الوصية 💰🏠
من سنتين، حصلتلي صدمة كبيرة لما جوزي (46 سنة) توفى في حادثة، كنت مدمرة وحزينة جدًا.
إحنا عندنا تلت أولاد، وكنت فاكرة إن حياتنا سعيدة جدًا، لحد ما عشيقته ظهرت عند باب بيتي، بتطالب بفلوس علشان تصرف على طفل بتقول انه ابن جوزي.
ما كنتش مصدقاها في الأول، بس قدرت تثبت كلامها بسكرين شوت ورسائل وحاجات تانية.
الصورة اللي كانت في خيالي عن جوزي اتشوّهت للأبد، هو سابني لوحدي في وسط المصيبة دي.
من كتر القهر بسبب الخيانة وكمان كنت متضايقة من العشيقة اللي معندهاش دم، وكمان معتبرة نفسها ليها حق وجايه تاخده، قلتلها إنها مش هتاخد مني ولا سنت، ودي غلطتها عشان عرفت راجل متجوز من الأول.
فضلت تطاردني وتزن عليا، ولما لقت إن الموضوع مش نافع راحت لعيلة جوزي علشان تخليهم يضغطوا عليا وأديها اللي هي عايزاه. وصل بيها الحال إنها حاولت تدخل أولادي في الموضوع، وهددتني اني لو مديتهاش فلوس هتروح تقولهم.
كنت عارفة إن لو اديتها فلوس مرة، هترجع تطلب تاني، فقررت أنا اللي أقولهم بنفسي.
أنا وجوزي كنا بناخد مرتبات عالية جدًا، وعندنا استثمارات، ومدخرات، وكمان أخدت مبلغ كبير من بوليصة التأمين على حياته.
سألت محامي، قالي إنها قدرت تثبت وجود علاقة، بس مفيش دليل على الأبوة. لان اسم جوزي مش مكتوب في شهادة ميلاد الطفل، وهي معندهاش أي دليل إنه اعترف بالطفل، فبالتالي ملهاش أي حق قانوني.
بعد ما المحامي بتاعي اتواصل معاها وحذرها وقالها تبعد عني، ما سمعتش عنها حاجة لفترة، وافتكرت إن الموضوع خلاص خلص. لحد ما بنتي الكبيرة أليكس (19 سنة) جاتلي وقالتلي إنها عملت تحليل DNA مع العشيقة من ورايا.
قالت إنها عملت كده علشان عايزة تحل الموضوع، وإن الطفل ده من حقه يعرف مين أبوه وياخد الفلوس اللي يستحقها.
جوزي كان كاتب في الوصية إن كل واحد من أولاده يورث نصيبه، بس ما يقدرش يستخدم الفلوس غير لمصاريف الجامعة، وما يبقاش ليه سيطرة كاملة علي الفلوس غير لما يتم 25 سنة.
لما طلعت نتيجة التحليل وثبت إن جوزي فعلًا هو أبو الطفل، العشيقة رفعت عليا قضية في المحكمة.
القضية استمرت لفترة طويلة، لكن في الآخر وصلنا لحل. قعدت مع أليكس وشرحت لها إن الاتفاق دلوقتي إن ورثها هيتقسم 50/50 بينها وبين أخوها (ابن جوزي).
سألتني إذا كان إخواتها التانيين كمان هيضطروا يقسموا ورثهم؟
قلت لها…”لاء.” وصية جوزي بتقول إن الميراث لازم يتقسم، لكن ما قالش إنه لازم يتقسم “بالتساوي”، ولحد ما كل واحد فيكم يتم 25 سنة، أنا اللي عندي السيطرة الكاملة.
أليكس كانت متضايقة وبتقول إن ده مش عادل.
رديت عليها إن اللي مش عادل هو إن إخواتها التانيين ياخدوا نصيب أقل بسبب اختيارها هي، ولو كانت عايزة نصيبها بالكامل، يبقي ماكنش المفروض تعمل تحليل الـDNA.
لسه في فلوس كفاية لأليكس علشان مصاريف الجامعة، بس مش هيبقى معاها فلوس كتير بعدها. وبالنسبة لميراثي أنا، ناوية أقسمه بالتساوي بينهم كلهم مش هظلم حد. وأليكس عارفة الكلام ده، لكن برضو بتعاملني ببرود.
إخواتي شايفين إن ده مش عادل، وإني بعاقب أليكس علشان عملت الصح مع أخوها، بس أنا مش شايفة نفسي غلطانه. عايزة أعرف رأيكم؟
🌿تعديل: للناس اللي بتسأل
أولادي التانيين ولد 17 سنة وبنت 14 سنة والولد اللي ظهر ده عنده 5 سنين دلوقتي.
جوزي عمل الوصية من 10 سنين، في الأول كان كاتب أسماء أولادنا، بس بعد كده شال الاسماء وكتب كلمه “أولاده” ، ولما استغربت وسألته قالي عشان لو خلفنا طفل تاني!!
🌿تعديل :
دلوقتي الاخوات زعلانين من بعض وأنا بحاول اتكلم معاهم وعايزاهم يتصالحوا وأقترحت عليهم نروح للعلاج النفسي، ياريت السلام يرجع للبيت مره تانيه.
