انا عمري 26 سنه
وجوزي عمره 29
اشتغلت في وظيفتي الحاليه من سنه ونص
(ما اقدرش اقول الوظيفه ايه لان بلدي صغيره قوي وممكن الناس تعرف احنا مين وانا مش عايزه كده)
في اللحظه الي بدأت فيها شغلي في الشركه حاسيت اني في المكان المناسب
مديرتي (38 سنه) صاحبه الشركه انسانه رائعه ولطيفه جدا
هي فعلا بتحب وظيفتها وعرفت تكبر اسمها وتثبت نفسها
ده غير اننا بنشتغل 6 ساعات بس
رواتبنا اعلي من الشركات التانيه بنسيه 20%
و من حق كل موظف سبع اسابيع في السنه اجازه مدفوعه الاجر
ليه مديرتي بتعمل كده؟؟؟
علشان بتقدر تعبنا وثروتها كده كده بتزيد كل يوم 💵💵
كنت فخوره جدا بالشغل مع ست زيها
كنت بحكي لجوزي عنها طول الوقت
وخصوصا في بدايه شغلي
جوزي هو كمان بقه مفتون بيها من كتر كلامي عليها
خصوصا لما قابلها في حفله كانت منظماها الشركه في عيد الميلاد
يومها قالي دي اكيد كانت جميله لما كانت اصغر , دي كان ممكن تشتغل عارضه ازياء!!!
من بعدها وجوزي بدأ يتابع حساباتها علي وسائل التواصل
اعتقد انه اعجابه بيها اتحول الي هوس او يمكن اسوأ !!!
هو بيتابعها من خلال حسابي علي انستجرام وبيعجب بكل صورها
وكمان بيتابع حساب الشركه
مديرتي يتحافظ علي خصوصيتها جدا
بس بعد انتهاء اجراءات طلاقها في اول السنه اكتشفنا انها مطلقه لان طليقها بدا يحضر للشركه
لانه اخد منها نص الشركه وقت الطلاق
بدا طليقها يحاول يغيير في مرتباتنا وساعات العمل
ده غير انه يبواعد بنت اصغر منها
(اتعرف عليها وهو متجوز مديرتي وهي كانت السبب في الطلاق) وشغلها كمان معانا في الشركه (لسه بتشتغل معانا لغايه دلوقتي)
في النهايه اقتنع جوزها (او اعتقد المحاميين)
انه يبيع حصته في الشركه لمديرتي
جوزي كان بيتابع كل الاحداث دي وكان زعلان عليها قوي وغضبان
وقالي ازاي راجل يعمل كده مع واحده زيها؟وقالي انه لو كان مكانه كان هيقدرها ويحبها وبلا بلا بلا
مين يسيب ست زي دي علشان عيله صغيره؟؟
غضبت منه قوي وقولتله كل الرجاله بيفضلوا البنت الاصغر لو قدامه اختيار
ضحك وقالي ده الرجاله الفاشله بس الي بتعمل كده 😠
الموقف بقه الي جاب اخري
يوم الجمعه الي فاتت
خرجت مع جوزي السينما نتفرج علي فيلم
وقتها بالصدفه شوفنا مديرتي واقفه مع شاب شكله لسه في العشرينات
جوزي فقد اعصابه وقالي ماكنتش عارف انها بتواعد شاب صغير
وكان عايز يروح يسلم عليها!!!
وقتها صرخت فيه وقولتله اتحكم في نفسك شويه لان بصراحه شكلك بقه وحش قوي قدامي
لما وصلنا بيتنا بدأ يفتح حسابها علي انستجرام ويتجسس عليها
لغايه ما شاف صورها وبعدها قال ياه الحمد لله ده طلع ابن اخوها
جوزي عرف كده لانها نشرت صوره مع عيلتها كلهم وقت ما كانت في السينما
(الظاهر ان باقي افراد عيلتها كانوا بره علشان كده احنا مكناش شايفنهم معاها)
جوزي كان فرحان وكأن كان في جبل علي قلبه وانزاح !!!
انا بدأت افقد اعصابي وصرخت وبكيت وقولتله انت بتحبها؟
كمان خبطته وطردته من الغرفه وقفلت الباب
وقف قدام الباب وحاول يهديني وقالي انه بيحبني وهيفضل يحبني علي طول
قال كلمه دمرتني اكثر “هو واحده زيها أصلا هتبصلي علي ايه”
من وقتها مش عارفه انام
ليه جوزي بيعمل كده؟ هل ده حب؟ اعجاب؟
بس هي اكبر منه بكتير , وليه حاسس نفسه اقل منها قوي كده؟
رغم انه وسيم جدا وشاب
ده هي الي لازم تحس انها محظوظه علشان شاب وسيم كده بيحبها
هو قصده اني اقل منها علشان كده قبلت بيه؟
ولا هو معجب بس بمكانتها وفلوسها؟
هو مش عايز يعترف بأي حاجه
مش عارفه اعمل ايه دلوقتي
انا بحب شغلي والمزايا الي فيه
وبسبب مرتبي الكبير حياتي اتغيرت للاحسن
بس انا دلوقتي كرهت مديرتي وكرهت نفسي
اتكلمت مع اصحابي وامي واختي وقالولي انني ببالغ
انتو رأيكوا ايه؟؟
🌹#تحديث
انا حاسه بألم جامد ومش عارفه اعمل ايه
انا عارضت عيلتي واصحابي وطلبت من جوزي الانفصال
خلاص قلبي مش قادر يتحمل اكثر من كده
واحساسي بيقولي ان جوزي خلاص مبقاش ملكي
انا اخدت القرار بعد الي حصل في يوم السينما
لما بلغت جوزي بقراري حس بالحيره و قالي اني برتكب خطأ كبير
بس ساب البيت وراح يعيش مع اخوه
بعدها قررنا نزور استشاري علاقات
في الاول كانت الامور ماشيه كويس
بس بعد كده بقه يتردد في الحضور
وكل شويه يلغي ميعاد الاستشاره علي اخر وقت
ودلوقتي هو مش بيتواصل معايه خالص
ده خلاني حزينه اكثر واتأكدت ان احساسي كان صح و انه خلاص مش عايز يصلح العلاقه 😢
اختارت اكمل في وظيفتي
انا محتاجه للشغل ده
ده غير ان مديرتي مش بتيجي كتير
وهي ماتعرفش اصلا اني موجوده في الحياه
جوزي كمان مبقاش يعجب بصورها علي انستجرام
بس حصلت مفاجأه لما اخت جوزي عملت مشاركه لاستوري فيها جوزي وكان ماسك ايد واحده ست!!!
