أنا عمري ٢٨ سنة. أخت جوزي عمرها ٢٣ سنه ، هي أخته من الأم بس.
هي متعلقه بجوزي قوي ،كمان جوزي بيحبها ومش بيقبل أي كلام سلبي عنها. وده السبب اللي خلاني أكتب هنا الاول قبل ما اتكلم مع جوزي.
أنا وجوزي اشترينا بيت السنه اللي فاتت فيه “حمام سباحة داخلي”، أخت جوزي كانت متحمسه جدًا لما شافته. وسألت لو ممكن تستخدمه هي وصاحبتها من وقت للتاني؟
وافقنا بشرط انها تبلغنا الأول قبل ما تيجي.
فعلًا هي وصاحبتها “كلوي” زارونا كم مره واستمتعوا بالسباحة.
في المرات دي جوزي ماكنش موجود تقريبًا ولا مره، لأنه بيشتغل محامي وساعات شغله طويلة.
مع الحظر (الرسالة سنه 2020) جوزي بدأ يشتغل من البيت.
أخت جوزي طلبت انها تيجي عندنا تاني مع صاحبتها.
قولتلها بصراحة أنا مش مرتاحه للفكره. لأني حامل ومش عايزه اعرض البيبي لأي خطر.
قالتلي طيب لو هي وصاحبتها عزلوا نفسهم في الحجر الصحي لمده اسبوعين ممكن يجوا؟؟
جوزي قال، اوك مفيش مشكله.
بعد اسبوعين، وصلوا البيت، جوزي كان في مكتبه
هما دردشوا شويه معايه وبعدين راحوا لحمام السباحة، وقعدوا تقريبا ساعة.
جوزي خرج وقعد معايه في المطبخ، أخته دخلت تاخد عصير ، وهي راجعه تاني للسباحه قالت لجوزي “كلوي” هتبقي مبسوطه قوي لما تشوفك!!!
استغربت كلامها لأن جوزي وصاحبتها مش قريبيين من بعض!
بعد دقيقتين “كلوي” دخلت المطبخ وفضلت وقت طويل تتكلم مع جوزي وبس ، لحد ماهو استأذن يرجع شغله.
كانت بتضحك ومبسوطه قوي وهي بتتكلم معاه وكان واضح عليها أنها بتغازله ، وقبل ما ترجع للسباحة سألت جوزي اذا كان بيشتغل من البيت كل يوم؟ جوزي قالها اه.
بعدها أخدت بالي أن “كلوي” بتبصلي بنظره غريبة!!!
علي مدار الأسبوعين اللي بعد كده، أخته وصاحبتها بقوا يجوا البيت علشان يعوموا كل يوم.
بس “كلوي” ما بتعومش وبتفضل تتمشي في البيت بلبس السباحه ، وتستني لما جوزي يخرج من المكتب علشان يقعد معايه شوية ، و بسرعه بتقاطعنا في الكلام وتتكلم معاه هي لغاية ما يدخل مكتبه تاني!!!
عملت الغدا و كنت رايحه أنادي علي جوزي .أخته وقفتني وقالتلي كلوي هتروح تقوله!!!
بصوا لبعض وكلوي كانت مبسوطه قوي وهي رايحه لجوزي المكتب.
لاحظت كمان انها بتتعمد تمسك ايد جوزي.
السبب الي مخليني متأكده ان أخته كمان متورطه في الموضوع . أنها بدأت ترمي كلام غريب بخصوص الحمل. حكيت لي عن صاحبتها وجوزها الخا**ن . وأن معظم الرجاله بيعملوا كده لما مراتاتهم بيكونوا حوامل. كمان قالت تعليق سلبي عن شكلي ووزني وأني بقيت طخينه جنب جوزي وشكلي غريب لأن جوزي جسمه رياضي!!
كمان أول ما بتشوف جوزي خارج من المكتب بتجري بسرعه تقول لصاحبتها.
أنا عارفه أن هرمونات الحمل مأثره علي تفكيري . علشان كده بسأل نفسي لو أنا ببالغ وبتخيل حاجات مش موجوده .
هي بعتتلي رساله دلوقتي بتستأذن تيجي تعوم تاني الأسبوع اللي جاي، وأنا نفسي اقولها لاء. لكن عارفه أنها هتشتكي لجوزي لو عملت كده.
