هل من حقهم يجبروني أروح المعسكر 🤔
🌿25/05/2018
أنا ولد عندي 14 سنة، وعايش في نيويورك مع ماما وجوزها.
بابا مات قبل ما أتولد، وكبرت لوحدي مع ماما لحد ما كان عندي 10 سنين وقتها ماما اتعرفت عليه. هما اتجوزوا من حوالي سنتين.
أنا مش بكرهه، وهو كمان مش بيكرهني. بالعكس أنا مبسوط إنه اتعرف على ماما لأنها كانت وحيدة جدًا، هو بيخليها سعيدة والحقيقة هو شخص طيب جدًا.
إحنا كنا فقرا قوي وهو راجل أعمال عنده فلوس كتير، وبيقدر يهتم بماما علشان ما تتعبش نفسها زيادة.
جوز ماما عمره ما دخل في خناقة معايا، لكن الجو بينا في البيت بيكون فيه احراج شوية رغم إن كل واحد فينا بيحاول يكون لطيف مع التاني.
أنا تخين جدًا، جدًا. ودايماً كنت كده. السنة اللي فاتت كنت أطول واحد في الفصل، وزني كان حوالي 117 كيلو، وعارف إنه وزن كبير. وزني مش مسبب لي أي مشكلة، بالعكس، متقبل إني تخين. الحاجة الوحيدة اللي بتتأثر هي علاقتي مع البنات، بس من وجهة نظري دي طريقة كويسة علشان أعرف مين البنت السطحية ومين لاء.
أنا مش عايز آكل أكل صحي، وبفكر في الأكل كتير. جربت أعمل دايت قبل كده وخلاني تعبان نفسيًا جدًا.
أنا مش كسلان ولا حاجة، بالعكس بشتغل بجد في المدرسة وفي كل حاجة بعملها، وموضوع الوزن ده مش فارق معايا.
ماما مهتمة أكتر مني بموضوع وزني، بس عمرها ما ضغطت عليا بسببه. لكن جوز ماما دايمًا بيجيب سيرة الموضوع، مش بطريقة وحشة، بس دايمًا بيطلب مني أروح الجيم، وبيحاول يشتري أكل صحي بس مش بيشبعني و بحس إنه ممل.
من كام أسبوع رحنا للدكتور، والدكتور قعد يكلمني عن الأكل الصحي وإن لازم أكل أحسن.
النهارده بقا، بعد آخر يوم ليا في المدرسة الترم ده ، ماما وجوزها قعدوا يتكلموا معايا. جابوا سيرة كلام الدكتور وقالولي إنهم قرروا يبعتوني لـ”معسكر صحي”، من أوائل يونيو لحد نص أغسطس. **طول الصيف.**
لما دورت على الموضوع اكتشفت إنه ببساطة معسكر لخسارة الوزن.
طبعًا كنت متضايق جدًا وفضلت أترجّاهم إني ما أروحش، بس قالولي إنهم خلاص دفعوا الفلوس ومفيش نقاش، أنا لازم أروح. 😞
أنا عمري ما بعلي صوتي على أهلي، بس مكنتش قادر أتعامل مع الكلام ده، فقمت سايبهم على طول ودخلت أوضتي وفضلت أعيط. بعدين نزلت تاني وحاولت أتكلم معاهم بهدوء، وسألتهم بكل أدب إذا ممكن ما أروحش، بس قالولي “لا”. لما سألتهم ليه أنا أستاهل عقاب زي ده، قالوا إنه مش عقاب.
فمشيت تاني لأني كنت حاسس إني لو فضلت قاعد كنت هزعق فيهم، وأنا مش عايزة أزعق.
**قانونيًا بقى، ينفع يجبروني أروح؟**
أنا عندي 14 سنة، وده بصراحة سخيف جدًا إنهم ممكن يجبروني. أنا كمان هتم 15 سنة في نص الصيف ده.
أنا لازم أركب طيارة علشان أوصل للمعسكر، ينفع يجبروني قانونيًا إني أركب طيارة؟!
محتاج مساعده……
🌿 أنا كلمت أهلي كذا مرة وحاولت أقنعهم، لكنهم رفضوا يتراجعوا عن قرارهم خالص. فكرت إني أسيب البيت لفترة، بس في الآخر اتراجعت عن القرار ده.
بصراحة، أنا غضبان جدًا منهم دلوقتي. حاسس إنهم ما بيهتموش برأيي خالص، وكأن رأيي ملوش أي قيمة.
المفروض أسافر بكرة بالليل، وأنا مش متحمس خالص، بالعكس حاسس بإحباط شديد وزعلان منهم قوي ازاي مش بيحترموني كده!!
أنا دورت، واكتشفت إنه هيكون سهل إني ما أركبش الطيارة، لكن في نفس الوقت مش عايز أعمل مشكلة كبيرة.
قررت كمان إني مش هعمل مجهود ولا هحاول أخس وأنا هناك، وكنت صريح معاهم بخصوص الموضوع ده.