بعدها جوزي اتصل بيه ( رغم انه مش بيكلمني من شهر)
الاول عملي بلوك انا وعيلتي وكان خايف اني اكتب تعليق علي حسابه وفضل يقولي ارجوكي ما تفسديش الموضوع ارجوكي
قولتله تقصد ايه؟
قالي بلاش تقوليها عننا!!!
في الاول ماكنتش رابطه المواضيع ببعض
ما خطرش علي بالي ان الست الي كانت مع جوزي هي مديرتي!!!
لما استوعبت بدأت اصرخ وابكي
وقولتله ازاي تعمل كده فيه؟
ازاي كانت بتحاول تقولي اني موهومه
والموضوع طلع حقيقي
قالي ارجوكي ما تخربيش علاقتي
وان الموضوع كله صدفه
وحصل بعد ما انا قررت الانفصال
قالي انه شاف حسابها علي تطبيق مواعده وبدأ يتكلم معاها
وانها تعرف انه علي وشك الانفصال لكن ماتعرفش ان جوزي يعرفها من الاول ومتابعها , واني بشتغل عندها
وقالي انه بدأ يتكلم معاها من شهر ونص بس
بعد ما انا قررت الانفصال و ان علاقتهم دلوقتي جديه
قعد 5 دقايق كامله يتوسلي ويقولي انه ماحسش بالسعاده دي كلها قبل كده في حياته !!!
وان مش من حقي ادخل في علاقته دلوقتي لاني انا الي اخترت انهي الجواز
بيقولي هي سعيده معايه بلاش تأذيها 😢
بكيت لغايه الصبح مش عارفه اعمل ايه
عايز اخرب عليه سعادته بس مش عارفه لو ليه الحق اعمل كده؟
وكمان قلقانه جدا علشان وظيفتي
ارجوكم ساعدوني…….
🌹#تحديث
اتكلمت مع مديرتي وقولتلها علي كل حاجه
قولتلها اني في الاول كنت سعيده بالوظيفه الجديده واد ايه كنت بحترمها وفخوره بيها
وان كلامي اثر علي جوزي وبقه مهووس بيها
واعتذرت علي كلمه مهووس
كمان حكيت علي يوم السينما
قولتلها ان عارفه ان جوازي انتهي
وانا مش بحكم عليها ومش بلومها ابدا
بس من العدل انها تعرف الحقيقه كامله
لان الي فاهمته من جوزي انه كذب عليكي وقالك انه لسه متعرف عليكي صدفه من خلال تطبيق المواعده
كانت ساكته طول الوقت
لغايه ما سمعت كلمه “تطبيق المواعده” وقتها قاطعتني وقالتلي بس احنا متعرفناش علي بعض بالطريقه دي!!!
قالتي انه كان بيروح نفس الجيم الي هي بتروحه خلال الست شهور الي فاتوا او يمكن من اكثر
قالتلي الجيم ده الي موجود قدام الشركه
هي متعوده تروح كل يوم الصبح قبل الشغل
اكتشفت ان جوزي كان بيكذب عليه
هي كمان كان باين عليها الصدمه 😮
اعتذرتلها وقولتلها انه قالي انه سعيد معاكي جدا وكان بيتوسلي علشان ما قولش اي حاجه
ماتكلمتش كثير قالتي شكرا علشان قولتلي……..
تاني يوم قالتلي ممكن اتكلم معاكي
اعتذرت علي الي حصل وسألتني لو محتاجه مساعده؟
قولتلها لاء شكرا
لما رجعت البيت كان جوزي موجود
قبلها اتصل بيه خمسين مره بس تليفوني كان صامت
كان بيبكي ويقولي اني انتقاميه واني دمرت مستقبله
الي فاهمته من كلام جوزي , ان مديرتي خايفه منه دلوقتي
كان عايزني اتكلم معاها تاني واقولها انه مش خطير
وان انا الي طلبت الطلاق
وانه مش غلطان في حاجه هو بس وقع في حبها!!!
قالي انتي ليه بتقولي عني اشائعات اني بلاحق الستات ومزعج؟؟؟
طلبت منه يخرج
وقولتله من دلوقتي انا هتكلم مع محامي يخلص اجراءات الطلاق
وبعد كده مش مسموحلك تتكلم معايه تاني ابدا
من وقتها واحنا ماشوفناش بعض تاني
للاسف جوزي ما كانش بيحبني
وكان بيبكي عليها زي الطفل الصغير 😢
مش عارفه ازاي الانسان بيتغير بالسرعه دي
قبل الطلاق كان بيقولي انه بيحبني وان مشاعره صادقه
هل كل ده كان كذب؟؟؟
(القصه حقيقيه مترجمه , اصحاب القصه اجانب)
#ريديت
#حواديت_الاجانب
