هي الجميله وأنا اللي دمي خفيف
أنا قابلت خطيبتي من سنتين في شغل
أنا معترف إني معجب بيها جدًا لأنها ذكية ودمها خفيف وحياتها مليانة ضحك، ده غير أنها جميلة جدًا.
لما وافقت تكون معايه ، كنت أسعد واحد في الدنيا. ومن يومها وأنا مبسوط معاها قوي ❤️
مؤخرًا قابلت عيلتها، بصراحه كانت تجربة غريبة لأسباب كتير:
هي كانت بتعرفني كويس علي كل أفراد عيلتها، لكن الحاجة اللي فضلت تقولها عن أختها أنها ” جميلة جدًا”، كانت بتكرر ده كتير؟ غريب.
واحدة من خالاتها قالت بهزار إنهم كانوا مصدومين إن خطيبتي لقيت حد كويس قبل أختها، وكأنهم بيقولوا إن أختها أجمل والمفروض تلاقي حد بسهولة. برضو غريب.
في الطريق وأنا سايق العربيه، سألت خطيبتي عن اللي اتقال، وهي ردت وقالت: “آه، ده عادي. هي الجميلة وأنا اللي دمي خفيف.”
كنت قلقان لو رديت هبان كأني بجاملها أو بقول كلام مبتذل وخلاص ، بس في الآخر قلت لها: “إنتي عارفة إنك جميلة ودمك خفيف، صح؟”
هي ضحكت وبصيتلي وخلاص ، ماتكلمناش تاني في الموضوع باقي اليوم.
فكرت إن يمكن دي طريقتهم في التعامل مع بعض، كل عيلة ليها طريقتها الغريبة في الكلام مع بعض. عيلتي برضو كده شوية.
بعدها قابلت عيلتها تاني، وكان نفس الموضوع. بس المرة دي واحدة من خالاتها طلبت مني أقف جنب أختها، وبعدها قالت: “واو، شكلهم لايقين قوي علي بعض.”
إيه ده بجد؟
الكل ضحك، ماعدا أنا ووالد خطيبتي. هو ماكانش مبسوط، وأعتقد إنه لاحظ إني كنت متضايق. بعدين خدني على جنب وقال لي إن مراته وخالاتها عندهم طريقة مش لطيفة في الكلام عن المظاهر والشكل ، وإني لازم ما أخدش الموضوع بشكل شخصي.
بعد كام يوم سألت خطيبتي إذا كانت بتتضايق لما عيلتها بتتكلم عن شكلها بالطريقة دي، قالت إنها متعودة. يعني الموضوع الاول كان بيضايقها لكن بقى جزء من حياتها لدرجة إن خلاص ده بقه العادي بالنسبه لها.
في اللحظة دي هي فتحت لي قلبها وحكت لي عن صاحباتها في المدرسة اللي كانوا دايمًا يقولوا إن أختها جميلة ومابيقولوش عنها نفس الكلام. كانوا بيبصولها بنظرة “إيه اللي حصل لك؟”
في الآخر تقبلت إنها “اللي دمها خفيف” وقررت تتعايش مع ده.
كل ده كويس، لكن هي أكتر من كده بكتير، وبصراحة أتقهرت إنها حست إنها أقل طول حياتها بسببهم . ده ظلم.
أنا نفسي أرد على خالاتها في المرة الجاية لما يتكلموا بالطريقة دي، بس هي قالت لي أسيب الموضوع.
وبرضه مضايقني إن أختها مش بتدافع عنها، إزاي تسكت كده؟
خطيبتي قالت لي إن خطيبها السابق في يوم وهما بيتخانقوا سألها ليه هي مش شبه أختها .
في الآخر سألتها لو هي شايفة نفسها جميلة؟
كل الي عملته أنها هزت كتفها وكأن الموضوع مش مهم.
بصراحة أنا مصدوم. هي جميلة، جذابة، وكل حاجة. وكمان دمها خفيف.
الموضوع ده بيخلي دمي يغلي.
هل أنا ببالغ ولا الموضوع فعلًا مستفز؟؟
🌹 التحديث
خطيبتي راحت بيت أهلها علشان تقول لمامتها كل سنة وهي طيبة، وأنا ماقدرتش أروح معاها لأني كان عندي شغل.
بعد كده اتقابلنا وكانت مرهقة جدًا. سألتها إيه اللي حصل، في الأول ماكنتش عاوزة تقول، لكن في الآخر حكت لي إن مامتها وأختها قالوا لها إنها لازم تمسك فيا جامد عشان أنا “كتير عليها”.
الكلام ماكانش هزار، اتقال بطريقة جارحة. و أكيد قالوا حاجات تانية أكتر.
هي دخلت الحمام وفضلت تعيط، وأنا سبت لها مساحة. لما خرجت، سألتني بجدية: “إنت شايف فيا إيه؟”
أنا على وشك الانفجار فيهم.
مش شايف إن الهزار هينفع مع الناس دي. شايف إن الحل إنها يا إما تقطع علاقتها بيهم لفترة، أو تسيبني أتعامل أنا مع الموضوع.
مش قادر أصدق إن عيلتها هي اللي بتخليها تحس كده. وبصفتي راجل، أقدر أقول بثقة إنها أحلى وأهم شخص في أي مكان.
حاسس إن قريباتها بيغيروا منها لأن عندها حاجات كتير مميزة، ومش مضطرة تهتم بمكياجها طول الوقت زيهم ❤️
#قصص
