الهديه دي بتأكد ان العلاقة انتهت!!!
أنا (38 سنة) هتجوز خطيبي (38 سنة) كمان شهور.
كل صحباتي متجوزين.
أنا آخر واحدة في صحباتي اللي لسه هتجوز، وبصراحة، كنت متصالحة مع فكرة إني هفضل سنجل وهجيب كلب “قبل ما أتعرف على خطيبي”.
أحنا شله بنات عددنا 6، وكلنا عرفنا بعض من أيام الجامعة. عدينا على كل حاجة مع بعض:
“خطوبات، أجازات، أفراح، أطفال، ترقيات”
لما قلت لهم إني اتخطبت، كانوا مبسوطين وبعتولي رسائل تهنئة، لكن لما باقي البنات كانوا بيتخطبوا، كانوا بيعملوا لهم حفلات أو بيخرجوا يتعشوا في مطعم، وده ما حصلش معايا!!!
أنا قلت لهم عن حفلة توديع العزوبية تقريبًا من سنة، وأنا عملاها بسيطة لأني مش عايزة حاجة كبيرة. هنخرج نتعشى وناخد مشروبات في مطعم في مدينتنا.
بس بالتدريج، كل صحباتي ابتدوا يعتذروا، في اللي قالت إنها مش لاقية جليسة أطفال، أو عندهم شغل لوقت متأخر، أو مسافرين للشغل !!!
طبعًا أنا عازماهم على فرحي برضه، اللي ناويه أخليه احتفال بسيط، واحدة منهم بعتت في جروب الواتساب إنها مش متأكدة إذا هتلاقي جليسة أطفال في اليوم ده !!!
فرحي لسه بعد شهور، وصعب أصدق إنها عارفه من دلوقتي ان مفيش جليسة.
اتنين كمان قالوا إنهم ناويين يمشوا بدري، مش هيقعدوا لحد الحفلة اللي بعد الفرح علشان “هيكونوا تعبوا”.
اللي خلاني أتعصب بجد قوي لما بعتتلهم قايمه بالهدايا اللي أحنا محتاجينها. أنا وخطيبي عندنا تقريبًا كل حاجة، فطلبنا حاجات بسيطة، مفيش حاجة تمنها أكتر من 50 دولار، وأنا هكون مبسوطه بأي هديه هتيجي.
أصحابي بعتوا رسالة في الجروب إنهم هيتفقوا كلهم مع بعض و يجيبوا لي “قلاية هواء” تمنها 40 دولار.
استغربت قوي إنهم هيدفعوا كل واحدة حوالي 8 دولار بس !!!
على مدار السنين، أنا صرفت آلاف الدولارات على أفراحهم، اتنين منهم فرحهم كان برة البلد. حضرت عزومات فطار وغدا للاحتفال بترقياتهم في الشغل، واشتريت هدايا لأطفالهم، رغم أني كنت محرومه من كل ده.
بعتتلهم رسالة بسأل إذا كانوا هيجيبوا الهدية دي كلهم مع بعض؟؟
واحدة ردت وقالت لي “إنتِ بتتهمينا بالبخل؟” ومن ساعتها ما حدش رد.
والله، ما كنتش دي نيتي، لكن حاسة علشان أنا آخر واحدة، هم زهقوا من حضور المناسبات، وده بيزود أحساس الحزن جوايا اني فعلا متأخره قوي.
يمكن حقيقي عندهم أسباب، هما عندهم حياة وأولاد ويمكن مش معاهم فلوس زي زمان.
يمكن أنا اللي سايبة قلقي يتحكم فيّ.
يا ترى، أنا غلطانة؟
أهلًا يا جماعة،
أول حاجة، حبيت أرد علي الأسئلة:
🌿أنا مكنتش مهتمة أصلاً بالهدايا، ومش فارق معايا لو جابوا هدية أو لأ، هما اصلًا الي فتحوا الموضوع في الجروب. المشكلة مكنتش في القلاية الهوائية (Air Fryer). أكيد ماكنتش عايزة اتهمهم بالبخل، بس بصراحه أنا حسيت “بعدم احترام”.
🌿حد قالي إن هدية بـ8 دولار أسوأ من عدم وجود هدية خالص ، أعتقد إن ده فعلاً أصل الموضوع.
🌿الناس بتسأل عن وضعهم المادي. على حد علمي، كل صحباتي وضعهم المادي كويس. كلنا شغالين في مجالات محترمه ، ومعظمنا محاسبين، وثلاثة منهم في مراكز عالية في شغلهم، وأزواجهم كمان عندهم وظائف كويسة.
