باب الحمام🚪
أنا وجوزي متجوزين من 5 سنين (هو مش أبو بنتي).
أقدر أقول إن العلاقة بين جوزي و بنتي (عندها 19 سنة) علاقة عادية، يعني مش زي علاقة أب وبنته قوي، هو بس بيديها نصايح لما هي بتسأله.
عمري ما حسيت بأي حاجة غريبة من جوزي تجاه بنتي، وكمان بنتي عمرها ما قالت أو لمّحت لأي حاجة.
يوم الخميس، كنت أنا وجوزي بنتفرج على فيلم في غرفة المعيشة. وقفنا الفيلم لما جوزي قام علشان يدخل الحمام.
سمعت صوت خبط على باب الحمام (مرتين)، حرفيًا 3 خبطات في كل مرة. الصوت كان عالي لدرجة إني سمعته بوضوح من غرفة المعيشة. في اللحظة اللي بعدها سمعت صوت صريخ.
جريت على الحمام وشوفت بنتي بتصرخ في جوزي و بتطلب منه يخرج. ما شفتش كل اللي حصل، لكن اللي شفته بعد ما سمعت الصريخ إن جوزي حرفيًا وقع (اتكعبل) وهو بيحاول يقفل باب الحمام.
سألت جوزي إيه اللي حصل، وقال إنه خبط على الباب ومحدش رد، فدخل ولقى بنتي واقفة قدام المراية ، وحاول يخرج بسرعة.
لما بنتي هديت، سألتها عن اللي حصل من وجهة نظرها، وقالت إنها كانت بتغير وفجأة جوزي دخل الحمام.
سألتها ليه ما ردتش عليه لما خبط، فقالت إنه ما خبطش.
قلتلها أنا سمعته خبط، ومتأكدة إنه عمل كده. ردت إنها ما سمعتش الخبط لأنها كانت لابسة السماعات وبتسمع أغاني.
حلينا الموضوع، وجوزي اعتذر لها وشرح إنه كان فاكر الحمام فاضي فدخل. هي كمان اعتذرتله على الصريخ.
المشكلة دلوقتي إن بنتي دخلت ناس من العيلة في الموضوع، ودلوقتي بيقولوا على جوزي إنه شخص مش كويس!!
جالي مكالمة من أختي بتزعق لي علشان لسه مخلياه في البيت!!
لما سألتها تقصد إيه؟ اكتشفت إن بنتي لفقت حكاية مختلفة تمامًا وما قالتش إنها كانت لابسة السماعات وبتسمع أغاني.
هي بتقول لكل الناس إنها “ردت عليه” وإنه برضه دخل الحمام وهو عارف انها جوه!
احنا عندنا كاميرات في الطرقة، والفيديو باين فيه إن جوزي خبط على الباب، بس الكاميرات من غير صوت.
قعدت مع بنتي وسألتها عن الموضوع، وهي أنكرت إنها قالت حاجة زي كده أو إنها حكت لحد.
اتعصبت وسألتها طيب إزاي خالتك عرفت اللي حصل؟ سكتت شوية، و بعدين قالت إنها كانت بتتكلم مع بنت خالتها عن الموضوع، وممكن تكون هي اللي حكت لوالدتها.
سألتها ليه كذبت وخلت جوزي يبان إنه عمل حاجة غلط وهو مش غلطان؟
أنكرت إنها كذبت.
قلت لها علي اللي أختي قالته.
بدأت تعيط وتقول “آسفة”. واعترفت إنها كانت بتتكلم مع بنت خالتها وبتألف سيناريوهات وهي بتحكي.
طول اليوم بيجيلي مكالمات ورسايل من كل العيله (القصة اتعرفت في العيلة كلها) وكلهم بيشتموا في جوزي وبيقولوه عليه أسوأ كلام!!
وريت لبنتي الرسايل وقولتلها دافعي عنه وقولي الحقيقة…حرام عليكي انتي عارفة انه بريء.
رفضت وقالتلي ان شكلها هيبقي وحش قدام العيلة وان اللي حصل ده مش غلطتها. بنت خالتها هي السبب. وانها مسألة وقت بس وكل الناس هتنسي!!!
اللي زود المشكلة أكتر لما لاقيت جوزي بيلم حاجاتة وقالي انه هيسيب البيت وهيروح يعيش مع أهلة الفترة دي لانه مش متحمل الموقف اللي هو فيه..و أد ايه صعب عليه اللي بيحصل ده.
قولت لبنتي لو جوازي اتدمر بسببها أنا مش هسمحلها تعيش معايا تاني. وقلتلها أحسنلها تصلح اللي عملته وتقول للناس الحقيقة لأني مش هخسر راجل بيحبني وبيهتم بيا بسبب كدب.
طلبت مني أساعدها، قلتلها لأ، لأنها مش طفلة، وكدبها علشان تلفت الانتباه هو اللي وصلنا لكده، هي المسؤولة وهي اللي لازم تصلح اللي حصل.