🌿27/6/2018
أنا لسه في نيويورك
لما ودوني المعسكر، مكنتش بقاوم، لكن كنت واضح جدًا مع أهلي إني مش ناوي أشارك في أي حاجة . هما ما أخدوش كلامي بجدية خالص. ركبت الطيارة عادي، ولما وصلت الأتوبيس اللي بيودّي المعسكر، قلت للمشرفين نفس الكلام. كنت مؤدب جدًا، لكن صريح.
الطريقة اللي قررت أتعامل بيها كانت “المقاومة السلمية”، زي اللي قريته في كتاب عن “الحقوق المدنية”، أنا مش بقول إن وجودي في معسكر زي ده يشبه قضايا حقوق الإنسان، لكن نفس التكتيكات ممكن تشتغل. 🙃
لما وصلت الكابينة بتاعتي، قعدت على السرير ببساطة وقلت لهم بكل احترام إني مش ناوي أشارك في التمارين أو أي نشاط.
المشرفين في الأول حاولوا يقنعوني بلطف، وبعد كده بدأوا يتكلموا معايا بأسلوب حاد أكتر، لكن مفيش حاجة نفعِت معايا. الحقيقة أنا كبير كفاية لدرجة إن محدش يقدر يسحبني من السرير حتى لو حاول. 😌
قررت ما أشاركش في أي حاجة، وفضلت رافض بهدوء وبأدب. ما نزلتش لحضور حفل الافتتاح، ولا التمارين، ولا الاجتماعات، ولا أي نشاط.
لما الأولاد اللي في الكابينة حاولوا يتكلموا معايا أو يقنعوني أنزل، برضه رفضت بهدوء إني أتكلم معاهم. بعد شوية، قالوا لي إني لو ما شاركتش في الأنشطة، مش هاخد وجبة الغداء أو العشاء. لكن رفضت برضه، وأنا كنت متأكد إنهم قانونيًا لازم يأكلوني😏
كنت صح. ماجبوش العشاء الليلة دي ولا الفطار تاني يوم عشان ما نزلتش آكل، لكن حد جاب لي غدا اليوم اللي بعده، رغم إنه كان أكل صحية جدًا ومش لذيذ خالص. وكنت لسه جعان جدًا وزهقان جدًا، لكن فضلت متماسك وبقنع نفسي إني لازم أكمل علشان أخرج بدري وارجع البيت.
الوضع ده استمر 6 أيام، وأنا قاعد طول الوقت على السرير، وهما اللي بيجيبولي الأكل. كنت جايب معايا كتب عشان أقرا، لكن أخدوها مني. مكنش قدامي غير اني اقعد اتخيل حاجات في دماغي. بصراحة، كانت أكتر حاجة مملة عملتها في حياتي 😑
بعد حوالي أسبوع أو ستة أيام (مش متأكد بالضبط)، مدير المعسكر جه وكلمني. حاولت أكون لطيف، بس كنت واضح جدًا معاه إني مش هعمل أي حاجة وعايز أرجع البيت. هو كان بيحاول يقنعني إنّي لازم أخس، بس أنا ما كنتش مهتم.
تاني يوم، المدير كلّم أهلي وخلاني أطلع لأول مرة من المكان اللي كنت فيه عشان أكلمهم في مكتبه.عملنا مكالمة جماعية ، وكلهم كانوا بيحاولوا يقنعوني أشارك و بيترجوني، وحتى بدأوا يضغطوا عليا شوية. لكن برضه، بكل هدوء، رفضت.
قالوا إنهم هيدوني “ثلاث أيام” كمان عشان أفكر في الموضوع.
وقلت لهم إنه مفيش فرق هيحصل، بس عملوا اللي في دماغهم برضه، فاضطريت أقعد تلات أيام كمان وبعدين يوم إضافي وأنا مستني. بعدها كان في اجتماع تاني، واخيرا خرجوني في نفس الليلة وركبت الطيارة و رجعت البيت، هما شافوا إنه مفيش فايدة من وجودي هناك.
كنت فرحان جدًا جدًا إني مش هقضي الصيف كله هناك. أهلي دلوقتي زعلانين منّي ومش بيتكلموا معايا قوي، بس على الأقل أنا في بيتي، ومش مضطر أقضي وقت كمان في المكان ده. وعلى الأقل رجّعوا جزء من الفلوس عشان ما كملتش الفترة كلها.
🌿03/03/2019
من كام شهر، كنت بعاني من حرقة في المعدة، بس الأطباء فهموا الموضوع غلط وافتكروا إنها “نوبة قلبية” (وهي مكنتش كده خالص، كانوا بس بيبالغوا جدًا). من ساعتها، بيخلوني آخد “أدوية”، وأنا مش عايز أعمل كده لأني قرأت عن الآثار الجانبية ومش عايز آخد حاجة على مشكلة أصلاً مش موجودة.
