بص، احتمال يكون ده سؤال غريب مني، بس بصراحة الموقف أغرب، ومش عارفة أتصرف ازاي…..
بيتي موجود علي ناصية الشارع، ومن سنتين انتقل زوجين متجوزين جديد للبيت اللي جنب بيتي. من أول ما جم بدأوا يقولوا تعليقات غريبة عن لون بيتي (أصفر)، وبعدها ابتدوا يطلبوا بشكل مباشر إني أغير اللون!!!
البيت كان لونه أصفر من أول ما اتبنى، وانا بحب اللون ده، ومفيش قانون بيمنع ده أو أي حاجة.
وماكتفوش بطلبهم الغريب ده لاء، دول كمان كلموا الشرطة والحي عن الموضوع، لكن الاتنين قالولهم إن مفيش حاجة غلط عملتها، وملهمش حق يتدخلوا.
كمان حاولوا يرفعوا عليا قضية في المحكمة (القضية اترفضت واضطروا يدفعوا تكاليف المحامي)، وحاولوا يجمعوا باقي الجيران عشان يعملوا “جمعية سكان” علشان يضغطوا عليا أغير اللون.
باقي الجيران برضه رفضوا الفكرة، و الناس بعدت عنهم بسبب تصرفاتهم.
الفتره اللي فاتت، اضطريت أسافر لمدة أسبوعين. لما رجعت من يومين، لقيت بيتي بقى رمادي. حرفيًا، كنت هعدي من جنب البيت من غير ما آخد بالي لأني متعود على لونه الأصفر 😲
طبعًا عرفت على طول مين اللي عمل كده، لكن لما خبطت على بابهم محدش رد.
غالبًا هما فهموا إني مش موجودة لما شافوا جيراني بياخدوا البريد بتاعي وأنا مش هنا، لأني أكيد مقلتلهمش إني مسافرة، وكمان عارفة إن باقي الجيران مش طايقينهم ومحدش هيقولهم.
جار من الناحية التانية جالي ووراني صور للعامل اللي كان جاي علشان يدهن البيت، وقال إنه هو وجار تاني كلموا الشرطة، لكن شركة الطلاء كان عندهم “طلب شغل” مدفوع ، فالشرطة مقدرتش تعمل حاجة.
الشركة قالت إن حد دفع لهم ولازم يكملوا الشغل علشان ميتعرضوش لقضية.
كلمت شركة الدهانات علشان أخد نسخة من التصريح، وكان باسم “الأنسة جين سميث” ومدفوع كاش.
قالوا إن واحدة وجوزها شعرهم أحمر جم وطلبوا الشغل ده (جيراني المزعجين الاتنين شعرهم أحمر) و قالوا إنهم عايزين يدهنوا البيت. وأنهم هيكونوا خارج المدينه وسابوا للشركه صور لبيتي من بره!!!
علي فكره هما دفعوا للشركه 4000 دولار كاش.
أنا عندي كاميرا مراقبة قدام الباب وفي الجنينه الخلفية لأني بشتغل ورديات، وعلشان أنا ست عايشه لوحدي و بخاف حد غريب يدخل البيت وأنا مش موجوده.
بس جيراني المزعجين ماقربوش من ممتلكاتي فمش هينفع اتهمهم بالتعدي.
لما كلمت الشرطة قالوا إن العمال كانوا شغالين بشكل قانوني واتدفع لهم ومش من حقي اتهمهم بالتعدي أو التخريب، لأنهم ماعملوش أي ضرر حقيقي للبيت.
مش عارفة إذا كان ينفع أرفع قضية لأن مافيش ضرر فعلي للبيت أو ليا بشكل مباشر؟
الجيران لسه مظهروش ومحدش رد عليا لما خبطت.
متضايقة قوي لأن بيتي الأصفر كان عاجبني جدًا، ومش مصدقة إنهم مجانين كده. نفسي أوري للمحكمة إزاي هما ناس مريضة نفسيًا.
عايزة أعرف لو فيه أي إجراء أقدر أخده علشان أجبرهم يدفعوا تكاليف إعادة الدهان للون الأصفر تاني. حد عنده أي فكرة إزاي أخليهم يصلحوا اللي عملوه؟
ملحوظة: أنا ساكنة في ولاية لويزيانا
🌹 تحديث – 6 سبتمبر 2015 (اليوم التالي)
كنت ناوية أستنى لبعد الويك إند عشان أكلم المحامي، لكن حصلت تطورات فاضطريت أكلمه النهارده الصبح.
جيراني رفعوا عليا قضية بيطالبوا بتكلفة الدهان!!! (أيوة، بجد)، مش هقدر أقول أي تفاصيل أكتر عن اللي حصل بناءً على نصيحة المحامي. هعرفكم أول ما القضية تخلص.
🌿انتهت القصة.
للأسف الموضوع مش معروف نهايته لأن صاحبة المشكلة ما عملتش أي تحدث من أكتر من 9 سنين.
الناس علي ريديت كان نفسهم يعرفوا نهاية القصة دي قوي ، في واحد قرر يشغل خياله ويخترع تحديث مش حقيقي . مجرد توقعات من دماغه 🤣
🌹 تحديث مزيف 😅
ده السيناريو اللي أنا متخيله:
صاحبة المشكلة كسبت القضية واخدت تعويض كبير علشان تدهن بيتها تاني. التعويض كان كبير لدرجة إنها تقدر تدهن ثلاث بيوت كمان.
فهي اتفقت مع شوية من جيرانها المقربين، ودهنوا بيوتهم بدرجات مختلفة من اللون الأصفر. “واحد بلون الزعفران ، واحد بلون الزبدة، وواحد أصفر كناري” وصاحبة المشكلة رجعت لون بيتها الأصلي 🟡
كان معاها كمان مبلغ كفاية تشتري عربية جديدة تقدر تخمن لونها إيه؟ 💛💛💛
وأحلى جزء: الجيران المزعجين بقوا مفلسين بعد القضية لدرجة إنهم مش قادرين يمشوا ويسيبوا المنطقة، وفضلوا محبوسين في حي كله بيوت صفراء حوالين بيتهم 🤣
#قصص
