مصاريف الدراسة 📚💰
أنا وطليقي انفصلنا من أكتر من عشرين سنة. لما ابننا كان لسه طفل صغير، وقتها هو اتعرف علي واحدة تانية وسابني ومشي.
أنا مكنتش بشتغل. كنت بربي ابني، وبدرس تمريض في الجامعة.
وهو اللي كان بيدفع مصاريف دراستي.
بعد ما سابني، سألته لو ممكن يكمل دفع مصاريف الجامعة علشان أقدر أخلص من غير ما أغرق في الديون؟ وافق، وقال إن دي أقل حاجة يقدر يعملها لي.
بعدها بكام شهر، عرفت انه مستني طفل تاني من الست التانية “خلينا نسميها جيسيكا”
جيسيكا طلبت منه يوقف دفع مصاريف دراستي. لأن للبيبي الجديد أولي بالفلوس دي.
هو رفض، ودفع لي مصاريف السنة ونص اللي كانوا فاضلين.
الحمد لله كملت تعليمي، ودلوقتي أنا بشتغل “ممرضة متخصصة”.
ووضعي المادي كويس قوي، وعمرى ما اتجوزت تاني.
نيجي بقى للمشكلة…
ابني كلمني وقاللي إن مراته حامل 👶 كنت مبسوطة جدًا بالخبر ده.
وسألته لو ممكن أعدي عليهم في الاجازه علشان اجيبلهم شوية حاجات: (الدبدوب اللي كان بيحبه وهو صغير، شيك، وكام حاجة صغيرة ليها قيمة عاطفية).
قاللي أه طبعا تعالي.
عديت عليه وجبتله الحاجات دي، وكمان اديته شيك بمبلغ كبير 💸
ابني ومراته شكروني وقالولي إن الفلوس دي هتساعدهم جدًا 🙏
طليقي ومراته جم بعدي بشوية (هما كانوا عاملين لابني ومراته مفاجأه وجم من غير ميعاد، ومكانوش عارفين إني هناك).
الشيك كان على الرخامة. وهما شافوه.
مرات طليقي سألت عن الشيك، فقولتلها:
آه، أنا حابة أساعد ابني، لأن كل حاجة بقت غالية أوي اليومين دول!
كنت بحاول أكون لطيفة معاها، مع اني بصراحة شايفة إن ملهاش حق تدخل.
الست دي جريئة قوي. فجأه قالتلي:
طيب ما دام معاكي فلوس كده، مش هتدفعي بقى الفلوس اللي اخدتيها لما كنتي في الكلية؟ 😳
أنا اتصدمت…طليقي اصلا عمره ما طلب مني أرجعله الفلوس،بالعكس، دايمًا كان بيقول إن ده أقل حاجة ممكن يعملها علشاني وعلشان ابننا.
طليقي ناجح جدًا في شغله، وأنا متأكده انهم مش محتاجين الفلوس دي.
سألتهم: هو انتو محتاجين الفلوس ولا حاجة؟🤨
طليقي قال لأ، وهي قالت: طبعًا لأ، بس ده حقنا!
قولتلها بمنتهى الوضوح: أنا مستحيل أدفع فلوس بقالها أكتر من عشرين سنة، خصوصًا وإنتي في الآخر اخدتي بيت الزوجية بتاعي، وأنا كنت ساكنة في شقة صغيرة قوي وكانت حالتي المادية صعبة جدًا.
علي فكرة أنا عمري ما كنت حقودة ولا اتعاملت معاهم بأسلوب وحش، ودايمًا كنت محترمة علشان أولادنا إخوات، بس دمي كان بيغلي من كلامها
ومشيت بعد الموقف ده على طول.
بعدها ابني قالي، انها مش أول مره تتكلم في الموضوع ده. هي اتكلمت فيه كذا مرة قدامه، وهي وطليقي اتخانقوا كتير بسبب الحكاية دي.
دلوقتي هي مصممة إن ابني لازم يقنعني إني “أرجعلهم حقهم” 💸
اللي مضايقني دلوقتي إن العيلة ادخلت في الموضوع 😤
جالي تلات تليفونات من ناس مختلفة في العيلة بيقولولي إني لازم أبطل عناد وأرجع الفلوس.
تفتكروا أنا فعلاً غلطانة والمفروض ارجع الفلوس؟
✨ تحديث:
أنا حابة أوضح شوية حاجات قبل ما أحكي التحديث :
أيوه البيت اللي كانت عايشة فيه هي وطليقي كان”بيت جوازنا”، اشتريناه سوا بعد الجواز.
