عندي شك أنها عايزه تتخلص
من ٣ أيام، أنا وجوزي رحنا عند أهله عشان نزورهم في الويك اند. أخت جوزي اللي في الجامعة كانت هي كمان في بيت أهلها علشان الصيف.
بيتهم اصلًا على البحيرة، والجو كان جميل قوي ، علشان كده قررنا نستمتع بالاجازة وقضينا وقت كتير عند البحيرة، بس حصلت شوية حاجات غريبة جدًا.
أول حاجة، لازم أقول إني دايمًا كان عندي إحساس غريب ناحية “أخت جوزي الصغيرة”.
لما كنت لسه مخطوبة، كانت بتتحجج بأي حاجة عشان متقعدش معايا، ولما كنا بنتعامل مع بعض، كنت بحس دايمًا انها بتكلمتي بطريقة عدوانية!
كنت بعديها وأقول يمكن مفيش بينا كيميا أو يمكن أنا بفهمها غلط.
ومع كده، لما اتجوزت السنة اللي فاتت، خليتها واحدة من وصيفاتي في الفرح. بصراحة، كانت متعبة جدًا في التجربة كلها. باقي الوصيفات قالولي إنها بتقول تعليقات سخيفة كل شوية وخلتهم يتضايقوا.
برضه كنت بعديها وأقول يمكن ده جزء من شخصيتها.
بس عند البحيرة، حصلت كام حاجة خلتني أحس بالقلق!!!
في يوم وصولنا، أخت جوزي عزمت أصحابها من الجامعة، وقضينا شوية وقت مع بعض في المية.
قررنا نلعب مع بعض في المية، كانت اللعبه في الأول لذيذة وخفيفة. بعد كده اصحابها وكمان جوزي، قرروا يعملوا حاجة تانية وراحوا بعيد،
أخته قالت لي يلا نلعب جولة تانية ، طلبت إنها تطلع على كتافي. قلت ماشي، ونزلت في المية عشان تطلع على كتافي، لكن بدل ما تطلع بطريقة عادية، طلعت على راسي وضغطت عليا، ومتحركتش لما حاولت أنزلها. مكنتش قادرة أشيلها من فوق راسي أو حتى أرفع راسي عشان أتنفس. كنت مرعوبة لحد ما إخيرًا قدرت أنزلها وأطلع فوق المية!!!
أخت جوزي ما قالتش حاجة لما أنا طلعت فوق المية، بس ضحكت ضحكة غريبة وخرجت من البحيره!!!
أنا كنت مخضوضة وبترعش وحاولت أهدي، بس قلت لنفسي يمكن ده كان مجرد حادثة، فتصرفت إني تمام وما قلتش حاجة.
أهل جوزي عندهم “جت سكي” (سكوتر للبحر) اللي عنده رخصه بس هو اللي يقدر يستخدمه.
أنا معنديش رخصة، ف أغلب الوقت بركب ورا جوزي وهو اللي بيسوق. أخته عرضت عليا اركب معاها، وأنا ما حبيتش أقول لأ (قلت يمكن دي فرصة نتعرف على بعض أكتر) فوافقت.
قلت لها إن ال”جت سكي”بيخوفني شوية، وطلبت منها تاخد بالها وتبقى هادية.
لكن هي ما أخدتش بالها خالص. كانت بتسوق بطريق صعبه، وبتعمل لفات بسرعة رهيبة، كنت حاسة إني لازم أمسك فيها جامد عشان ما أقعش.
أكثر من مره كنا خلاص علي وشك نقع بسبب السواقه المجنونة.
ومع كده، ما قلتش حاجة وبينت إني بخير قولت يمكن متعوده علي كده أو يمكن مش واخدة بالها إنها بتسوق بسرعة وبطريقة مش طبيعية.
بعد كده، والد جوزي زعق لها لما حاولت ترش جوزي بالمية وهي بتسوق ال “جت سكي”. قال لها إن اللي بتعمله ده خطر “إنها تحاول تسوق قريب من الناس اللي في المية لأنها ممكن تدوس عليهم. ”
بعد حوالي ساعة، كنت أنا لوحدي في المية ، أخت جوزي ساقت قريب جدًا مني عشان ترشني بالمية. أقرب بكتير من اللي كانت بتعمله مع أخوها. ضحكت معاها لكن من جوايا كنت خايفة بصراحة.
