أنا خلاص أخدت القرار ومستحيل أرجع فيه تاني💪✋
أنا (36 سنة) و جوزي (45 سنة) احنا مع بعض من 6 سنين.
أول ما اتعرفت علي جوزي كنت رياضية ووزني كان كويس جدًا. لكن بدأت أزيد في الوزن بعد ما مريت بتجربة صعبة، فقدت طفلين بسبب الإجهاض، وكمان والدتي توفت. دخلت في حالة اكتئاب شديد، ومبقتش بخرج من السرير إلا لو رايحة الشغل.
بطلت أتمرن، و بدأت آكل وجبات مش صحية. وزني زاد حوالي 18 كيلو في سنتين .
خلال الفترة دي، جوزي كان بيدعمني جدًا وواقف معايا. كنت بحس بالذنب وحاولت أخليه يسيبني. بس هو رفض تماما واتمسك بيا أكتر.
كنت سعيدة قوي عشان جوزي اتمسك بيا ومن فرحتي بدأت اهتم بنفسي وفعلا خسيت حوالي 10 كيلو وشكلي بقة أحسن كتير، وجوزي كان فرحان قوي وهو شايفني بتحسن.
لكن على الكمبيوتر بتاعه، كان فيه مفاجأه تانية خالص!!
اكتشفت إنه من مدة طويلة جدًا بيتكلم عني وحش مع طليقته.
طليقته عندها (46 سنة) هما انفصلوا من حوالي 7 سنين، هي اللي سابتة لكن بعد كده حاولت ترجع له تاني. في الوقت ده كان اتعرف عليا، ورفض يرجعلها بس فضلوا أصدقاء.
هما أغلب الوقت بيتكلموا بالشات والرسائل لأنها عايشة على بُعد 12 ساعة مننا.
جوزي كان بيشتكي لطليقتة من كل حاجة. شغلي، اكتئابي، أكلي، و أكتر حاجة كان بيشتكي منها “وزني”.
كان بيقولها إنه قرفان مني، وإني بشخر زي الكلب. ووصل بيه الحال إنه بعت لها صور ليا وأنا نايمة، مع تعليقات عن بطني، واللغد، و”دهون ضهري”، وحاجات زي كده 😢
طليقتة شايفة أن الصور دي مسلية جدًا، واقترحت عليه يسميّني “الحوت الأبيض”😢 هما الاتنين شايفين الموضوع مضحك، وبقوا ينادوني كده بينهم وبين بعض.
علي فكرة واضح أن مفيش بينهم علاقة رومانسية ولا بيتكلموا إنهم يرجعوا لبعض، لكن بيقولوا إنهم مفتقدين بعض، وبيفتكروا أيام ما كانوا متجوزين.
هي احيانا بتعاكسة شوية، وهو شكلة فرحان بكده.
الغريب أن كلامة معايا عكس كل دة، هو علي طول بيقولي انه بيحبني وتصرفاتة معايا بتدل علي ده فعلا، هو بجد حنين معايا قوي ورومانسي.
أنا متأكده انه مش بيقرف مني ولاحاجة، يا أما بقه هو ممثل بارع!!
ده حتي بيكون عايزني جنبة علي طول.
هو بيكذب علي واحده فينا، الله أعلم أنا ولا هي؟!
أنا خلاص قررت أسيبة وهخلص منه قريب جدا. دلوقتي بمثل قدامة أنا كل حاجة تمام لحد ما ارتب كل أموري وبعدها مش هبص ورايا تاني.
دلوقتي أنا بدور علي وظيفة جديده في مدينة تانية وبدور علي بيت ايجار، وبشوف محامي كويس.
الحاجة الوحيدة اللي مستحيل أعملها اني ارجع لاكتئابي، مش هسمح لده يحصلي تاني. ولا هسيب الحزن يتملك مني ولا لحظه واحدة.