🌿تعديل :
اكتشفت إن في ناس فاكرين إن أليكس مش هتاخد أي حاجة خالص، وده مش صح. لسه في فلوس الصندوق علشان تدفع فلوس الجامعة، وهي عايشة معايا في البيت ومش بتدفع إيجار، وأنا اللي بدفع كل فواتيرها، وبديها مصروف، وكمان سيبتلها عربية. بالإضافة لكده، هي هتاخد نصيب زي أخواتها من ميراثي لما أموت.
🌿خلصت القصة الأولي.
🌸قصة جديدة:
جوزي (65 سنة) وأنا (47 سنة) متجوزين من 10 سنين.
بعد حفلة تقاعد جوزي، فتح معايا موضوع الوصية والورث، جوزي قالي إنه كاتب في وصيته إنه هيورّث بيت الزوجية لبنته (30 سنة).
بصراحة اتصدمت جدا من الكلام ده!!
أنا عارفة إن بسبب فرق السن الكبير بينا، غالبًا هعيش بعد جوزي سنين طويلة، وده معناه إنني ممكن أقضي آخر سنين عمري لوحدي. عشان كده، اتضايقت جدًا واتعصبت لما عرفت إن بعد وفاة جوزي غالبًا هتطرد من بيتنا ومش هلاقي مكان أعيش فيه.
جوزي قالي إني أكيد عارفة إن البيت كان ملك مراته اللي توفت، وهي ورثته من أهلها، عشان كده طبيعي أن البيت يكون من حق بنته.
قلتله إن البيت دلوقتي بقى بتاعه، وأنا مراتة وليا الحق في بيت الزوجية. ومش عدل بعد كل الوقت والمجهود اللي عملته في تجديد البيت عشان يبقى على مزاجي، في الاخر أخرج منه واترمي في الشارع.
أنا ست بيت، ومعنديش مكان تاني أروح فيه، وهو واجب عليه يوفري الأمان.
قال إن لو أنا اللي ورثت البيت، ده هيكون ظلم كبير لبنته وللمرحومه مراته، وإن مراته عمرها ما كانت هتوافق على كده.
مراته ماتت فجأة وهي لسه مش كبيرة قوي ومكنتش عامله وصية، عشان كده البيت انتقل لجوزي تلقائي حسب قوانين الميراث.
جوزي قالي إني المستفيدة الوحيدة من التأمين علي حياته، وإن أي فلوس هتتبقى بعد وفاته هتتوزع بالتساوي بيني وبين بنته.
بس أنا مش شايفة إن الفلوس دي هتكون كفاية عشان أعرف أعيش باقي حياتي، خصوصًا إن جوزي مخطط يصرف فلوس كتير على رحلات وإجازات فخمة طول فترة التقاعد.
للأسف، الخناقة زادت بينا وبدأنا نتكلم بصوت عالي. قلت له إنه ظلمني بعد كل اللي عملته عشانه، وبعد ما ضحيت بشغلي ومستقبلي عشان أهتم بالبيت، وإن من حقي أخد تعويض بعد كل اللي قدمته.
قالي إنه عمره ما طلب مني أبقى ست بيت، وإن ده كان اختياري لوحدي، وقال كمان إنه هسيب لي ميراث معقول، ولو الوضع ده مش عاجبني ، يبقي أرجع اشتغل تاني.
قلتله إني مكنتش أعرف إني مش هاخد البيت، وإنه صعب أرجع اشتغل تاني بعد ما سيبته من أكتر من 10 سنين.
قلتله إنه شخص أناني وظالم عشان يسيبني في الموقف ده، وإحنا متفقناش علي كده، وإنه حتي مش معترف أنا تعبت أد ايه في البيت ده.
هو ضحك وقال إني عمري مادفعت أي فلوس، وإننا أصلاً بنجيب عمال تنظيف وشغّالات وهما اللي يعملوا أغلب الشغل، وإني كنت عبء عليه بسبب الفلوس اللي بصرفها.
بصراحة، في اللحظة دي كنت غضبانة قوي وعماله أعيط، صرخت فيه إنه بقي قاسي جدًا عليا، وقفلّت على نفسي أوضة الضيوف.
هل من حقي أطلب أن البيت يكون بتاعي؟
🌿تعديل:
تمام، فهمت. أنا اللي غلطانة. هاعتذر لجوزي وهحاول أدور على شغل، هشوف حاجة تكون مش مرهقة وأستمتع بيها وأبدأ أحوش فلوسي الخاصة. أنا مش عايزة أطلق منه وأخد نص أي حاجة.
الناس اللي بتتهمني أني اتجوزته عشان كنت طمعانه فيه، لاء ده مش حقيقي أنا في الاول مكنتش أعرف انه غني.
أنا كنت زهقانة من الارتباط وكنت ناويه أكمل حياتي لوحدي، ولما ظهر في حياتي كان انسان حنين وصادق واتفاهمنا مع بعض كويس، وحسيت انه مخلص عشان كده وافقت اتجوزه.
قبل الجواز كنت بشتغل كول سنتر، وكنت علي طول تعبانه ومتوتره والمرتب كان قليل، جوزي قالي دوري علي وظيفه أحسن من كده.
سبت شغلي ولما قعد في البيت حسيت اني مرتاحه كده وقررت ابقي ربه منزل.
أنا كنت متعلقة قوي بالبيت ده علي أساس أنه بتاعي بس خلاص أنا فهمت أنه مش من حقي، وناويه أعتذر لجوزي وبنته.
(القصص مترجمة من ريديت..أصحاب القصة أجانب).
