تكاليف فرح بنتي 💍💵
أنا راجل عندي 3 اولاد: سارة (35 سنة)، جيسيكا (25 سنة)، وبن (23 سنة).
أنا ومراتي خلفنا سارة لما كان عمرنا إحنا الاتنين 18 سنة. طبعا ماكانش الموضوع سهل، بس بمساعدة أهلنا، قدرنا نكمل الكلية ونربيها في نفس الوقت.
لما جه وقت دخول سارة الكلية، ماكنش معانا فلوس نساعدها. فاضطرت تاخد قروض وتسددها بنفسها. اتعلمنا من غلطتنا، وبدأنا نوفر فلوس لإخواتها جيسيكا و بن، كل واحد فيهم اخد حوالي 100 ألف دولار عشان الكلية، وماكنش عندهم أي ديون.
طول الفترة دي، سارة عمرها ما اشتكت. خلصت تعليمها، واشتغلت شغل رائع، وقدرت تسدد القروض في 3 سنين بس وكانت عايشة معانا عشان توفر على قد ما تقدر. كمان كانت بتساعدنا كتير جدًا في رعاية إخواتها الصغيرين، وكانت دايمًا بتتصرف بتفاني وبتساعد في أي حاجة، يمكن كمان زيادة عن اللزوم.
لما قالتلي من خمس سنين إنها هتتجوز، اتكلمت مع مراتي وقلت لها قد إيه حاسس بتأنيب ضمير إننا ماعملناش حاجة علشانها زي ما عملنا لإخواتها. فقررت أديها الورث اللي ورثته من جدتي، وكان حوالي 50 ألف دولار، عشان نساعدها في مصاريف فرحها ومقدم بيتها. الحمد لله، مراتي وافقت، وحتى لو سارة ماكنتش محتاجة الفلوس دي فعلًا، أنا عارف إنها فرحت جدًا.
المشكلة بقى إن جيسيكا هتتجوز السنة الجاية، وكانت فاكرة إننا هنقدم لها هدية مشابهة زي اللي قدمناها ل سارة. واتفاجئت جدًا لما قلت لها إننا ما اتفقناش علي حاجة زي دي، وحتى لو كنا عاوزين نساعدها، إحنا ماعندناش اصلا الميزانية دي.
قالت إن ده مش عادل، وإننا دفعنا لسارة لكن مش عايزين نساعدها.
حاولت أشرح لها الوضع، وقلت لها إننا صرفنا عليها ضعف اللي صرفناه على سارة. لكن هي أصرت إن ده مش منطقي، خصوصًا وإن سارة أصلًا مرتاحة ماديًا هي وجوزها، وسددوا تمن بيتهم بالكامل ووضعهم المالي فوق الممتاز.
قلت لجيسيكا إن الموضوع ملوش علاقه بإن أختها معاها فلوس كتير، الموضوع إني أخيرًا قدرنا نعمل حاجة لبنتنا الكبيرة اللي ضحت كتير عشان ربنا رزقنا بيها وإحنا صغيرين جدًا.
هي ما تقبلتش الكلام ده، ومشيت وهي زعلانة، ورافضة تتكلم معانا.
مراتي شايفة إننا ممكن ناخد قرض صغير ونديها الفلوس، لأنها مش متعودة إن ولادها يخصموها، وحاسة بالحزن لإن جيسيكا بعدتها عن تجهيزات الفرح. كمان خايفة إننا ما نتعزمش على الفرح خالص.
لكن أنا مصمم علي رأيي ومش ناوي أتنازل، لإن جيسيكا مش من حقها تطلب فلوسنا بالطريقة دي.
دلوقتي سارة بتقول إن الموضوع كبر قوي، وعرضت إنها تدفع نص الفلوس لأختها علشان متزعلهاش والموضوع ما يكبرش. لكن أنا، بصراحة، وصلت لمرحلة أني أفضل أحرق الـ50 ألف دولار على إني أديها لجيسيكا.
سارة ومراتي شايفين إن الموضوع مش مستاهل إننا نخسر عيلتنا عشانه، لكن أنا مؤمن إن لو تنازلنا دلوقتي، ده هيخليها تتصرف باستحقاق أكبر في المستقبل.
ايه رأيكوا في الموضوع؟!
🌳 بعد ما قريت التعليقات، حسيت إني مقتنع أكتر إن عندي حق.
قررت أقعد مع مراتي ونتكلم. وبناءً على اقتراحات كتير منكم، وريتها البوست وطلبت منها تقراه. هي ما كانتش مبسوطة، لكن كانت فضولية جدً لإن الموضوع شاغل بالها قوي الفترة دي، وكانت عاوزة تعرف رأي الناس
مراتي كانت معترضة علي كام حاجة:
🌳 هي شايفة إن لما قلت إني أفضل أحرق الفلوس، ده بيبين إن طريقة حلي للمشاكل لازم تتغير.
🌳 صحيح إنه ممكن يكون سهل للناس على الإنترنت إنهم يقترحوا إن الأهل يقطعوا علاقتهم بولادهم، لكن هي مش مستعدة تخسر بنتها الصغيرة.
🌳 كمان قالت إن كلامي عن إني “عملت واجبي وعاوز أركز على نفسي” ده كلام أناني، ومش المفروض الأب يحس كده تجاه اولاده.
مراتي شايفة إن فيه حل وسط ومنطقي. بدل ما ندي جيسيكا الـ50 ألف دولار كاملة، ممكن نعرض عليها نص المبلغ علشان الفرح. بالطريقة دي، نقدر نغطي أغلب تكاليف الفرح من الفلوس اللي محوشينها ، ولو احتجنا، نستلف الباقي من سارة ونسدد لها خلال سنة.
أنا رديت عليها فورًا وقلت لها إن ده مش هيحصل.
قلت لمراتي إننا ممكن نفصل فلوسنا عن بعض، وإنها ممكن ترجع للشغل بدوام كامل لو عايزة تساعد جيسيكا في دفع تكاليف الفرح.
لكن وضحت لها بشكل قاطع إني مش هدفع أي حاجة، ومهما كان الموضوع شكله أناني، أنا مش حاسس إن عندي التزام تجاه جيسيكا أكتر من كده، وعاوز أستمتع بحياتي .
ردت عليَّا، زي ما بتعمل دايمًا، وقالت إني عنيد، بس هي مستعدة تاخد الخطوة دي “تشتغل عدد ساعات اكتر” لو ده هيحافظ على العيلة.
فقلت لها إن ده قرارها، لكن طلبت منها ما تشتكيش من تعبها أو صحتها لما ترجع للشغل بدوام كامل.
من يومين، مراتي جت لي وقالت إنها موافقة على اقتراحي. قررنا نفتح حساب بنكي مشترك نحط فيه مصاريف البيت الشهرية. وبعد كده، كل واحد فينا يستخدم باقي فلوسه بالطريقة اللي تعجبه.
احنا (هنحسب مصاريف البيت) و نقسم الفلوس المتبقية بينا بالنص 50/50.
اتكلمت مع سارة وهي مصرة إنها عايزة تساعد. وقالت إنها متفقة معايا في وجهة نظري، بس هي مش عايزة مامتها ترجع تشتغل بدوام كامل.
هي عايزه تساعد علشان تدعم مامتها مش جيسيكا.
أنا قلت لها إن ده فلوسها وهي حرة تعمل اللي يعجبها، لكن أنا مش هتدخل في الموضوع أكتر من كده……
(القصة حقيقية مترجمة من ريديت)
#قصص حقيقية
#قصة حلوة