🌿تحديث:
علي فكرة أنا ما كنتش بتجسس على جوزي ولا بحاول أفتش وراه. أنا استخدمت الماك بوك بتاعه عشان أخلص شغل، وبالصدفة اكتشفت كل حاجة.
أنا عمرى ما شكيت فيه قبل كده. لكن بعد ما اكتشفت الموضوع، بقيت أحيانًا أبص على موبايله، كان عندي أمل إن كل ده يكون هزار سخيف وخلاص.
لكن الشكوي مني لسة مستمرة، ده غير انه بيكذب وبيشتكي من حاجات مش حقيقية، يعني بيقول اني عماله اطخن أكتر، وده مش حقيقي أنا خسيت، كمان قال نكتة سخيفة “انه كان قاعد يدور عليا ومش لاقيني أكيد كنت مستخبيه تحت كام كيلو من الدهون”. وطبعا عجبتها النكتة قوي وشايفة أن جوزي ظريف ودمه خفيف.
لما خلاص أتأكدت مبقتش بفتش وراه. مش عايزه أشوف الكلام ده تاني.
الغريب انه في نفس الوقت، لسة بيمثل دور الزوج الحنين الطيب، كل شوية يسألني لو كنت داخلة في حالة اكتئاب جديدة (لاني بارده معاه وبتجاهله) كل شوية يقولي إنه بيحبني وإنه موجود جنبي علي طول.
عمل كل الحاجات اللي بيعملها دايمًا لما بمر بفترات صعبة:
-بيتصل بيا أنا في الشغل عشان يطمن عليا.
-بيرجع البيت ومعاه أكل جاهز من المطاعم اللي بحبها.
-بيعمل كل التنضيف والغسيل في البيت.
-يجيب لي ورد وشوكولاتة.
-وبيسألني لو عايزة نخرج بالليل نتسوق أو نمشي. (كان دايمًا ياخدني في مشاوير بالليل لما كنت بحس بإحباط واكتئاب شديد).
إزاي في حد ممكن يبقى بوشين كده؟
أختي الكبيرة عايشة في مدينة تانية. قلتلها إني هسيب جوزي وبدأت أدور على شغل في مدينتها. أختي متجوزة وعايشة مع جوزها وبنتها في بيت كبير، وعرضت عليا إني أقعد عندها مؤقتا لحد ما استقر وأدور علي شقة مناسبة.
عملت مقابلات شغل، واتقبلت في وظيفة منهم. الشغل الجديد مش في نفس مجالي، وكمان المرتب أقل بكتير من المرتب اللي باخده في شركتي. بس أنا هقبل الشغل مؤقتا لحد ما ادور علي حاجة أحسن.
بصراحة مش عايزه أفضل معاه أكتر من كده.
سيبتة يوم الاحد.
حضرتله عشاء لطيف، ولبست أحلي حاجة عندي، قعدت أضحك في سري وهو بيقولي أد ايه هو بيحبني وانه محظوظ عشان أنا موجودة في حياته.
الصبح أخدت كل حاجتي ومشيت، وسيبتله علي الترابيزه ورق الطلاق ورقم المحامية.
رحت لأختي وحكيتلها هي وكل العيله علي اللي جوزي بيعمله. وكلهم غضبانين منه جدا.
قعد يتصل بيا مليون مره، وطبعا مش برد عليه.
هو مش عارف أنا فين عشان كده راح ل بابا.
بابا طرده وقال له مش عايز أشوف خلقتك تاني، قعد يعتذر ويقول أدوني فرصة اوضح (شكلة فهم أني شوفت الرسايل).
أخر حاجة بعتهاله رسالة مكتوب فيها “مش هتواصل معاكي تاني ابدا الا عن طريق المحامي”
أنا خلاص أخدت القرار ومستحيل أرجع فيه تاني💪✋
(القصة حقيقية مترجمة من ريديت أصحاب القصة أجانب).
