لازم يتحمل المسئولية 💪
الجنينة بتاعتي قريبة جدًا من مكان الجيران عاملين فيه أرضية خرسانية علشان يبقي ملعب كرة سلة.
أطفال المنطقة دايمًا بيروحوا يلعبوا هناك وبيسيبوا دايمًا عجلهم وحاجتهم على النجيلة عندي. الموضوع مش كبير قوي، بس كذا مرة اضطرّيت أطلب منهم يشيلوا حاجتهم لما بقص النجيلة.
دي أول مرة أقص فيها النجيلة السنة دي، وكانت طويلة أكتر من اللازم. المهم، ولد جه وأنا بقص النجيلة، وبرضه حط كرة السلة بتاعتة على النجيلة عندي.
وصلت عند الكرة وقررت إني أزقها بالمكنة عشان تبعد عن الطريق وأنا بقص. كنت ببص للولد كذا مرة ومستنيه يشيلها وياخدها، لكن هو ماعملش حاجة، فقلت “خلاص، هي هتتحرك لوحدها”.
زقيت الكرة تاني على الجزء اللي خلاص اتقص من النجيلة ولما كملت لقدام، سمعت صوت خبطة جامدة وحاجة بتتكسر، كأني دوست على طوبة. طلعت “الطوبة” دي هي الآيفون بتاعه!!!
طبعًا هو كان مضايق وزعلان قوي إن تليفونه اتكسر، وأنا بصراحة حسيت بالذنب، بس فكرت إنه كان المفروض يقول حاجة أو يشيله قبل ما أوصل للمكان اللي فيه الآيفون.
الولد روح بيته وبعد نص ساعة مامتة جات لي وكانت بتقول إني أنا اللي كسرت التليفون ومسؤول دلوقتي إني أبدّله، وإني كان المفروض أقول للولد يشيل حاجته علشان أنا الكبير!!!
أنا قلت لها إنا آسف على اللي حصل للتليفون، بس اعتذرت بأدب عن طلبها ورفضت أجيب له واحد جديد.
ردت وقالت: “أوعدك إنك هتدفع ثمنه”، وبعدها مشت وهي زعلانة.
بصراحة، مش عارف هي ناوية تعمل إيه أو إيه خطوتها الجاية. هي قالت إن عندها صاحبة محامية، فغالبًا ممكن ترفع عليّا قضية في المحكمة؟
هل أنا قانونيًا مسؤول ولا زم أعوضها عن التليفون؟ وتفتكروا هيكون أرخص أدفع تمنه بدل مصاريف المحكمة لو قررت ترفع قضية فعلاً؟…………
🌿الأم وابنها جم عند باب بيتي مرة تانية واعتذروا.
الأم قالت إنها فهمت الموضوع غلط وكانت فاكرة إني كسرت التليفون عن قصد عشان أعلّم ابنها درس علشان مايسبش حاجاته في الجنينة عندي تاني.
واضح إن الولد شرح لها إن اللي حصل كان غلطته هو، ودي حاجة بصراحة احترمتها منه بالنسبة لسنّه.
هي قالت لي إنها كانت متوترة بسبب الموضوع لأنها أم سنجل وماعندهاش الإمكانيات إنها تعوض التليفون دلوقتي. وقالت لو كان أي حاجة تانية غير التليفون ما كنتش هتزعل للدرجة دي، بس ابنها بيحب يقضي وقت ويلعب مع باقي الأطفال، والتليفون مهم علشان تقدر تتطمن عليه و تتابعه.
قلت لها إن عندي تليفون مش محتاجة (آيفون 7، والتليفون بتاعه كان 6s). كمان أخدت بنصيحة الناس إن ممكن يكون غلط لو اديتهوله كده على طول، وإن الأفضل أخليه يشتغل علشان يستحقه.
شرحت لها إني عندي جراج محتاج تنظيف، وقلت لها لو هو موافق يساعدني في التنظيف، ممكن ياخد التليفون.
على طول بان علي الولد الحماس، شكله كان حاسس إن مستحيل يكون عنده تليفون جديد، و مامتة كانت ممتنة جدًا وقالت إنه ممكن يساعدني.
مشي ورجع بعد ساعة، بس المرة دي كان لوحده، وبدأنا في التنظيف. الموضوع اخد حوالي 4 ساعات، الشغل كتير بس ماكانش صعب قوي (هو عنده 12 سنة).
كان عندي شوية حطب كنت عايز أنقله وأرصه على رف، وكمان شوية كراتين قصيتها وخليته يحطها في صناديق ويطلعها للشارع. بعدين كنس، وشرب كولا وأكل كام قطعة بيتزا، وأخيرًا اخد التليفون.
اتكلمت معاه عن أهمية إنه يركز ويخلي باله من حاجاته، لأن مش دايمًا الدنيا هتتحل بالشكل ده.
قلت له كمان إنه لو عايز يقص النجيلة عندي كل ويك إند، ومامته وافقت، هدّيه 30 دولار في الأسبوع. (الشغل هيأخد منه كام ساعة غالبًا).
هو بان عليه الحماس لفكرة إنه هيكسب فلوس، ولما سألته هيصرفها على إيه؟ قال ألعاب.
حسبنا إن الألعاب الجديدة هتتكلف حوالي 60 دولار، واتفقنا إني هديه 20 دولار كل أسبوع لمدة 3 أسابيع، وفي الأسبوع الرابع هدّيه 65 دولار عشان يغطي الضريبة، وفي الأسبوع الرابع هيعمل شغلانة صغيرة زيادة عشان يكمل الخمسة دولار، زي إنه يكنس البلكونة أو الممر.
أتمنى أكون عملت الصح وما خليتش الولد يفتكر إن كل حاجة بتتحل بسهولة، أنا حاولت على قد ما أقدر أخليه يستحق فعلا اللي أخده.
ياريت أكون قدرت فعلا أبقي طيب معاه.
ماكنتش عايز الأم تقلق بسبب التليفون الجديد، خصوصًا إن أمي كانت أم عزباء برضه، وعارف قد إيه الموضوع بيكون صعب.
ابني لسه عنده سنتين، فدي كانت أول فرصة حقيقية بالنسبة لي إني أكون أب حكيم . ياريت أكون نجحت في ده.
(القصة حقيقية مترجمة من ريديت)
#قصص
#قصص حقيقية
