هل من حقي اطلب ثمن تورته حفل الزفاف من صاحبتي , بعد ما وعدتها انها هديه؟؟؟
انا عمري 34 سنه
عندي صاحبه اسمها (ماري) عمرها 33 سنه
احنا اصحاب من زمان
ماري هتتجوز كمان اسبوعين
هي سألتني لو ممكن اعملها تورته حفل الزفاف؟؟؟
اتحمست قوي ووافقت وقولتلها ان التورته هتكون هديه مني
***(علي فكره انا اصلا بقالي فتره برفض اعمل اي كيكه للعيله او الاصدقاء لاني حامل وعندي كمان طفل عمره سنه , وحاليا بدرس الماجستير علشان اقدر اترقي واكون مديره مدرسه)
ماري عرضت عليه فلوس مقابل التورته وانا رفضت
قولت الكلمه دي بمنتهي الوضوح “التورته هديه زفافك”
بدأت انا وماري نعمل تصميم التورته
ماري طلبت ان التورته تكون اربع طبقات
(ابيض وشيكولاته واصفر وليمون)
كمان عايزه ورد وزينه من عجينه السكر
كمان 3 كريمات زبده بنكهات مختلفه
طبعا الطلبات كثير قوي
بس علشان انا واخده اجازه لمده سنه علشان حملي
كان عندي وقت ووافقت علي تنفيذ طلبها.
روحت حفل توديع العزوبيه الخاص ب ماري
وصيفه العروس سألتني علي الهديه الي ناويه اجيبها ل ماري؟؟
قولتلها اني هعملها التورته مجانا
البنات وقتها قالولي ده هديه مميزه قوي وغاليه
واتمنوا لو حد كان عمل معاهم كده
بعد الحفله ماري بعتتلي رساله وقالتي ليه مجبتيش معاكي هديه زفاف ؟؟
=قولتلها انتي عارفه ان التورته هي الهديه
وفكرتها اني هعملهالها مجانا
*قالتلي لاء دي مش هديه دي خدمه!!!
وان الهديه لازم تكون حاجه تستخدمها في جوازها
مش تورته وخلاص
=قولتلها انا حاليا مش بشتغل لاني واخده اجازه
ورغم كده اتحملت لوحدي تكلفه التورته
*قالتي دي مش مشكلتي والصديقه الحقيقيه لازم تجيب هديه
=قولتلها خلاص سبيني افكر وهرد عليكي
بعد نص ساعه بعتلها فاتوره بتكلفه التورته
الفاتوره كانت ثمنها 700 دولار
وقولتلها لازم تدفع علي الاقل 350 دولار دلوقتي
وبعدها قدامها اسبوع تكون سددت باقي الفاتوره
*ردت عليه و قالتي ايه سبب الكلام ده؟؟؟
=قولتلها مش انتي قولتي انها مش هديه
خلاص يبقي ادفعي تكلفه التورته
واوعدك اني هجيبلك هديه كويسه
*قالتلي بس انا مش هقدر اتحمل التكلفه دي
=قولتلها والله دي مش مشكلتي ده شغلي
*قالتي بس مفيش تورته بتتكلف 700 دولار
=قولتلها التكلفه دي علشان
المكونات والنقل لان مكان الحفله بعيد عن بيتي 45 دقيقه
وكمان العماله الاضافيه
وجوزي بيساعدني في التوصيل وهو كمان بياخد اجر
ده غير الحجز علي اخر وقت
ده غير ان حجم التورته كبير قوي والاشكال الكثير الي هنفذها بعجينه السكر!!!
*قالتلي انا مش هدفع اي حاجه , انتي وعدتيني بتورته مجانيه
وخلاص مفيش وقت ادور علي حد اني يعملهالي
=قولتلها دي مش مشكلتي
*قالتي طيب خلاص اعمليها مجانا وانسي موضوع الهديه
=قولتلها للاسف العرض خلاص انتهي
ومردتش ارد علي رسايلها بعد كده
الي عرفته بعد كده ان ماري وخطيبها عاملين مجموعه بيكلموا فيها مع اصحابهم
والكلام الي وصلني انهم بياخدوا رأي الاصدقاء في الي حصل
والناس منقسمين
في ناس بيقولوا لازم اعمل التورته مجانا زي ماوعدت
وفي ناس بيغلطوا ماري وبيقولوا انها حطت نفسها في ورطه
جوزي اصلا مش بيحب ماري من زمان
هو دلوقتي واقف في صفي وبيقولي حتي لو هتخسري صداقتها
اوعي تعمليلها اي حاجه مجانا
دلوقتي انا فعلا محتاره ومش عارفه ايه التصرف السليم في الحاله دي
ياريت تساعدوني؟؟؟
#تحديث
ماري وخطيبها توم حصل بينهم خلاف كبير
واضح ان ماري دفعت فلوس كثير قوي اكثر من الازم علشان الفرح
ماري كانت قايله ان خطيبها وعيلته هما الي هيدفعوا كل تكاليف الفرح
توم خطيبها مهندس ومن عيله غنيه جدا
مش عارفه ايه مصدر ثروتهم
بس الي اعرفه ان توم واخواته كانوا في كليات غاليه جدا
الي مكناش نعرفه
