هديه الزفاف!!!
#حواديت_الاجانب
انا عمري 32 سنه
عندي عمل تجاري ناجح في نيويورك
خطيبتي عمرها 26 سنه
احنا محددين ميعاد الزفاف في يونيو 2025
انا وضعي المادي كويس جدا 💵💵💵
ولسه شاري بيت جديد هنعيش فيه بعد الجواز 🏡
انا قريب قوي من اخويه الاصغر مني الي عمره (30 سنه)
انا وهو طول عمرنا بنحب بعض قوي , هو مش بس اخويه لاء هو كمان اقرب صاحب ليه 👬
اخويه اتجوز في شهر ابريل الي فات
قررت اعمله مفاجاه حلوه يوم الزفاف واجيبله ساعه رولكس كان نفسه فيها من زمان ⌚
طبعا ماكنش متوقع الهديه و فرح بيها قوي
وفرحته خليتني انا كمان سعيد لان اخويه ده روحي وحبيبي 💙
دلوقتي انا عندي مشكله
اخو خطيبتي اتجوز من اسبوعين
قبل حفل زفافه خطيبتي قعدت كل شويه تلمح ان اخوها بيحب قوي الساعات الرولكس
كل شويه تعيد نفس الكلام
بصراحه ما اهتمتش قوي بكلامها.
يوم زفاف اخو خطيبتي قررت اجيبله هديه “بطاقه ائتمانيه مسبوقه الدفه” بقيمه 2000 دولار
*(بطاقه مشتريات يقدر يشتري بالمبلغ الي فيها اي حاجه هو عايزها)
اعتقدت انها لفته كريمه مني
وكان باين علي العريس ان راضي بالهديه.
لكن بعد الزفاف بدات خطيبتي تتعامل معايه بطريقه غريبه
و انهارده اعترف انها حاسه بخيبه امل مني !!!
فهمت من كلامها انها اقنعت نفسها اني هجيب لاخوها ساعه رولكس زي ما عملت مع اخويه , و الاسوأ انها لمحت لاخوها واصحابها قبل الفرح اني هجيب هديه فاخره جدا زي الساعه الرولكس!!!
دلوقتي هي بتقولي اني بخيل علشان جيبت لاخوها هديه ب 2000 دولار بس , وهي شايفه ان ده لا يقارن بهديه اخويه الي ثمنها 20.000 دولار
انا زعلان ومصدوم الحقيقه
ومش عارف مين الي اقنعها اني هدفع لاخوها كل الفلوس دي!
علي فكره انا بحب اخوها بس اكيد مش هقارنه بأخويه
انا شايف ان ال 2000 دولار هديه قيمه جدا وهي بتتجاهل الحقيقه دي
دلوقتي انا بفكر جديا في العلاقه.
ماكنتش متخيل انها هتضغط عليه كده وتقعد تحاسبني علي فلوسي
انا بفكر اواجهها بس عايز اعرف رأي الناس الاول؟؟؟
🌹#تحديث
مر كام يوم علي كتابتي للرساله الاولي , عايز ارد علي الاسئله:
🌿اولا في ناس انتقدوني وقالوا اني قدمت الهديه لاخويه بس , و ده مش صح الهديه لازم تكون حاجه للعروسين من بعض مش للعريس لوحده..
للتوضيح انا قدمت لمرات اخويه هديه تانيه منفصله “طقم ذهب” من العلامه التجاريه المفضله ليها.
🌿ثانيا ناس كتير اتكلمت عن خطيبتي بطريقه قاسيه وسألوا هي بتشتغل ولا لاء؟
هي لسه بتكمل الدكتوراه بس اكيد هيجيلها عروض شغل كويسه جدا بمرتبات ممتازه لما تخلص الدراسه.
🌿اما بالنسبه لفرق السن ما بينا
هو 6 سنين وانا شايف انه فرق مش كبير قوي , وزعلت من الناس الي بتتصور ان خطيبتي معايه بس علشان فلوسي
🌿والناس الي سألت عن هديه خطيبتي لاخويه في زفافه؟
هي جابت هديه ثمنها حوالي 1000 دولار
🌹نتكلم عن الي حصل دلوقتي🌹
طلبت من خطيبتي تقابلني علي العشاء
اتقابلنا في مطعم لطيف
وبعدها قعدنا في مكان هادي واتكلمنا في التوتر الي حصل بينا بعد فرح اخوها
بدأت فورا تلومني وتتهمني اني احرجتها وأهنت اخوها بالهديه دي
في اللحظه دي فقدت اعصابي , وفكرتها بكل الحاجات الي عملتها علشانها طول السنين واني سايبها تعيش بشكل مجاني في شقتي القديمه رغم اني ممكن اعرضها للايجار ب 3500 دولا في الشهر او اكثر.
