زهقت من صاحبة بنتي 😩
أنا راجل (31 سنة) متجوز مراتي أمبر (30 سنة)، وعندنا بنت اسمها إيما (7 سنين).
أعزّ صاحبة ل مراتي، جينيفر (30 سنة)، عندها بنت برضه، اسمها هاربر (7 سنين).
المشكلة بقى في أبو هاربر، هو راجل كسلان جدًا، وما بيعملش أي حاجة لبنته. هو بيتفاخر إنه عمره ما غيّر لها حفّاضة حتى 😒
“جينيفر وبنتها هاربر” عادة بيبقوا في بيتنا في الويك إند، عشان أبو هاربر بيحب يتفرج على ماتشات الكره اليوم ده ومش عايز دوشة.
أنا بحب أخصص يوم السبت لبنتي عشان ما بشوفهاش كتير طول الأسبوع. وبما إن هاربر بتبقى موجودة كل سبت، يبقي أي حاجة بعملها مع إيما لازم أعملها مع هاربر كمان.
لو أخدت إيما حديقة الحيوانات، يبقى إيما لازم تيجي معانا، أنا اللي بوديهم الاتنين كلاس الرقص، علمتهم الاتنين إزاي يركبوا عجل، بتيجي معانا الملاهي، وهكذا بقى.
في يوم عيد الأم بصراحة جبت آخري.
يوم السبت الصبح وديت إيما وهاربر كلاس الرقص (وأنا ومراتي اللي بندفع للبنتين، لأن أبو هاربر مش ناوي يتحرك).واحنا راجعين للبيت، إيما طلبت نشتري حاجة لمامتها بمناسبة عيد الأم، قلتلها ماشي.
في الآخر اضطررت أشتري هدية لهاربر كمان عشان تديها لمامتها.
وأنا راجع البيت كنت بفكر… أنا ليه بشتري هدية عيد الأم لمرات حد تاني؟ هو أنا مالي اصلا! 😤
بعد كام يوم (عشان ما كنتش عايز أتعارك مع مراتي في عيد الأم)، قلت لمراتي إني تعبت من تربية هاربر، وإن أبوها هو اللي لازم يشيل مسؤوليتها.
قلتلها بصراحة إنا زهقت وعايز أقضي وقت مع إيما لوحدنا.
ردت عليّا وقالت إن جينيفر صاحبتها المقربة ولازم نبقى جنب هاربر.
دلوقتي، مراتي زعلانة مني ومش بتكلمني. فهل أنا غلطان؟
🌿توضيح:
أنا اللي بدفع للبنت كل حاجة لأن باباها بيرفض يدفع ومامتها مش معاها فلوس كتير.
مراتي وصاحبتها بيهتموا بالبنات يومين في الأسبوع. وأنا فاضي يوم السبت عشان كده بحب أقضيه من بنتي. وفي نفس الوقت نسيب مراتي ترتاح اليوم ده.
🌿تحديث:
أنا ومراتي اتصالحنا.
في حاجات حصلت أنا مكنتش عارفها وقتها.
جنيفر كانت صابرة علي جوزها، لأن عيلتها مش بتحب الطلاق وكانوا بيقولوها خلي البنت تتربي في وسط باباها ومامتها أحسن.
لما عرفت ان البنت طلبت هدية عيد الام مني أنا مش من باباها، الموضوع ده أثر فيها جدًا وحست أن البنت مش بتعتبره اصلا باباها، وقتها قررت تسيب جوزها.
هي اتكلمت مع مراتي وطلبت مساعدتها عشان مش معاها فلوس وعيلتها عايشين بعيد عنها. وفي نفس الوقت ده انا اتكلمت مع مراتي وقولتلها أني زهقت عشان كده مراتي اتخانقت معايا.
السبت اللي بعده جينيفر ماجتش عندنا، وفي اليوم ده مراتي طلبت مني اسمح لصاحبتها تعيش معانا لفتره لحد متظبط أمورها.
أنا وافقت لأن مشكلتي من الأول مش مع جينيفر، أنا كنت مضايق من جوزها وانه رامي مسؤلية بنته عليا.
بنتي لما عرفت أن صاحبتها هتعيش معانا لفتره كانت فرحانة قوي.
أصحابنا ساعدونا ونقلنا كل أغراضهم للبيت عندنا.
أحنا عندنا 4 أوض فكل واحد فينا عنده أوضة لوحده (مراتي بس نقلت مكتبها للطابق اللي تحت).
هنشوف ايه اللي هيحصل بعدين.
🌿 تحديث بعد سنة:
جينيفر وهاربر لسه عايشين معانا.
زي ما قلت قبل كده، جينيفر ما بتكسبش فلوس كتير، لأنها بتشتغل فنيّة في الصحة. الخبر الحلو إن بسبب نقص الممرضين دلوقتي، ف شغلها بيدفع للموظفين مصاريف لدراسة التمريض. وهي بدأت تدرس.
(الدراسة مدتها سنة و نص).
الاتفاق دلوقتي هو إنها لما تتخرج، هتمشي من عندنا..
أما بالنسبة للطلاق من أبو هاربر الكسلان، فهو لسه مستمر. أول ما عرف إنه هيضطر يدفع نفقة لبنته، عمال يعمل طرق ملتوية عشان يتهرب. ومش عارفين الطلاق ده هيخلص إمتى.
مراتي فرحانة أن صاحبتها معاها، بس عشان أحنا بقينا 5 أشخاص بدل 3 وهي بشتغل من البيت، فالمسؤلية زادت عليها قوي.
أنا لسه بخرج البنات كل سبت. وبستمتع بالوقت اللي بقضيه معاهم.
دلوقتي أنا عارف هما ناويين يمشوا من عندنا امتي وده ريحني وشال من عليا الضغط. وكمان مرتاح إني ما بشوفش أبو هاربر الكسلان.
كمان بقيت أحاول أخصص ليّا كام ساعة في الشهر عشان أقضي وقت لنفسي وأعمل الهوايات اللي بحبها.
بصراحة الوضع هيكون أحسن لما جينيفر تبدأ شغلها كممرضة أو تاخد نفقة عشان أنا وأمبر نبطل ندفع مصاريف كتير كده 🙃
لكل الناس اللي قالوا إن جينيفر هتبقى زي “الزوجة التانية”، أو إني هخون مراتي معاها، أو إنها هتخرب جوازي عن عمد، أو أي خيالات غريبة عندكم… أحب أقولكم إن ولا أي حاجة من ده حصلت 😅
(القصة حقيقية مترجمة من ريديت..أصحاب القصة أجانب).