من وقت ما حصلت المشكلة، بطلت آخد الحبوب دي، لكن في الآخر أهلي اكتشفوا، ومن ساعتها واحنا في خناقات كبيرة جدًا. كمان، وصلوا الموضوع لمدرستي (الحكومية)، وبعد ما اتكلموا مع المدير، بقى اللي بيحصل إنّي لما بروح المدرسة الصبح، بيجبروْني أدخل أوضة مع مُرشد وشخص تاني، ويقعدوا يراقبوني وأنا باخد الحبوب اللي “لازم” أبلعها.
لفترة كنت بروح الحمام وأجبر نفسي أرجّع اللي أخدته على طول، بس هم اكتشفوا ده، ودلوقتي لازم أقعد لمدة عشرين دقيقة وأشرب مية بعدها. ولو رفضت، ما بيسمحوش اني أدخل الفصول تاني.
هل اللي بيعملوه ده قانوني…حاولت ادور علي معلومات وملقتش اي اجابة هل ممكن ابلغ عن المدير؟
🌿10/03/2019
أنا جيت هنا قبل كده وقلت إني مش محتاج أخس، وكنت غلطان، آسف جدًا. دلوقتي وزني 124 كيلو.
من يومين صحيت وأنا مخنوق وبلهث مش قادر آخد نفسي. الموضوع حصل قبل كده، بس عمره ما كان بالشدة دي. صحيت وأنا بتخنق، وكان أكتر حاجة مرعبة حصلت لي في حياتي، وفضلت أعيط حوالي عشرين دقيقة.
أنا مستعد للتغيير، بس خايف جدًا وحاسس اني هموت برضه، ومش عارف أعمل إيه.
حاولت أكل أقل النهارده، وده أول مرة أعمل كده من سنين. قدرت أقاوم 70% من اليوم، بس بليل ما قدرتش أكمل خالص. حتى إيديا كانت بترتعش لأني كنت عايز آكل كتير.
دلوقتي بدور علي الدراسات اللي بتتكلم عن الأكل والوزن، وبحاول أفهم معلومات عن البروتين والكربوهيدرات والسعرات الحرارية.
أنا مش عايز أموت…..
🌿25/05/2019
قررت اتغير عشان افقد وزني لاني مرعوب:
عملت 3 حاجات أساسية:
1. **السعرات الحرارية**
كنت بحسب السعرات الحرارية باستخدام تطبيق بيتابع الحاجات اللي ممكن أكلها خلال اليوم.
2. **المياه**
ما كنتش بشرب أي حاجة غير المياه. كانت صعبة جدًا في البداية، بس بعدين اتعودت عليها، وده ساعدني جدًا.
3. **المشي**
كنت بسمع موسيقى وأنا بمشي ساعة كل يوم. في الأول كان صعب جدًا، بس بعدين بقى سهل، وممكن أزود الوقت قريب.
لما بدأت أعمل الحاجات دي، بدأت أخس بسرعة. حسيت بتعب لمدة أسبوع، وبعدين اتحسنت جدًا، ناوي استمر. لأنّي لسه خايف من مشكلة التنفس. هدفي أوصل لـ90 كيلو، وبعدها هشوف الوضع.
بصراحة أنا زعلان قوي أهلي رافضيين يتكلموا معايا خالص من ساعة ما رفضت أخد الادوية. هما بيشترولي الأكل الصحي بس مش راضيين يتواصلوا معايا وده عاملي اكتئاب.
🌿11/10/2022
الحمد لله قدرت أخسر الوزن. حاولت مرتين على مدار حوالي سنة ونص، في الأول خسرت حوالي 18 كيلو، وبعدين 22 كيلو، لكن في المرتين رجّعت الوزن اللي خسرته واضطريت أبدأ من جديد.
في بداية السنة اللي فاتت، حاولت مرة كمان، والمرة دي فعلاً “ظبطت معايا”، ومن وقتها خسرت كل الوزن الزائد وحتى بقة عندي شوية عضلات من تمارين رفع الأثقال. لسه مش متعود على جسمي الجديد…
3 حاجات خلت المحاولة دي مختلفة:
1. ببساطة كنت بحسب السعرات من غير تعقيد، وبعمل كارديو/رفع أثقال 3-4 مرات في الأسبوع. كنت بأكل بنسبة 80% أكل صحي و20% حاجات مش صحية قوي.
2. عندي اصحاب بيشجعوني وبنروح الجيم مع بعض.
3. قرأت كتب ساعدتني جدا.
في الرسالة الاولي كان عندي 14 سنة وكنت وغبي جدًا..
دلوقتي باخد كورسات في كلية مجتمعة، وبأخطط أحوّل لجامعة وادرس مجال زي الطيران أو الهندسة الميكانيكية.
مش مكتئب زي زمان، والمستقبل شكله مبشّر. كمان عندي دلوقتي حبيبة… هي بنت جميلة من كندا 😍
(القصة حقيقية مترجمة من ريديت)
#قصص
#قصص مسلية
