ينفع أقول لمراتي الحقيقة بعد ١١ سنة؟!
لما بدأنا نرتبط في الأول خالص، حبيبتي سألتني إيه أكتر أكلة بحبها عشان تعملهالي؟ وقتها كان عمرنا 18 سنة.
قلتلها إن أكتر أكلة بحبها هي “فراخ بارميزان”.
هي فعلاً طبختها عشاني، وكان طعمها لذيذ. بس اكتشفت إني اتلغبطت في أسم الأكله و اللي كنت عايز أقوله فعلاً هو “فراخ الفريدو”.
حسيت بالذنب إنها تعبت نفسها عشان تعمل الأكلة اللي فاكرة إني بحبها، عشان كده سكت خالص ومصححتش المعلومة.
نرجع للوقت الحالي.
دلوقتي إحنا مع بعض من 11 سنة، ومتجوزين، وكل شهر تقريبًا بتعمللي فراخ بارميزان لأنها فاكرة إن دي أكتر أكلة أنا بحبها. هي فعلاً حلوة، بس مش أكتر أكلة بحبها.
في المرحلة دي، أكيد فات الأوان إني أقولها الحقيقة، صح؟
🌿 تحديث:
في الآخر قررت أقول الحقيقة.
عمري ما شفت مراتي بتضحك بالطريقة دي قبل كده.
كل ما كنت أفتكر إنها خلاص خلصت كل الضحك، كانت تبدأ تضحك من جديد.
دلوقتي بقى عندنا نكتة حلوة هنفضل نضحك عليها طول عمرنا.
🌿 ده تعليق مكتوب علي ريديت:
ماما بقالها حوالي 45 سنة بتعمل فلفل محشي بانتظام.
في يوم من حوالي 6 سنين، عرضت عليّا شوية فلفل محشي كانت حاطاه في الفريزر. شكرتها وقلت: “لأ شكراً، أنا مش بحبه أوي”. فقالت: “وأنا كمان”.
بعدين سألت بابا لأنها عارفة إنه بيعشقه. رد وقال: “لأ شكراً، بصراحة أنا مش بحبه”.
ماما اتصدمت!
كانت بتعمل الفلفل المحشي بقالها 45 سنة عشان بابا! وهو عمره ما قال حاجة لأنه ماكنش عايز يزعلها. وطلع في الآخر إن ولا واحد فينا بيحبه، وكلنا قضينا سنين طويلة بناكله من باب الذوق بس.
لحد ما ف يوم، قررنا كلنا نعترف بالحقيقية!
الموضوع بقة نكتة ظريفة في عيلتنا دلوقتي، وماما وبابا بيستخدموها كمثال على الحاجات اللي بنعملها عشان الناس اللي بنحبهم ❤️
على الأقل الراجل اللي فوق كان عاجبه الأكلة، حتى لو ماكنتش المفضلة عنده، وكمان الموضوع استمر معاه 11 سنة بس!
⚘️ قصة جديدة:
أنا لسه ناقل جديد ل (نيفادا)، وكان معايا أصحابي بيساعدوني في النقل، إحنا سيبنا شوية حاجات على الرصيف جنب عربية النقل، وكنا بنشيل الحاجات التقيلة الأول زي المكاتب والرفوف وكده.
خرجت أنا واصحابي (بعد حوالي 15 دقيقة)، ولقيت واحد شايل الكنبة بتاعتي وحاططها في صندوق عربيته النقل.
جريت عليه وشرحت له إن الكنبة دي بتاعتي.
رد عليا وقال، طالما كانت على ناصية الشارع فهي تعتبر ملكية عامة، وإنه من حقه ياخدها. وقبل ما أقدر أوقف عربيته، كان مشي وسابني 😳
لحقت أكتب رقم لوحه العربية ورحت أعمل بلاغ في القسم، لكن سألوني إذا كانت الكنبة فعلًا على الرصيف؟ فقلت اه….بس كان واضح جدًا إنها جنب عربية النقل، وكانت متغلفة وحواليها كراتين.
قولت كمان إني بلغت الراجل إنها بتاعتي.
بصراحة الشرطة ما قالوش أي حاجة تخليني أتفائل.
الكنبة دي بقالها 3 أجيال في العيلة، ومع إنها ما تساويش فلوس كتير، بس قيمتها العاطفية ما تتقدرش بثمن.
حد عنده أقتراح أعمل ايه عشان أرجع الكنبه بتاعتي؟
🌿 تحديث:
شكرًا للشخص اللي اقترح عليا أدور في الفيسبوك.
أنا فعلا عرفت اسم الراجل اللي أخدها (أنا دورت علي صوره الكنبه ولقيتها، كان عارضها للبيع علي الماركت بليس).
أخدت المعلومات ووديتها للشرطة، وطلع إن الراجل ده متقدم فيه بلاغات تانية بخصوص سرقات صغيرة.
كمان واحد من اصحابي اللي ساعدوني في النقل اكتشف إن جيراني عندهم كاميرا صورت كل حاجة، وقدرت أخد دليل للشرطة، إن الراجل سرق الكنبة وأنا واقف هناك جنب عربية النقل والكراتين.
الشرطي اللطيف راح لبيت الراجل واخد منه الكنبة بتاعتي، وكمان لقى شوية حاجات تانية مسروقة.
أنا الحمد لله دلوقتي فرحان 🥰
(القصص مترجمة من ريديت..أصحاب القصة أجانب).