بس إحنا عمرنا ما بنتكلم عن الفلوس، وأنا فاهمة إن مصاريف الأولاد عالية اليومين دول، فمش عايزة أفترض حاجة عن حالتهم المالية، لكن الكل باين عليه أن حالته المادية كويسه.
🌿سؤال تاني كان عن عدد مرات اللي بنشوف فيها بعض. الحقيقة، إحنا بنتقابل بانتظام. عملنا اتفاق من سنين إننا نتقابل مرة في الشهر مهما كنا مشغولين، وكنا بنلتزم بده أغلب الوقت. غالباً بنتقابل على الفطار يوم الأحد. غير كده، أنا عايشة في نفس المنطقة مع اتنين منهم، فبنتعشى أحيانًا مع بعض، وبروح حفلات أولادهم برضو ده شيء أساسي.
🌿وآخر حاجة، فرحي مسموح فيه بوجود الأطفال عادي، وحيتعمل في المدينة اللي إحنا عايشين فيها. أنا بحب الأطفال، وأولاد صحباتي زي ولادي، وكلهم معزومين.
🌿وأخيرًا، في ناس اقترحت إنهم ممكن يكونوا مش بيحبوا خطيبي. عمري ما حسيت إن ده حقيقي، عادي بيبان عليهم إنهم متفاهمين معاه، وهم عارفينه من سنتين، وكمان بيروح مع أزواجهم يلعب جولف أحيانًا.
🌹 بالنسبة للتحديث، لما قريت التعليقات حسيت كإن حد وقع ميه ساقعة عليا. عمر ما فكرت في نفسي إني الصاحبة “المنبوذة”، لكن في ناس كتير اقترحت إن دي الحقيقة، وده هزني جامد.
كنت حزينه قوي ومنعزله شوية لحد ما خطيبي حس إن في حاجة غلط. وريته البوست، سكت فجأة وكان غضبان جدًا، ودي أول مرة أشوفه زعلان للدرجه دي.
سألني لو كنت كلمتهم في الموضوع وقلت له لأ.
فبدأ يكلمهم واحده واحده ويزعق لهم.
قال لهم إنهم “ناس أغبيا قيمتهم بـ8 دولار” وإنه هيبعت لهم قائمة بكل الفلوس اللي صرفتها عليهم على مدار السنين.
لما كلم واحدة منهم على موضوع الأطفال وقالها ان دي حجه وأنها كدابه ، هي ردت إنها زهقت من حضور الأفراح كل شويه وإن “فرحك مش هيكون مختلف في حاجة يعني “. وقتها خطيبي انفجر فيها.
خلاص مكنتش عايزه خطيبي يكلم حد تاني كفايه، فطلبت منه يبطل بعد ما كان عمل ٣ مكالمات.
بعد كده بعت لهم رسالة في الجروب أسأل لو نقدر نتكلم مع بعض كمجموعه، ال٣ بنات اللي خطيبي كلمهم ردوا برسائل صوتية بيقولوا إن خطيبي “مجنون” وإنهم مش هيكلموني تاني.
حسيت بالإرهاق والتعب، فبعت لهم رسالة” لو مش عايزين نكون أصحاب تاني، خلاص مفيش مشكلة، واعتبروا الدعوات للحفلة والفرح ملغية”. محدش رد، فاظن إن خلاص الموضوع انتهى.
أنا عارفة إن كده أحسن، بس مش حاسة بكده. أنا مكتئبه وحزينة.
صحباتي كانوا جزء كبير من حياتي لفترة طويلة، وأنا حاسة أني هفتقدهم. ومش قادرة أصدق إني مش هشوف أولادهم تاني. دول كانوا بينادوني “خالتو”، وده بجد بيخليني أعيط إنهم مش هيكبروا قدامي.
خطيبي اعتذر لأنه اندفع ومسألنيش الأول أنا عايزة أتعامل مع الموقف إزاي، وأنا قبلت اعتذاره.
إحنا تمام، وأنا متحمسة لحياتنا مع بعض.
أنا عايزة أنسى الموضوع وأمشي لقدام……..
🌿انتهت القصة الاولي.
🌹 قصة جديده:
عايزة أفضفض شوية من غير ما أسمع انتقادات من العيلة أو الأصدقاء اللي شايفين إن هديته رومانسية، عشان كده بكتب من حساب مش معروف.
