم حلويات!
وقتها استوعبت إن في حاجة مهمة فاتتني. لو ماجي قضت كذا كريسماس قبل كده مع عيلة جو، يبقى مستحيل تكون لسه عارفاهم من قريب زي ما أنا فاكر.
أنا كنت شاكك إن عندها مشكلة عاطفية بتخليها تتعلق بالناس الغريبة، لكن ماكنتش متخيل إنها ممكن تكون مجنونة وبيجيلها تهيؤات كمان!
ماكنتش عايز أسألها تاني، ف اتصرفت عادي جدًا لحد ما مشيت.
أول ما روحت بيتي، دخلت أشوف فيسبوك ماجي. وطلعت لا كذابة ولا مجنونة.
لقيت صور كتير ليها مع “جو وكيت”. وفي صور ليهم من 10 سنين!
اللي فهمته إنهم كانوا مع بعض في الجامعة، وكانوا زي الأخوات، وكمان “ماجي وكيت” كانوا عايشين مع بعض في نفس الأوضة!
كمان لقيت صور لماجي وهي وصيفة الشرف في فرح “جو وكيت”، وصور تانية ليها وهي شايلة أولادهم وهما لسه مولودين! واضح إنهم أصحاب قريبين جدًا وعارفين بعض من زمان.
كل تصرفات ماجي دلوقتي بقت منطقية جدًا بعد ما عرفت كل ده.
حاسس إن كل اللي حصل ده غلطتي. أنا عندي “اضطراب فرط الحركة ونقص الانتباه ADHD” ومش بعرف أتعامل معاه كويس. وعندي مشكلة إن لما حد يفضل يتكلم معايا لفترة طويلة، ببدأ أسرح ومببقاش مركز.
غالبًا ماجي حكيت لي عن “جو وكيت” قبل كده، بس أنا مكنتش مركز وسرحت ومسمعتش.
ماجي في الحقيقة معملتش أي حاجة غلط أو غريبة، والمشكلة من عندي أنا.
الموضوع ده جرس إنذار كبير بالنسبة لي. أنا كنت بتجاهل مشكلتي ومش عايز أعترف إنها جدية، بس دلوقتي عرفت إني لازم أهتم أكتر. أول خطوة هبدأ بيها دلوقتي إني أدور على معالج نفسي يساعدني.
🌿التعليقات علي ريديت:
🌸 أنا عندي ADHD برضه، ومره نسيت إن صاحبتي قالتلي: إنها اكتشفت إن مامتها كانت متجوزة وعندها 4 أطفال في بلد تانية وسابتهم وهربت! صاحبتي ما عرفتش الموضوع ده غير وهي عندها 18 سنة، وكانت بالنسبة لها صدمة كبيرة. لما جابت سيرة الموضوع تاني قدامي بعد شهور، كنت فاكراها بتهزر معايا وكأني أول مره اسمع الكلام ده في حياتي، وبعدين أكتشفت أنها بتتكلم جد والمفروض أني عارفة!!
🌸 حرفيًا نفس الشيء حصل معايا! من كام سنة كنت قاعد في بيت واحد صاحبي وحاولت لمدة نص ساعة أفتح باب الغسالة. كنت مقتنع إن في مشكلة، يمكن القفل معلق، أو زرار أمان الأطفال شغال، أو الغسالة بايظة أصلًا. أكتشفت أني كنت بسحب الباب من الناحية الغلط! الحمد لله إني ما طلبتش مساعدة من حد، كان هيبقى موقف محرج جدًا، كنت هفضل أفكر فيه وأنا نايم لمدة عشر سنين قدام! 😂 ” أنا عندي ADHD”.
🌸 كشخص عنده ADHD يااااه حاسس بيك جدًا ! كل اصحابي عارفين وضعي، ودايمًا بطلب منهم يعيدوا الحكايات من الأول أو يفكروني هما بيتكلموا عن ايه، لإن غالبًا مش فاكر أي حاجة من الكلام اللي بيقال أصلاً.
أحلى حاجة في الصحوبية مع حد عنده ADHD إنك تقدر تحكي له نفس القصة مرتين وهو هيستمتع بيها كأنها أول مرة، لأنه غالبًا نسيها من المرة الأولى! 😂
🌸 أنا عندي ADHD وبفتكر التفاصيل كويس بس المشكلة أني بنسي الكلام اللي قولتله من 5 دقايق. عشان كده ممكن أعيد نفس الحكاية كذا مرة وأنا مش واخده بالي. جوزي بيقولي أن الموضوع مزعج شوية.
🌸 جوزي عنده ADHD بس مش مشخص عند دكتور (إحنا كبرنا في جيل محدش كان بيتشخص فيه بأي حاجة تقريبًا). المهم، هو دايمًا بيسرح وأنا بتكلم، وبعدها يبص لي ووشه مستغرب ويقول: “هاه؟”
في حاجات أنا متأكدة مليون في المية إني قلتها، وقعدت اتكلم عنها حوالي 20 دقيقة وهو كأنه أول مره يسمعها 😂
🌸 القصة دي مضحكة جدًا لأن جوزي عنده نفس العادة اللي بتجنني—دايمًا بيسرح لدرجة إني أوقات بحس إنه عمره ما بيسمع أي حاجة بقولها! إحنا متجوزين من أربع سنين! طبعًا الموضوع اتحسن مع الوقت، بس حاسه إن علاقتنا اخدت وقت أطول من العادي بكتير عشان نفهم بعض، لأنه مش بيسمع نص اللي بقوله أصلًا! 😂
(القصة مترجمة من ريديت. أصحاب القصة أجانب).