حابه اتكلم مع جوزي بس مش متأكده لو لازم أقوله علي أحساسي ناحيه كلوي؟
هل انا ببالغ؟؟؟
🌹 تحديث
قررت اتكلم بصراحه مع جوزي بس كنت لسه بفكر هفتح الموضوع معاه ازاي.
كنت بتفرج علي برنامج مع جوزي وجاتلي رسالة من أخته بتقولي انها هتيجي بكره مع كلوي علشان يعوموا.
جوزي شاف الرساله وطلب مني أرد عليها واقولها ماتجيش!!!
استغربت جدًا ، ده جوزي بيعمل المستحيل علشان يرضي أخته ونادًرا لما يرفض لها طلب.
سألته لو في حاجه حصلت ؟ جوزي ما ردش!
بعد شويه جوزي وقف التلفزيون وقالي عايز اسألك علي حاجه؟ لاحظتي أن كلوي عمرها ما بتعوم لما بتيجي بيتنا؟
حاولت أكون هاديه زي ما الناس هنا نصحتني. بس انفجرت في الضحك. بصراحة كنت مرتاحه أن هو اللي فتح الموضوع.
أظن أن جوزي حس اني اتجننت، لما بطلت ضحك كرر سؤاله وقالي أنه عايز إجابه جديه.
قولت له ” أكيد لاحظت”
رد وهو محرج وقالي “يعني……لاحظتي التصرفات التانيه برضه”
باختصار. جوزي مكنش واخد باله في الأول لانه كان مشغول في شغله ومركزش في حاجة تانيه.
بعد كده أخد باله أنها معجبه بيه وبتحاول تلفت نظره بس ماكنش عايز يضايقني علشان كده ماتكلمش معايه في حاجة.
بس بعد كده خاف أني أفتكر انه “فرحان” بتصرفاتها معاه علشان كده قرر يتكلم معايه.
قالي انه اتكلم مع كلوي وقالها انه متجوز وسعيد ❤️
ومش مهتم بيها ولا بيفكر في أي واحده تانيه.
هي برضه مهتمتش وكملت في تصرفاتها مع جوزي.
في النهايه جوزي كلم أخته وقالها خلي صاحبتك تبطل حركاتها ومتجيش عندنا تاني.
أخته دخلت في نوبه غضب وغلطت فيه وقالت عني كلام سلبي وأن صاحبتها أجمل وأصغر مني!
جوزي أضايق علشاني وقالها لو قلتي كده علي مراتي تاني أنا هزعل منك ومش هكلمك.
رفضت تسكت وفضلت تقول اني ورطته في الطفل وأني قاعده في البيت مرتاحه وبخلي جوزي يشتغل كتير جدًا علشان يقدر يكفي العيشه المرفهه اللي انا عايزاها (ده مش حقيقي)، وأن المفروض جوزي يجبرني اتخل*ص من البيبي.
جوزي انفجر فيها وقالها ممنوع تدخل بيتنا تاني غير لما تعتذر لي عن تصرفاتها وكلامها عني وانه مش عارف ازاي هيسامحها خصوصًا بعد كلامها عن البيبي وازاي هي بتفكر في ابننا كده!!
اعتذرت وقعدت تعيط وتقول لأخوها انها كانت خايفه تخسره ومش بتفكر صح . جوزي قفل السكه في وشها.
من وقتها وهي بتبعت رسايل وبتتحايل علي جوزي يصالحها ويرد عليها وهو مش عايز يرد.
جوزي سألني ليه ماتكلمتش معاه بصراحه من الأول ؟
قولتله علشان عارفه انك بتحب أختك قوي ومش بتقبل عليها ولا كلمه.
قعد ينكر ويدافع عن نفسه شويه وفي الآخر اعترف انه فعلًا حساس من ناحيتها . بس وعدني أنه هيكون أحسن وبعد كده ممكن نتكلم مع بعض في كل حاجه بصراحه.
جوزي طلب نروح لأستشاره الازواج . قالي أن مفيش أي حاجه غلط في جوازنا بس هو عايز يروح علشان مايحصلش مشاكل في المستقبل.
قالي انه متأكد ان أخته هتيجي تاني ومش هتبعد عنه . بس وعدني انه مش هيسمح لها تزعلني ولا تضايقني تاني ابدًا ❤️❤️
