أخويا اللي في النص 👨🦰
أنا واحدة من أربعة إخوات (2 ولاد و2 بنات)، كلنا في سن بين 30-42 سنة، كلنا متجوزين ما عدا أخونا اللي في النص “ديف”.
ديف كان عنده دايماً مشاكل في المدرسة وكمان في التعامل مع الناس، ولما كبر بقة عنده مشاكل في إنه يلاقي شغل ويقدر يدفع فواتيره.
ماما طول عمرها كانت بتضغط علينا عاطفيًا علشان “نراعى” أخونا ونديله فلوس.
كلنا اتفقنا إننا نساهم بمبلغ بالتساوي كل شهر ل ديف علشان العبء مايقعش على أهلنا اللي كانوا عاوزين يطلعوا على المعاش.
أخونا الكبير كان دايمًا بيكره الفكرة دي، وماكنش عاجبه اللي بيحصل ده خالص. لأنه شايف إن ديف بيهرب من المسؤولية طول حياته، وبيقول عليه كسلان.
كمان بيلوم ماما لأنها كانت مدلعاه، ودايمًا بتسميه “ابنها الحساس الطيب”.
إحنا الباقيين عمرنا ما كنا مدلعين كدة، خصوصًا الأخ الكبير اللي كان مضطر يتحمل مسئولية ديف من وهو صغير.
من حوالي سنة، أنا وأختي وقفنا الفلوس اللي كنا بندعم ديف بيها بسبب ظروف مادية صعبة، وماقلناش الكلام ده لأخونا الكبير.
هو ومراته دخلهم أكبر بكتير مننا، وفكرنا إن ده مش هيأثر عليهم ماديًا، وماكنّاش عايزين ديف يتساب من غير أي دعم.
على أي حال، خلال مكالمة زووم عائلية، ماما كده فجأة قالت إن “ابنها الحساس الطيب” محتاج دعم أكتر من اللي بيجيله من عيلته، وقتها أخويا الكبير عرف أن هو الوحيد اللي بيدفع ل ديف.
كان غضبان جدًا! و اتهمنا إننا استغلاليين وكذابين ونصابين وحاجات كتير تانية، وفي الآخر قال: “طز فيكم كلكم” وقفل المكالمة.
من وقتها، ماكلمش حد فينا، ولا حتى أهلنا.
دلوقتي عدي شهرين وإخويا مبعتش أي فلوس وديف حاسس بالرعب لانة ممكن يطرد من شقتة لو مدفعش الايجار.
أنا وأهلي حاولنا نتواصل مع مراته علشان نشوف لو ممكن تساعد، خصوصًا إنها بتكسب زي أخونا الكبير أو أكتر، وتقدر بسهولة تدفع المبلغ. لكن رفضت تمامًا، وقالت علينا مجانين علشان بنطلب منها حاجة زي دي وكمان عايزينها تعارض جوزها.
كمان قفلت أي تواصل معانا وما بقتش ترد على مكالماتنا. 🙄
إحنا خلاص معندناش حلول تانية، وبنفكر نسافر 3 ولايات علشان نواجه أخونا الكبير و نخليه يساعد العيلة.
جوزي شايف إن دي فكرة وحشة، وبيقول إننا لازم نسيب ديف يشيل مسئولية نفسه بقى ويواجه مصيره وملناش دعوة.
قبل ما حد يسأل، ديف اتعمله اختبارات كتير من سنين واتأكدنا إن مفيش عنده أي مشاكل عصبية أو عقلية، بس هو “حساس”، علشان كده ماما طلعت عليه الأسم ده.
هل هكون غلطانة لو سافرت كل الطريق ده علشان أواجهة أخويا الكبير؟ وأطلب منه يساعدنا؟
⭐ تعديل:
ديف كان عنده شغل قبل الجائحة، بس كان شغل بدوام جزئي والفلوس اللي بياخدها مش كفاية علشان يدفع الايجار والحاجات التانية.
⭐ تعديل :
يمكن كلمة “مواجهة” كانت تعبير غلط مني. اللي كنت أقصده إني رايحة أطلب مساعدة أخويا الكبير وألح عليه مش أواجهه.
⭐ تعديل:
اتضح إن الموضوع أكبر مما كنت فاهمة، لأني اكتشفت إن أخويا الكبير كان كمان بيشارك في دفع مصاريف لأهلنا. 😬
اللي اكتشفته إنه كان بيساعد في دفع أقساط بيت أهلنا وسداد قروض أختنا الجامعية، لكن للأسف وقف المساعدات دي من ساعتها علشان زعلان.
الظاهر إنه مش مهتم خالص باللي بيحصل لباقي العيلة طالما هو ومراته عايشين كويس 😞
أنا معترفة إني غلطت لما كذبت ،وأنا متحملة مسئوليه ده، لكن ما أقدرش أقول إني غلطانة علشان بحاول أساعد ديف انه يعيش، خصوصًا و أخويا الكبير عنده القدرة إنه يساعد عيلته لكن هو اللي مش عايز.
⭐ آخر تعديل:
بصراحة، إن حوالي 1000 شخص يقولولي أنا وعيلتي إننا ناس فظيعة بالطريقة دي حاجة مرهقة وغريبة.
إحنا ما جبرناش أخونا الكبير إنه يساعد في أقساط بيت أهلنا، هو اللي تطوع بكامل إرادته وقرر يساعد، خصوصًا إن أهلنا دفعوا له تكاليف الكلية.
علشان كده، أنا متمسكة برأيي إن اللي بيعمله ده مجرد غلاسة منه ومعندوش حق 100%. 🙄
آخر حاجة عايزة أقولها، مع إني عارفة إن كلامي مش هيغير حاجة لأن الكل خلاص قال رأيه، هي إنه لو الوضع كان معكوس، وكنت أنا اللي عندي فلوس أكتر من الباقيين، كنت هكون سعيدة أساعد عيلتي. أنا واثقة من كده تماما 🤷♀️
⭐ التعديل الأخير بجد:
خلاص أنا الغلطانة، وفهمت كده.
أخويا الكبير ومراته مش على Reddit، فغالبًا مش هيشوفوا الكلام ده. لكن أنا متأكده أن أخويا لو عرف كان هيدافع عني حتي لو أنا مستحقش الدفاع ده.
شكرًا لكل الناس اللي قالوا رأيهم بصراحة حتى لو كان صعب عليا أقرأه.
هحاول أكتب اعتذار من القلب، وأتمنى إنه يسامحنا كلنا يوم من الأيام. هو فعلاً أخ كويس جدًا ❤️
(القصة حقيقية مترجمة من ريديت)
قصص