أنا ماتمسكتش أوي بالبيت وقت الطلاق لأنها كانت مصممة إن “عيلتهم بتكبر” وعايزين البيت.
كمان كنت عايزة الطلاق يخلص بسرعة ومن غير وجع دماغ، وكنت عارفة إن الموضوع هيطول قوي لو قعدنا نتخانق علي البيت.
هو اشترى نصيبي في البيت، بس ساعتها المبلغ مكانش كبير، ومعظمه راح في ديون الكريدت كارد.
هو لما كان بيدفعلي مصاريف دراستي كنا لسه “متجوزين رسمي”، الطلاق ماتمش غير بعد ما اتخرجت.
كمان مأخدتش منه نفقة ولا أي حاجة تانية.
أنا كنت ساكنة في البيت وقت دراستي، وهم كانوا في شقة تانية.
الناس اللي كلموني وقالولي أدفع “ديني” مش أهلي، دول أهل مراته وأهل طليقي، اللي كنت بحسبهم عيلتي. بس كلهم اتعملهم بلوك دلوقتي ✅
نيجي بقى للتحديث…
رجعت من الشغل لقيت مكالمات كتير من ابني.
اتصلت بيه قالي إن “مرات أبوه” طلبت منه الشيك اللي أخده مني هو ومراته، بحجة إنه نفس المبلغ تقريبًا اللي اتصرف على دراستي! 😡
وقالت إنها عارفة إني مش هادفع الدين اللي عليا، يبقي لازم تاخد منه الشيك دلوقتي. والمفروض مايقلقش لان هو ابني الوحيد وأنا أكيد هعوضه بفلوس تانية.
أنا اتصدمت واتعصبت، وقلتله يتجاهلها خالص، وأنا هاتصرف.
كلمت طليقي، ماردش.
كلمته تاني… بردو مفيش رد.
اضطريت أكلم مراته، ردت على طول.
قولتلها إننا لازم نقعد أنا وهي وطليقي علشان نتكلم.
فعلاً وافقت، واتقابلنا تاني يوم في كافيه.
أول ما قعدنا قولتلها: مين أداكي الحق تطلبي من ابني فلوسه؟
طليقي بصلها وقال: انتي طلبتي من ابني فلوس؟😳
بدأت تهري وتقول إنها بس عايزة الفلوس بتاعتهم، وإنها ما طلبتش أكتر من حقهم.
وقالت: إحنا اتبهدلنا سنين علشان مصاريف دراستك! ومعرفناش نجيب عربية جديدة، ولا نشتري بيت، ولا حتى نجيب مربية!
أنا مكنتش مصدقة البجاحه اللي هي فيها، وفي الآخر ضحكت!
أنا وقتها كنت مديونة بمبالغ كبيرة علشان أقدر أعيش أنا وابني، وهي كانت عايشة مع جوزي اللي خطفته مني وهو اللي كان بيدفعلها كل حاجة!
طليقي قالها: هو انتي بتهزري؟!
قولتلها: إحنا كنا لسه متجوزين لما دفعلي مصاريف الكلية، وده قرار يخصنا إحنا الاتنين، انتي ملكيش دعوه. انتي أصلاً مكنتش ليكي أي حق في فلوسه غير لما اتجوزتي رسمي، وده حصل بعد سنين من طلاقنا.
من الآخر…اوعي تكلميني أو تكلمي ابني عن الفلوس دي تاني.و عمرك ما هتشوفي مني ولا دولار واحد حتي!”
هي قامت من غير ما ترد، وطليقي قعد شوية وقالي إنه مكانش عارف، وإني لو كنت كلمته كان اتصرف.
قولتله: أنا كلمتك فعلاً مرتين…بعدها عرفنا إن هي كانت عاملالي بلوك من موبايل له!”
طليقي قالي: واضح إنها غيرانة منك جدًا، والناس اللي قالولي كده كان عندهم حق.
قولتله إن هي كلمت أخته، وابن عمه، ومرات أخوه، وكلهم بعتولي رسايل ومكالمات علشان أدفع الفلوس.
وإنها طلبت الفلوس من ابني اللي المفروض يشتري بيها حاجات للبيبي!
طليقي اعتذر، وقاللي إنها مش هتضايقني تاني.
كل واحد مشي في حاله بعد كده.
كمان ابني قالي إنه عمللها بلوك، ومش ناوي يخليها تيجي بيته غير لما تعتذر.
______________
#قصص
#قصص حقيقية
