البنت اللي جوزي بيدربها ⚖️👨⚖️
جوزي بيشتغل في مكتب محاماة، ومن فترة بدأ يدرب موظفة جديدة لسة متخرجة.
هو بيحكيلي كل حاجة بتحصل في شغله لأنه دايمًا صريح معايا، وسألني إذا ممكن نعزم البنت دي على العشا علشان تتعرف على العيلة؟ قلتله آه طبعًا
هو عزم ناس كام مرة قبل كده، وعزم شباب وبنات لسة متخرجين، وكانت السهرات بتبقي لطيفة وممتعة.
اتفقنا على الميعاد، ولما جه اليوم شفت البنت.
أول حاجة، كانت جميلة جدًا… يعني جمال يخطف الأنفاس. تاني حاجة، عرفت إنها متخرجة من هارفارد وباباها عضو في مجلس الشيوخ. كانت مؤدبة جدًا وفرحانة إنها قابلتني، لكن كل ما السهرة كانت بتطول، كل ما كنت بحس بعدم الأمان والغيرة أكتر وأكتر.
كانت مش بتوقف كلام عن جوزي، وقد إيه هي اتعلمت منه، وقد إيه هو رائع، بصراحة دي الحقيقة أنا بحس بالفخر بجوزي.
بس كمان قالت حاجات زي إنها دلوقتي فاهمة.”ليه الناس بتقول دايمًا إن وراء كل راجل عظيم امراه عظيمة”، وإن جوزي دايمًا بيتكلم عني كلام حلو، وإن شكلي في الحقيقة أحلى كمان من الصور اللي هو وريهالها.
في نهاية السهرة، قالت إننا “ناس راقيين جدًا” وإنها حابة نتقابل تاني.
بقالي كام يوم قاعدة بفكر في الموضوع ده مش عارفة ليه.
أول حاجة، حاسة بالغيرة. مش لأن عندي شك في جوزي، أنا واثقة فيه تمامًا. بس لاحظت إنها بتبص لجوزي بطريقة مش عارفة أوصفها، نظرة في رأيي بتدل علي الأعجاب.
البنت عندها عيون لونها أزرق تلج، ونظرتها كانت قوية لدرجة خلتني أحس اني مش مرتاحة.
مش عارفة أفسر اللي حاسة بيه.
جوزي لاحظ إني مش على طبيعتي وسألني مالك، بس طمنته وقلتله إني مرهقة بس شوية اليومين دول.
كنت فاكرة إن الإحساس ده هيعدي، بس للأسف لسه موجود، وبقى واضح إني محتاجة أتكلم مع جوزي في الموضوع.
يا رب ما أبانش إني مجنونة أو شكاكة…
🌹تحديث
حبيت أقولكم إيه اللي حصل معايا. طلع إن جوزي والبنت دي كانوا فعلًا على علاقة وإحنا بنطلق.
لااااا بهزر بس، آسفة! 😂
الحقيقة بعد ما قريت الردود اللي جاتلي أكتر من مرة، فكرت في كل حاجة، وقررت أنا هعمل ايه.
ما اتكلمتش مع جوزي في الموضوع، لكن قررت آخد شوية وقت علشان أهتم بنفسي. رجعت أمارس اليوجا وأرسم تاني، وفكرت كويس في الخطوة اللي جاية.
وصلت في الآخر إن المشكلة كانت في دماغي بس، ويمكن حسيت كده لأني ما كنتش مهتمة بجوزي قوي الفترة الأخيره.
بدأت أركز أكتر وأحط مجهود إضافي، بقيت أشارك في تفاصيل يومه أكتر، أخرج معاه على عشا في مطعم، وأطلع معاه في رحلات المشي اللي بيحبها (وده فرحة جدا).
كمان اهتميت بنفسي شوية، غيرت تسريحة شعري ولونه، وحسيت بتغيير إيجابي. وكمان جبت هدوم جديدة. جوزي حرفيًا كان مبهور لما شافني، وكان ممتن جدًا، وده بصراحة خلاني فرحانة وزود ثقتي في نفسي.
مع إني ما قلتش أي حاجة، لكن حاسة إنه أخد باله من إحساسي، لأنه كام مرة كده من غير أي مناسبة قالي قد إيه هو بيحبني، وإن أنا أهم حاجة في حياته… حسيت أني مرتاحة وفرحت لما طمنّي بالشكل ده. 💕
يعني الحمد لله كل حاجة تمام.
أما بالنسبة للبنت اللي هو بيدربها…
الناس اللي قالوا إنها “بتطبل” لأنها من عيلة سياسية وشافت والدها بيعمل كده، كان عندهم حق. اتعزمنا على العشا عندهم، وفعلاً أهلها طلعوا زيها بالضبط، كل كلامهم مجاملات وكلام حلو عننا وعن جوزي، وقد إيه هو شخص رائع معاها، وهكذا.
فآه، الموضوع طلع سياسة وشغل. جوزي اعترف لي إنه “بيكسب ود” والدها من خلال علاقته بالبنت، لأن ده ممكن يبقى فرصة كبيرة في شغله علشان يكبر في مسيرته المهنية.
الأمور دلوقتي هادية بيني وبين البنت.
هي جات عندنا على العشا مرة تانية، والمرة دي كنت واثقة في نفسي ومطمنة لدرجة إني استمتعت بوجودها، واكتشفت إنها شابة موهوبة جدًا وذكية، وواضح إنها ليها مستقبل كبير .
بصراحة، لسه عندي شوية غيرة ناحيتها، لكن بقيت أستخدمها كدافع لتحسين نفسي.
عندي خطط كبيرة لتطوير حياتي ويمكن كمان أغير الكارير بتاعي، وأنا متأكدة إن جوزي هيكون مبسوط جدًا بالفكرة. 🚀✨
(القصة حقيقية مترجمة من ريديت)