وبعدين نيجي للي حصل في العشا. الكل في العيلة عارف إن عندي حساسية شديدة من منتجات الألبان.
أخت جوزي عملت طبق رز بالطماطم وقالت لي إنه مفيهوش لبن عشان أقدر أكل منه. وثقت فيها وخدت حتة منه، بس بعد ما أكلت بدأت أحس إني تعبانة جدًا واضطريت أسيب السفرة وكنت في حالة إعياء شديدة طول الليل. كنت حاسة إني هفقد وعيي وكان صعب عليا آخد نفسي – الحمد لله كان معايا حقنة الحساسية احتياطي، بس التجربة كلها كانت بشعة.
التفسير اللي سمعته بعدها إن أخت جوزي حطت زبدة على الرز عشان يبقى طعمه كريمي أكتر ونسيت إنها حطتها قبل ما تقدم لي الطبق!!!
باين إن ده ممكن يكون حادثة بريئة برضه، بس… مع اللي حصل كله في الويك اند ، بدأت أحس بشكوك إن الموضوع مش بريء.
مش عارفة لو كنت ببالغ أو أنا متوترة، بس احساسي الداخلي بيقول لي إن أخت جوزي فعلاً كانت عايزة تأذيني.
انتوا رأيكوا ايه؟؟؟
🌹 تحديث
قررت أكلم جوزي عن تصرفات أخته معايا الأسبوع اللي فات. كنت ناوية أقعد معاه وأتكلم بوضوح عن قلقي من ناحيتها، بس اسمها جه في الكلام بشكل عفوي، فاستغليت الفرصة وبدأت أحكي له عن اللي حصل.
وأنا بحكيله كل موقف غريب حصل، كان مصدقني وزعلان علشاني قوي ❤️
كمان، هو بيدعمني في رغبتي إني أبعد عنها بعد كده.
قال لي إن لو حصل أي حاجة تاني زي اللي حصل في المية لازم أقول له على طول (بس موضوع الحساسية من الألبان هو شايفه غلطة بجد، خصوصًا إنها كانت متأثرة جدًا وعيطت من كتر ما حست بالذنب).
طلع إن تصرفات أخت جوزي مش غريبة عليها!!
بعد ما حكيت له اللي حصل، قال لي إن عندها تاريخ من إنها تتعدي الحدود مع الناس وتختبر صبرهم بالطريقة دي، قبل الجامعة، كانت بتعاني من قله الاصحاب لأنها كانت بتتعدي الحدود مع زمايلها بشكل مستمر – وجوزي اضطر ينقذها أكتر من مرة في المدرسة لأنها ضايقت ناس كانوا ناويين يضربوها.
هو كان فاكر إنها اتحسنت في السنين الأخيرة، علشان كده اتفاجئ من اللي عملته معاية الأسبوع اللي فات.
واضح إنها بقالها فترة طويلة في العلاج النفسي عشان تعالج مشاكل نفسية وسلوكية بتعاني منها.
جوزي لسه زعلان منها على اللي عملته معايا، لكن هو مقتنع إن نيتها مش أذية أو ق**تل، بس كانت بتختبر حدودي وبتحاول تزعجني، بس بشكل متهور جدًا وبطريقه سخيفه.
أنا ميالة أصدق رأيه، لكن لازم إخد حذري لو الموضوع طلع أكبر من كده.
نظريه جوزي ، إنها لما شافتني هادية وخجولة، افتكرت إني مش هوقفها عند حدها، وده السبب اللي خلى تركيزها عليا أنا بالذات. مفيش حاجة أنا عملتها أو قلتها السبب في كده (…وأيوة، سألته علشان اتأكد).
علشان كده، من دلوقتي هحاول أخلي تعاملي معاها بسيط وفي المناسبات العائلية بس. طبعًا هكون لطيفة، بس مستحيل هكون لوحدي معاها تاني، وجوزي متفق على كده وهيتدخل لو الموضوع اتغير بأي شكل.
بالنسبه لي مؤلم أن علاقتي بأخت جوزي مش هتكون كويسة زي ما كنت بحلم – عمري ما كان عندي إخوات قبل كده، فكنت متحمسة لفكرة إن حد يقبلني كأخت.
على العموم، أنا علاقتي مع باقي العيلة كويسه، وعندي اصحاب ممتازين في حياتي وزي الاخوات، يعني الحمد لله مش ناقصني حاجة 😍
#قصص