عيد ميلادي قرب “بعد كام شهر”، ومن 3 أيام عرفت الهديه اللي خطيبي محضرهالي وهي “تذاكر لرحلة بحرية”. أخته قالتلي الخبر فاكرة إني هفرح، أنا مش فرحانة…..
أنا عارفه إني ممكن أبان انسانة جاحدة، لكن أنا مش كده. الهدية دي بس بتثبتلي إن مفيش حاجة هتتغير.
أول حاجة، الهدية دي مش ليا. أنا مش بحب الرحلات البحرية لأني بتعب جدًا من “دوار البحر”، ومفيش حاجة بتساعدني أخفف من آلم الدوار.
كمان قلت له قبل كده إني عايزة أروح “مهرجان موسيقي” في عيد ميلادي. أنا واخدة الأسبوع ده أجازة من الشغل وجهزت نفسي للمهرجان، وجبت التذاكر وكنت بحوش شهر بشهر عشان أجهز فلوس من غير ما تأثر على مصاريفي.
ليه يحجز تذاكر في نفس الوقت اللي أنا واخداه أجازة عشان أروح المهرجان؟ وكمان الرحلة دي مش رخيصة، فبالتالي الفلوس راحت على الفاضي لأني مش هروح.
أنا متضايقة جدًا. قلت له كذا مرة إنه مش بيسمعني، بحس إنه بيجبلي حاجات بناءً على ذوقه هو أو علي الحاجات اللي هو بيحبها.
الموضوع مش بس موضوع الهدايا. هو بياخد قرارات على أساس اللي شايفه هو الأفضل، وأنا مش قادرة أتحمل ده أكتر.
أنا بحبه، لكن خلاص تعبت، وقبل ما حد يقول إني لازم أكلمه عن الموضوع الاول، أنا كلمته كذا مرة.
ده موضوع بيتكرر في علاقتنا اللي بقالها سنتين ونص.
اللي فاضل إننا نتكلم وننهي العلاقة.
🌹 تحديث:
في اليوم اللي كتبت فيه البوست، أنهيت علاقتي معاه.
قلت له إني لقيت التذاكر وسألته جايبها لمين. قال إنها بمناسبة عيد ميلادي وإني خربت المفاجأة.
سألته ليه جابلي تذاكر رحلة بحرية وهو عارف إني بتعب من دوار البحر وكمان عارف إني كنت بجهز للمهرجان من فترة.
قال إنه دايمًا بيحب الرحلات البحرية لما كان بيروحها، وكان فاكر إني ممكن أعدي الموضوع وأخد دواء أو أي حاجة تانية عشان الرحلة غالية جدًا.
فضل يتكلم لكن بصراحة، أنا فضلت سرحانة لأني أتأكدت قد إيه الشخص ده مش مهتم بيا.
جاب تذاكر للرحلة متجاهل تمامًا، إحساسي، ورغبتي، أهم حاجه بالنسبه له أنه بيحب الرحلات.
حتي في عيد ميلادي مش مهم أنا عايزة إيه، المهم نفسه.
أظن إنه فهم أخيرًا إني مش مهتمة أو مش فرحانة، فسألني مالك؟ وقتها انفصلت عنه.
كان مصدوم وغضبان وسألني ليه؟
مش فاكرة بالظبط قلتله إيه، لكن قولت حاجة زي “لأني أتأكدت إنك مش بتاخد بالك مني وإن دايمًا رغباتك أهم من رغباتي في كل وقت، حتى في عيد ميلادي.”
حاول يتكلم ويجادل لكن أنا كنت مشوشة ومشيت.
بعد ساعتين من المحاولات إنه يتكلم معايا وإنا مش عايزه أرد عليه، سابني.
صحيت تاني يوم وروحت الشغل وأنا حاسة إني كويسة بشكل غريب. حاول يتكلم تاني، لكن قلتله خلاص الموضوع انتهى، إنا مش هغير رأيي، بالنسبالي العلاقة دي انتهت، وكل اللي عايزة إننا ننفصل بشكل ودي.
وأنا في الشغل، كتبت كل المواقف اللي حصلت في آخر 6 شهور بس، اللي كان بيختار فيها نفسه وبيتجاهل أنا عايزه ايه . كتبت تقريبًا 3 صفحات مليانة.
وقتها عرفت اد ايه كنت بتنازل طول الوقت.