أنا حاولت فعلا ادافع عنه علي أد ما اقدر، محدش عايز يصدقني ودلوقتي بقيت كمان متهمة إني واقفة في صف جوزي ضد بنتي.
مش عارفة أعمل ايه…ساعدوني.
🌸 تحديث:
جوزي مصمم علي الانفصال.
رجع البيت ووراني الرسايل اللي بتجيله والاتهامات الفظيعة اللي أهلي بيتهموهاله… قالي واضح انهم مش بيحبوني من الأول ومصدقوا مسكوا عليه حاجه علشان يتخلصوا منه.
قالي أن الموضوع وصل لشغلة.. والموارد البشرية عملت معاه اجتماع لأن حد من عيلتي بلغ عنه في الشغل!!
لحسن الحظ شغله متأثرش لان مفيش أي دليل ضده. وميقدروش ياخدوا أي اجراء ضده من غير ما يكون فيه قضيه في المحكمة.
قالي انه بيحبني قوي بس صعب يكمل بعد كل اللي حصل..بس هو فرحان علشان أنا وقفت جنبه ودافعت عنه.
قالي انه عايش دلوقتي في رعب ومستني البوليس يجي يعتقلة في أي وقت من البيت أو من الشغل…..وانه صعب ينسي اللي حصل ده كله..ومش عارف حتي هيتعافي منه ازاي.
طلبت منه نروح استشاره ازواج. وقولتله اني بنتي هتدافع عنه وتبرأه قدام كل العيلة. وانا خلاص هطلب منها تسيب البيت .
قالي خلاص محدش هيصدقها وهيفتكروا اننا اجبرناها تقول كده وهيفضل الشخص السيء في نظرهم للابد. وقال انه مش عايزني أتخلي عن بنتي.
قالي خلاص ده قراره النهائي.
بنتي دخلت علينا الاوضة وهي بتبكي (غالبا كانت بتتصنت علينا)
طلبت من جوزي إنه يسامحها، وقالت إنها ما كانتش تقصد الأمور توصل للدرجة دي، وإنها كانت بس بتألف سيناريوهات مع بنت خالتها، وإن بنت خالتها هي اللي كبرت الموضوع.
جوزي سألها ليه ما وضحتش الحقيقة على طول من الأول؟
ردت وقالت إنها ما كانتش متخيلة إن الموضوع هيكبر كده، وكانت فاكرة إنه هيعدي لأن كل الناس عارفاه كويس.
جوزي ورّاها تليفونه وطلب منها تقرأ شوية من الرسائل اللي وصلته، وساعتها بنتي سكتت تمامًا وما عرفت تقول حاجة.
اتكلمنا لمدة 4 ساعات، وفي النهاية جوزي قال إنه هيدينا 3 شهور علشان نخرج من البيت (لأنه بيته) . قال إن بنتي تقدر تحتفظ بالعربية لأنها كانت هدية، وإنه هيكمل دفع مصاريف الجامعة السنة دي، لكن مش هيدفع حاجة بعد كده.
قال إنه لسه ما جابش محامي، وإنه يفضل نخلص الموضوع من غير محامين، لكن لو حبيت أجيب محامي فده قراري.
هو أكد إنه هيكون عادل في إجراءات الطلاق وما عندوش أي غضب من ناحيتي، بس مش قادر يكمل في العلاقة دي.
بنتي كانت بتسمع كل ده وهي مذهولة..وأنا كمان مش قادرة اصدق ان بعد 5 سنين كل حاجه تتنهي بالسهولة دي وكأن جوزي اشتري حاجة من السوبر ماركت وبيرجعها بمنتهي البساطة!!!
جوزي مشي وساب البيت…قعدت مصدومة وحسة ان كل حياتي بتنهار وكل اللي كنت سامعاه صوت بنتي وهي عماله تبكي ومنهارة وعماله تردد كلمة آسفة، آسفة، آسفة.
لما قدرت اخيرا اقوم واتحرك اكتشفت ان جوزي لسة واقف قدام البيت في العربية وكان بيبكي. قلبي اتكسر أكتر لما شوفته.
من وقتها وأنا رافضة اتكلم مع بنتي. لغايه يوم الجمعة لما لقيت ناس من العيلة جايين يعتذروا .
واضح ان بنتي سجلت فيديو واعترفت بالحقيقة وبعتته لكل العيلة.
رفضت اعتذارهم ومش عايزه اسمع منهم أي حاجه. وعملت بلوك لكل حساباتهم.
انا مش عايزه اخسر جوزي هو الراجل الوحيد اللي كان لطيف ومحترم معايه.
حاولت اتكلم معاه رافض يرد عليا.
روحتله بيت أهلة رفض يقابلني.
حتي روحتله الشغل.. قالولي انه مش موجود.
مش قادرة أصدق اني بجد خسرته…
(القصة حقيقية مترجمة من ريديت)
#قصص حقيقية
#قصص قبل النوم
