أشمعني هي وأنا لاء!!
أختي وجوزها كانوا دايمًا بيبان إن جوازهم مثالي (بقالهم مع بعض حوالي عشر سنين)، بس الواحد مابيبقاش متأكد أن دي الحقيقه بجد ، صح؟ وبصراحة كنت فاكره إنهم بيعملوا تمثيلية لأن عمري ما كان عندي علاقة كويسة جدًا زي دي.
دلوقتي بقى أنا متأكده أنهم مش بيمثلوا.
أنا بقالي تلات شهور عايشه معاهم. هما استقبلوني عندهم لما جوزي السابق خان*ن*ي.
بيعملوا حاجات لطيفة لبعض طول الوقت، وكأن الموضوع طبيعي.
دايمًا بيجيبوا لبعض هدايا بسيطة. جوزي السابق كان بيقولي إني سطحية لما كنت أطلب منه حتى هدية رخيصة لعيد ميلادي.
لما بيبصو لبعض، عنيهم بتلمع. جوزي السابق كان بيبصلي كأني بطاطساية.
لما حد منهم بيرجع البيت، بيسلموا علي بعض كأنهم مشافوش بعض بقالهم شهور. جوزي كان بيتجاهلني لما أرجع البيت أو كان بيقول لي “سيبيني في حالي عشان أعرف أستريح”.
بيشجعوا بعض علي هواياتهم وصداقاتهم . جوزي كان بيكره اصحابي وكان شايف أن هواياتي تفاهة.
والأسوأ من كده، اني أكتشفت إنهم اصلا بيحاولوا يقللوا الحنية قدامي. في مرة رجعت البيت بدري وشوفتها سانده علي كتفه وهما بيتفرجوا على التلفزيون، وهو بيلعب في شعرها. الظاهر إن اللي بشوفه ده مجرد جزء بسيط من قد إيه هما بيحبوا بعض.
كمان عدوا بحاجات صعبة زي (موت ناس قريبة ليهم، وإجهاض، وخساير في الشغل) – حاجات ممكن تبوظ أي علاقة، بس واضح إنهم عرفوا يتخطوا كل ده بشكل كويس قوي .
بصراحة ماكنتش مصدقه إن فيه علاقات بالشكل ده فعلًا. كنت فاكره إن دي مجرد حاجات بتحصل في الأفلام والروايات الخياليه، وإن كل العلاقات بتبقى صعبة ومزعجة بعد ما “جمال البدايات” بيروح.
ماكنتش مصدقه، فصراحة اتجسست على جوزها (“ماكس”). اكتشفت إن محادثاته العادية مع أصحابه كلها تمام. وكل كلامه مع اصدقائه محترم، وكان بيتكلم عن قد إيه هو بيحب أختي (“ساندرا”).
على فكرة، حسيت بالذنب لما اتجسست، فاعترفت ليهم. و سامحوني.
أختي اخدتني في يوم نتكلم لوحدنا من غير ماكس وحكت لي إنها مرت بعلاقه مؤلمه قبل ما تتعرف على ماكس”أنا كان عندي فكرة عن ده من الاول” وقالتلي إنها حست إن العلاقة دي علمتها إزاي تميز “العلامات الحمراء” عشان تعرف تميز الشخص الصح لما ييجي.
كمان قالت لي أنها راحت علاج نفسي لفترة طويلة، وده ساعدها تتعلم إزاي تاخد قرارات صحية في العلاقة وتكون شريكة كويسة.
ماكس وساندرا عرضوا يدفعوا تكاليف علاجي النفسي لأن تأميني مش كويس، ودي حاجة لطيفة منهم.
أنا بس نفسي ألاقي حب زي اللي عندهم.
الشيء الإيجابي في الموضوع إني دلوقتي متأكدة إن العلاقات بالشكل ده مش خيالات طفولية، وعشان كده مش هقبل أبدا أكون مع حد زي جوزي السابق تاني.
🌹#تحديث (بعد 16 شهر)
مش عارفة أبدأ منين بالظبط، هكتب الموضوع في شكل نقط، وأكتب الحاجات زي ما تيجي في دماغي:
🌿بدأت العلاج النفسي بعد البوست بتاعي على طول. المعالج الأول مكنش كويس قوي، ف ساندرا أختي شجعتني أدور على حد تاني، والمعالج الثاني كان ممتاز. لسه بروح له مرة كل أسبوعين. ساعدني كتير في إنّي أتعافى من صدمات العلاقة اللي فاتت وكمان أتعلم إزاي أتعامل مع الناس بطريقة صحية أكتر. كمان علّمني إزاي أتحكم في مشاعر المرارة والغيرة.
المعالج أكتشف الأسباب الحقيقية للغيرة واشتغل عليها.
🌿سبت بيت أختي وجوزها بعد كام شهر.
🌿اتضح إن أختي وجوزها كانوا متضايقين جدًا من موضوع التجسس اللي حصل، لكن قدروا إني اعترفت من نفسي وقرروا يكونوا طيبين ويساعدوني. قالوا إني لو استفدت من مساعدتهم وبذلت مجهود عشان أبقى أحسن، هايسامحوني.
🌿مبقتش أتضايق لما أشوف جوز أختي بيحبها وبيهتم بيها. بالعكس بقيت مبسوطة عشانها.
🌿فضلت سنجل طول الفترة دي، وده كان باختياري. لكن من كام شهر قررت إني ممكن أفكر في موضوع الارتباط تاني. وقررت إني مش هتجنب الموضوع.
🌿من أسبوع، أتعرفت علي واحد في “ملجأ حيوانات” بدأت أتطوع فيه من حوالي 6 شهور هو طلب يتعرف عليا. وافقت.
أول ديت كان جميل جدًا. هو شخص طيب. هو الشخص اللي الناس بتروح له لو عايزين يهدوا حيوان مصدوم وخايف.
أختي موافقة عليه. وكمان دمه خفيف قوي ❤
(القصة حقيقية)
#قصص