هو لسه مش قابل فكرة الانفصال. عايز نروح ناخد استشاره مع معالج، أو حتى ناخد استراحة لأنه فهم قد إيه كان بيغلط في حقي ، لكن لأ، أنا مش هعمل ده. مش بحاول أكون قاسية معاه، لكن مش عايزة أديه أمل كداب.
انا هقضي عيد ميلادي لوحدي واعمل الحاجات اللي انا نفسي فيها……..
🌿انتهت الرساله.
🌹خطيبي اللي من عيلة غنية جابلي هدية رخيصة؟
أنا (21 سنة) خطيبي (21 سنة)
خطيبي من عيلة غنية، وأنا من عيلة من الطبقة المتوسطة.
عيله خطيبي عزمونا في رحلة بحرية، كل إخواته وقرايبه كانوا معانا. أنا كنت مبسوطة إني هناك وشكرت أهله على دعوتي.
كنا كلنا قاعدين سوا وخطيبي بدأ يطلع هدايا.
أهله وإخواته وقرايبه أخدوا حاجات زي ساعات، فساتين، عصير فاخر، وحاجات تانية غالية وواضحة إنها بمبالغ كبيرة.
لما جه دوري، إداني “إسورة بلاستيك” عليها اسم شركتهم. الإسورة دي ممكن تاخدها ببلاش من مقر الشركة الرئيسي !!!
أنا اتفاجئت شوية واتحرجت، لكن ما كنتش عايزة أبان قليلة الذوق. كل الناس كانت بتبص لي بطريقة بين الضحك والشفقة. ما كنتش عايزة أشتكي فشكرت خطيبي وسكت.
لما دخلنا جوا، سألته إيه ده؟ فقال لي أبطل شكوي وأكون ممتنة، لأنه دايمًا بيجبلي هدايا غالية ولطيفه ، وده حقيقي. فبطلت أتكلم لأني حسيت إني جاحدة وهو عنده حق.
بس اللي عمله حسسني بالإهانة. كان ممكن ما يجيبليش حاجة خالص، هيكون أهون من اللي عمله.
أنا حاسة إني غلطانة عشان زعلانه بالهديه دي، الحقيقة هو دايمًا كان بيهتم، ومش فاهمة ليه عمل كده. حسسني إني رخيصة قدام الناس!!!
مش عارفة، هل أنا غلطانة والمفروض ماكنتش فتحت معاه الموضوع؟
🌿 بخصوص الأسئلة اللي الناس بتسألها، أنا وخطيبي بقالنا سنتين مع بعض. أنا و أهله علاقتنا كويسة جدًا. وهما اللي دفعوا تمن الرحلة البحرية للكل.
🌹 التحديث:
أهلًا يا جماعة!
اتكلمت مع خطيبي و سألته بشكل مباشر إيه اللي كان في دماغه لما عمل كده؟
قلتله إني بفكر في الموضوع من يوم ما رجعنا من الرحلة. ليه كان بيجيب هدايا للناس؟ وليه جاب لي الهدية دي؟ و إزاي شايف ده مقبول؟
في الحقيقة، محدش هنا خمن صح! ولا أنا حتى!
خطيبي كان ناوي يديني هدية كبيرة ومميزه .
المفروض الهديه كانت أني أأقضي يوم مع “قطة ظريفة جدًا بتابعها على تيك توك.”
صاحبة القطة ساكنة جنب الميناء اللي كنا هننزل فيه، أنا بحب القطة دي ومتبعاها من 2020 و لسه بتابع صفحتها بانتظام!
بس صاحبة القطة لغت الموضوع في آخر لحظة، حتى بعد ما خدت مبلغ كبير.
هو كان هيفاجأني في الآخر، لكن أكتشف انه ما عندوش هدية واتنصب عليه من صاحبة القطة.
قال اللي عمله كان غبي، وطلع الإسورة في آخر لحظة عشان يحافظ على شكله… بس هو عارف دلوقتي إنه كان تصرف غبي.
وبالنسبة لرده عليا وقتها ، اعتذر وقال إنه معندوش مبرر. هو إنه كان غضبان من نفسه ومن صاحبة القطة واتنرفز عليا.
أنا فهمته وسامحته لأن التصرف ده خارج عن طبيعته هو كان بجد عايز يعمل لي حاجة لطيفه.
كل حاجة بقت تمام يا جماعة هنعدي الموضوع!
للأسف مش هقدر أقابل القطة، لكن دي هتفضل قصة فاكراها دايمًا 😅
#قصص
