السلام عليكم ورحمة الله وبركاته.
مواصفات الانثي الحقيقيه
- مش هي اللي بتاخد المبادرة
- ان الست هي اللي بتستقبل
- ما تتحمليش مسئولية مش بتاعتك
- الانوثة يعني بهجة
- الانوثة يعني السلام الداخلي
- الاحتواء والحنية والسكن
من فترة بنت جميلة بعتتلي وقالتلي ان هي حاسة ان مع زحمة الدنيا والشغل والحاجات الكتير قوي اللي مطلوب مننا ان احنا نعملها ان احنا اوقات للاسف بننسى انوثتنا. وطلبت مني ان انا اعمل فيديو واتكلم عن الموضوع ده
ازاي اقدر اتعامل مع شريك حياتي وانا كلي انوثة حقيقية.
ومهم جدا جدا انك تفهمي كل كلمة هقولها النهاردة ان شاء الله لان صدقوني مشاكل كتير بتحصل بسبب الموضوع ده
لكن لو الست رجعت لفطرتها السليمة وعرفت كويس جدا تكون انثى حقيقية هتجبر الراجل اللي قدامها غصب عنه هيحترمها هيحبها وبجد تملى عينيه وهيتعامل معها كمان برجولة حقيقية
وحتعرف تاخد حقوقها كويس جدا من غير ما تعمل اي مجهود
في بس معلومة مهمة جدا جدا ممكن تكون مفاجأة لناس كتير. انا كانثى جوايا طاقة ذكورة وكمان طاقة انوثة. بس طبعا اللي بيغلب علي الانوثة. يعني سبعين في المية انثى وتلاتين في المية ذكر
وطبعا العكس صحيح. الراجل برضو فيه سبعين في المية ذكورة وتلاتين في المية انوثة. هو ربنا سبحانه وتعالى خالقنا كده
عشان نقدر ان احنا نعمل توازن. امتى بقى المشكلة بتحصل ؟لما النسبة دي اللي ربنا سبحانه وتعالى خلقها لنا بتختل
يعني لما الانثى طاقة الذكورة هي اللي بتعلى عندها وبتبدأ تتصرف زي الراجل ما بيتصرف وقتها بتحصل المشكلة.
وهي نفسها من جواها ما بتكونش مرتاحة ابدا. خليكي معايه في اخر الفيديو ان شاء الله اللي هشرح لك برضه ازاي توازني بين طاقة الذكورة والانوثة جواكي
على فكرة انا في الفيديو هنا مش بقول لك اتعلمي الانوثة. انا لو قلت لك اتعلمي الانوثة ده معناه ان انت مش ست. انا عايزاكي تحافظي على الانوثة اللي موجودة اصلا جواك. واللي ربنا سبحانه وتعالى خلقها فيك
انا مش عايزة اقعد اعلمك حاجات تخليكي مصطنعة ومش حقيقية. لكن لما تسمحي بالانثى اللي جواكي ان هي تتحرر كده وتطلع هتلاقي انت من نفسك بتعملي الحاجات اللي هقولها لك في الفيديو دي ان شاء الله لوحدك من غير حتى ما تفكري. طيب خلينا كده نبدأ بسم الله
طيب خلينا كده نبدأ ايه هي صفات الانثى الحقيقية؟
عشان نعرف ده تعالوا نرجع كده للطبيعة ونشوف الانثى في الطبيعة بتعمل ايه؟ لما العلماء حاولوا كده يدرسوا
الحيوانات الذكر والانثى بيتعاملوا مع بعض ازاي؟ لاقوا ان في حيوانات كثير قوي الذكر بيحاول ان هو يبهر الانثى بكل الطرق. في حيوانات كده ممكن تعمل رقصات كده معينة عشان يبهر الانثى بتاعته او ممكن يروح يقدم لها هدية
حيوان تاني يحاول ان هو كده يزين العش بتاعه ويحاول كده ان هو يعمله باحسن شكل عشان الانثى تشوفه وتعجب به.
الناس بقى اللي دارسة الاحياء. تعالوا شوفوا كده البويضة قاعدة مكانها هادية مستقرة ما بتخرجش برة جسمك. لكن
الحيوان المنوي بيعمل ايه؟ بيسافر لها العلماء بيقولوا مسافات واميال كتير قوي قوي عشان يقدر ان هو يوصل لها.
يبقى اول حاجة الفطرة اللي ربنا سبحانه وتعالى خلق الانثى عليها ان مش هي اللي بتبدأ مش هي اللي بتاخد المبادرة وده طبعا مش في اول العلاقة وبس لأ ده المفروض يكون على طول.
حاجة كمان ان الست هي اللي بتستقبل. يبقى لازم تعودي نفسك زي ما بتدي تهدي شوية وتدي لنفسك كمان فرصة انك تاخدي.