ان ماري وخطيبها كانوا طول الوقت بيتخانقوا علشان تكاليف الفرح
وان التورته بتاعتي كانت القشه الاخيره
المفروض ان ميزانيه الفرح كانت 30000 دولار
لكن واضح ان ماري دافعه لحد دلوقتي ضعف المبلغ ده
علشان الفستان والديكورات والزهور والصور والاكل والرفاهيه
وكمان حجز طيران لعيلتها
وكمان تكاليف المكان الي عيلتها هتقعد فيه
ده غير ان الفرح اصلا هيتعمل في قصر فخم جدا
انا شوفت صورته علي النت
عندنا صديقه مشركه اسمها (بام ) وهي مخطوبه
خطيبها يبقي صاحب العريس المقرب
توم العريس كان بيحكي لصاحبه وبيشتكيله طول الوقت من بذخ ماري
بام قالتلي ان العريس دلوقتي رافض يدفع تمن التورته
مش علشان هو ميقدرش علي تمنها
بس علشان هو خلاص اتخنق من طلبات ماري ومش مستعد يدفع ولا دولار واحد زياده
وقالها اتصرفي انتي انا مليش دعوه
دلوقتي مفيش اي حد يعرف ايه الي هيحصل
وهل الزفاف هيتعمل ولا لاء
وماري متواصلتش معايه علشان تقولي اعملها التورته ولا خلاص
علي فكره انا عارفه انتوا دلوقتي اكيد بتسألوا هو وضع ماري المادي ايه؟؟
ماري من الطبقه المتوسطه
عارفه ان كل الناس
ممكن تفكر ان ماري طمعانه في فلوس خطيبها
بس اعتقد ان ده مش حقيقي
هي بتسوق نفس سيارتها القديمه من 10 سنين ومغيرتهاش
رغم ان خطيبها طلب منها تغييرها (وده دليل انها مش طماعه)
انا لما اتجوزت , جوزي قالي اعملي في الفرح اي حاجه تخليكي سعيده
يمكن هي كمان خطيبها قالها نفس الكلام
خصوصا انه فعلا بيدفعلها كل الفلوس الي هي عايزاها
انا علي حسب معرفتي بماري بأكد انها فعلا مش انسانه طماعه
ابدا
#تحديث
زي ماقولت قبل كده
ماري اصلا مش انسانه طماعه بالعكس هي اصلا بتعرف تحافظ علي فلوسها كويس
علشان كده كلنا مستغربين انها مصممه علي هديه وكمان عايزه التورته مجانا!!!
الي عرفناه بقه ان ماري اصلا كانت بتحاول توفر الفلوس علي اد ماتقدر
علي الرغم ان الميزانيه وصلت الضعف
عائله خطيبها متعودين دايما علي الحفلات الغاليه الشيك
علشان كده توم اكد عليها ان الفرح لازم يكون فخم
علشان يناسب عيلته
هما بيحبوا يتفاخروا بالفلوس قدام الناس بالطريقه دي
المشكله بقه ان توم مكنش بيدخل في اي حاجه
هو بس بيقولها وفري فلوس علي اد ماتقدري علشان انتي شاطره في ده
كل ما ماري تختار حاجه رخيصه شويه
متعجبش خطيبها
ويقولها عايز حاجات اشيك. عمل كده في اختيار
المكان والورد حتي الفستان قالها لازم تختاري واحد مرصع بالجواهر
يعني الحقيقه ان ماري كانت بتحاول علي قد ماتقدر تلتزم بالميزانيه
بس الحاجات الي كانت بتختارها ماكانتش علي ذوق خطيبها
ولما انا طلبت منها 700 دولار
خطيبها اتهمها انها مش عارفه توفر الفلوس
الي عرفته بقه ان المشكله اصلا كانت في خطيبها مش في ماري
وهو الي خلاها تقولي اني لازم اجيب هديه كمان
غير التورته المجانيه
وهو الي صمم انه مش هيدفع تمن التورته!!!
ماري زعلت جدا لانها حاسيت ان التورته دي كانت هي الحاجه الوحيده في الفرح الي علي ذوقها
و زعلت مع خطيبها وهما دلوقتي مش بيتكلموا
الي مزعل ماري كمان
ان خطيبها لما اشتكي لخطيب بام (الي حكالنا بعد كده كل حاجه)
ماري حاسيت ان شكلها وحش قدامنا
وخطيبها خلاها تبان قدامنا جشعه وطماعه وهي فعلا مش كده بالعكس
هو لو مكنش ادخل كانت هي هتعرف تعمل فرح كوبس بميزانيه اقل بكتير
ماري بعتلي رساله اعتذار
وانا قبلت اعتذارها
ماري كتب رساله علي حسابها علي التواصل الاجتماعي
وقالت ان الفرح اتأجل ,واعتذرت عن الازعاج
من بعدها وهي مختفيه , هي غالبا عند اهلها , و مش بترد علي اي حد خالص
خطيب بام بيقول ان العريس زعلان جدا لان فلوسه كلها موجوده في حجوزات الفرح
انا حقيقي معرفش هما انفصلوا ولا لاء , كل الي اعرفه ان الفرح اتأجل…..
#قصص
