مقلب الهالوين 🎃👻
أنا عمري 30 سنة وجوزي عمره 35 سنة.
إحنا مع بعض من 5 سنين.
جوزي اتربى في ظروف صعبة جدًا، في واحدة من أسوأ المناطق في البلد. وكان متورط بشكل كبير في الجر/*ايم وكان بيتعامل بع/*نف على طول.
بقاله تقريبًا 10 سنين بيشارك في برامج إعادة تأهيل، وبيساعد المراهقين اللي مروا بظروف شبه اللي هو مر بيها، وفعلاً جوزي قدر يغيّر حياته تمامًا.
من وقت ما عرفته، عمره ما كان عن/*يف أو خطير بأي شكل، مع إنه أحيانًا بيجيلة توتر بسبب صدمات حصلتله في الماضي.
في الهالوين، فكرت أهزر معاه لما يرجع من شغلة (كان راجع من شيفت متأخر)، أنا في العادي بكون نايمة في الوقت ده.
استخبيت ورا ستارة الدش وأنا لابسة لبس تنكري كان علي شكل (عارفين الحرامي اللي لابس قناع أسود وبينزل من السقف علشان يسرق ألماسة زي الأفلام). أنا لبست كده اسود في اسود.
أنا طويلة واللبس ده خلاني أبان ضخمة شوية. هو دخل بهدوء، ولما دخل الحمام، فجأة طلعت له من ورا الستارة.
قبل ما أقدر أفتح بقي واتكلم علشان أقول له إن ده هزار، هجم عليا. الهجوم كان عنيف، وما قدرتش أقول له أنا مين لأن كان ماسك رقبتي، وإيديّ كانت تحت جسمي جوه البانيو.
كان بيصرخ باسمي وبيقول لي أجري، وبدأ يهددني تهديدات صعبة جدا، كان بيقول هو ناوي يعمل إيه لما “مراته تخرج”، وبيقول بصراحة إنه ناوي يقت/*لني وهو لسه بيكمل الهجوم وبيصرخ باسمي علشان اهرب من البيت.
الموقف ما خلصش غير لما الماسك اتشد شوية وشعري المصبوغ بان من فتحة العينين، ولما شاف ده شال الماسك واكتشف إنها أنا.
قضى باقي الليل في حالة انهيار وماكنش فيه أي طريقة تهديه، وكنت مضطرة أمنعه بكل الطرق من إنه يتصل بالشرطة عشان يبلغ عن نفسه، أو ياخدني المستشفى، أو حتى يكلم أصحابي وأهلي، لأن كنت عارفة إن مهما حاولت أشرح وادافع عنه هيتقبض عليه في الآخر.
أنا بلوم نفسي تمامًا على اللي حصل، أنا عارفة كويس ماضيه، وعارفة إنه بيعاني من اضطراب ما بعد الصدمة (PTSD)، ومع ذلك عملت المقلب ده من غير ما أفكر هو هيحس بأيه.
هو طبيعي يتصرف كده علشان يحميني. بس أنا كنت مرعوبة.
العنف اللي حصل في هجومه، والتهديدات، والغضب اللي طلع منه خلاني أدرك قد إيه فيه حاجات لسه مستخبية جواه ممكن تظهر وقت اللزوم.
أنا فاهمة إنه كان بيواجه حاجة كان فاكرها صعبة جدا.
جوزي طول الوقت اللي عرفته فيه كان زي الدبدوب الطيب معايا ومع كل الناس، لكن اللي حصل خلاني أشوف جانب ماكنتش متخيلة إني ممكن أشوفه.
هو عمال يلوم نفسه، وعيط أكتر من مره من وقت الهالوين، وكل شوية يعتذر ويترجاني أسيبه، مع إني ما عنديش أي نية أو رغبة إني أعمل كده.
وشي دلوقتي شكله كأن حد حطني في مفرمة اللحم، ومش قادرة أروح الشغل أو أواجه أهلي بالشكل ده، بصراحة خايفة ومش متأكدة إنهم هيصدقوا الحقيقة أصلاً.
احنا الاتنين عايزين نعدي الكابوس ده ونكمل حياتنا. من فضلك، ماتنصحنيش أسيبه، لأنه راجل رائع ورد فعله كان طبيعي على فكرة……الحقيقة هو كان هزار سخيف مني.
إيه الخطوات اللي ممكن نعملها عشان نقرب من بعض تاني، ونعدي الموضوع ده، ونفضل نحب وندعم بعض لغايه ما اخف وكل ده يعدي؟
إيه اللي ممكن أعمله عشان أساعده يخفف إحساسه بالذنب، وفي نفس الوقت أفكر نفسي إنه لسه الراجل الرائع اللي اتجوزته، مش الشخص اللي شوفته في الليلة دي؟
أي نصيحة هتكون مفيده (علي فكرة إحنا الاتنين عندنا معالج نفسي).
(القصة حقيقية مترجمة من ريديت)
#قصة حقيقية
#قصة