تستقبلي مدح
مساعدة
تستقبليه هدية
ولازم تبقي عارفة ان انت بجد تستحقي
طيب اتفقنا ان ان انا اللي هستقبل الذكر مش انا اللي هروح له. طيب لما هو يجي لي بقى انا هستقبله ازاي؟
بالاحتواء والحنية والسكن.
تلاتة دول برضو من صفات الانوثة.
الانثى الحقيقية جوزها ما بيلاقيش راحته غير معها هي.
هي السكن. هي اللي بتحتويه. هي مصدر الحب واللطف.
الانثى الحقيقية كمان لينة.
لما تيجي تتعامل مع شريك حياتها بتتعامل بحنية وبطيبة لو زعلها او غلط فيها بتعرف تاخد حقها بذكاء بلين
مش بتقعد تنتقد مش بتعلي صوتها ومش بتناطحه كده كأنها راجل زيه.
هل معنى كده ان انا اتنازل عن حقي؟
لأ بس الذكاء ان انا اخد حقي من غير ما افقد انوثتي
وان شاء الله الفيديو اللي جاي هتكلم فيه اكتر على النقطة دي.
حاجة كمان مهمة جدا جدا لازم تراعيها ان انت ما تتحمليش مسئولية مش بتاعتك.
من صفات الانوثة الرعاية. انا دوري او واجبي ان انا ارعى جوزي ارعى او اولادي
لكن حاجة مثلا زي الانفاق ده مش دوري مش دوري ان انا اصرف على البيت
للاسف دلوقتي بقينا بنشوف ستات هي اللي بتشتغل وهي اللي بتصرف على البيت وجوزها ما بيشتغلش خالص يا اما بيشتغل بس عشان يجيب السجاير بتاعته. طبعا ده غلط جدا انت كده
تفقدي انوثتك وهو كمان للاسف بيفقد رجولته.
انا طبعا ما بقولش ان الست ما تساعدش في البيت, لو هي عايزة ما فيش مشكلة بس بكامل ارادتك.
لكن لازم يكون مصدر الدخل الاساسي هو جوزك وانت بس مجرد بتساعدي وطبعا برضاك.
طلبات البيت الكتير والاكياس والشيل الكتير قوي دي مش المفروض تكوني انت اللي بتعمليها. مش وظيفتك انك تشيلي حاجة تقيلة. ولا ربنا سبحانه وتعالى خالقنا اصلا جسمنا يستحمل الاوزان التقيلة.
والدراسات بتقول ان الست اللي بتعمل نشاط بدني كبير جدا للاسف حتى صوتها بيتغير ويخشن.
يبقى من الانوثة انك تعملي واجبك وبس لكن ما تتحمليش ادوار مش بتاعتك.
حاجة كمان الانوثة يعني بهجة
عريس جديد بيته لسه فاضي اخد اصحابه وقال لهم يلا بينا نفرش البيت.
حطوا الاجهزة وحطوا الكراسي والعفش والكلام ده كله وخلصوا ونزلوا.
تاني يوم بقى جت العروسة هي وصاحباتها. حطوا بقى في البيت اللمسات كده الانثوية. غيروا كده في نظام الحاجات اللي الرجالة عملتها شوية. حطوا وردة تابلوه مش عارفة ايه الحاجات كده. اللمسات اللطيفة بتاعة البنات. العريس بيقول لما دخلت الشقة اتفاجئت بجمالها. رغم ان الحاجة هي هي ما اتغيرتش
لكن العروسة والبنات قدروا بلمسات بسيطة جدا يدوا للحاجة بهجة.
هي دي الانوثة. انك تقدري تعملي بالحاجات البسيطة العادية تقدري تديها روح تديها بهجة. تخلي لها معنى وتخليها احلى.
حاجة كمان الانوثة يعني السلام الداخلي.
كل ما كنت هادية من جوة كل ما كنت راضية عن حياتك سعيدة. كل ما انوثتك بتزيد.
طيب انا ازاي اقدر اوصل للسلام الداخلي ده؟
ان انا اقوي علاقتي بربنا سبحانه وتعالى.
ان انا اكون دايما متوكلة على ربنا سبحانه وتعالى معتمدة عليه وعارفة ان هو مش عايز لي غير الخير.
وكل ما كان اتصالك بربنا سبحانه وتعالى عالي كل ما كان السلام الداخلي جواك اعلى وكل ما زادت انوثتك
حاجة كمان نتعلمها ان الانوسة يعني الهدوء. ولازم تبقي عارفة كويس جدا ان العصبية الزايدة بتفقدك جزء كبير جدا من انوثتك.
لاتنسي الاشتراك في قناه جنتي من هنا