بصراحه كنت مرهق ومش قادر اتجادل معاها اكثر من كده
علشان كده فتحت معاها موضوع اتفاقيه قبل الجواز
رد فعلها كان عنيف قوي
بان عليها الذهول وقعدت تصرخ واتهمتني اني بفكر انها طمعانه فيه
وكانت غضبانه علشان حاسيت اني بفكر في الانفصال عنها.
بعد جدال استمر لاكثر من ساعه
قولتلها انا محتاج وقت افكر في علاقتنا
سألتني انت عايز تنفصل عني؟
قولتلها …….اه
سكتت شويه وبعدين سألتني ناوي تعمل ايه في خاتم الخطوبه؟
قولتلها تقدري تحتفظي بيه
قالتلي والشقه الي هي حاليا فيها؟
قولتلها ممكن تقعدي فيها لغايه اخر شهر اكتوبر و بعد كده لازم تدوري علي مكان جديد تعيشي فيه.
شكلها كان مصدوم من اجابتي
ومش عارف هي كانت متوقعه مني ايه!!!
باختصار انتهت علاقتنا
امبارح حاولت تتصل بيه
بس انا كنت في اجتماع ومردتش عليها
بعدها بعتتلي رساله بتقولي ممكن نقابل يوم السبت؟ انا وافقت
بس خلاص انا اخدت القرار ومتأكد اني مش هرجع لها تاني
والدها اتواصل معايه , انا وهو طول عمرنا بنحترم بعض
وهو كان متفهم موقفي واتمنيلي التوفيق.
ماما مش فرحانه لانها كانت قريبه من خطيبتي
وانا مش عايز اقولها عن السبب الحقيقي للانفصال
طبعا انا مضايق دلوقتي خصوصا بعد الوقت والطاقه الي استثمرتهم في العلاقه دي
لكن بصراحه انا مرتاح ان ده حصل دلوقتي احسن ماكان يحصل بعد الجواز
انا مش ناوي اتسرع وادخل علاقه جديده غير لما الاقي الانسانه المناسبه
دلوقتي انا هستمتع شويه بحياه العزوبيه……….
🌹#تحديث
الناس طلبوا مني تحديث جديد وبصراحه ماكنتش متوقع اكتب حاجه تاني
🌿بتسألوا عن خلفيتي الثقافيه
انا من اصل باكستناني وخطيبتي نص سويسرية ونص ألمانية
🌿الناس الي بتقول ان خطيبتي بتكذب عليه في موضوع الدكتوراه
لا انا بأكد ان ده حقيقي وهي فاضلها بس 2 تيرم وتاخد الدكتوراه.
🌿في بدايه التعارف هي ماكنتش تعرف حاجات كتير عن وضعي المادي
علشان كده انا عارف انها ماحبتنيش بس علشان فلوسي
اكيد لما عرفت الوضع اتغير بس ده ماكنش الدافع الوحيد بالنسبه لها في الاول
🌹زي ماقولت في الرساله الاولي هي طلبت مني نتقابل
انا في الاول وافقت بس بعد كده غيرت رأي وقولتلها خلينا نتكلم في التليفون وخلاص
قالتلي انها هتسيب الشقه في 15 اكتوبر وعرضت عليه ترجعلي الخاتم , بس انا رفضت
واحنا بنتكلم قالتلي انها بتفتقدني وانها ندمانه علي تصرفها معايه
وقالتلي انها لو تعرف موضوع اتفاقيه الجواز من الاول خالص كانت هتتعامل مع الموضوع بشكل ناضج اكثر وكان ممكن هتوافق.
باختصار كانت ندمانه جدا
واضح انها فاهمه انها غلطانه
سألتني لو ممكن نفضل اصدقاء
وافقت
بس بصراحه انا عارف ان صعب يكون في بينا اي تواصل في المستقبل
قولتلها ان كل حاجه بتحصلنا خير و اتمنيت لها التوفيق
وودعنا بعض
🌿كل الناس قالولي لازم اقول لوالدتي عن السبب الحقيقي للانفصال
لما حصل الموضوع ده امي كانت مسافره بلد تانيه , علشان كده ماكنش في فرصه نتكلم مع بعض كتير.
لما رجعت اتكلمت معاها وشرحت كل حاجه بالتفصيل
اتصدمت لما عرفت واستغربت جدا لاني خطيبتي من بعد الانفصال وهي بتكلم ماما كل يوم عادي جدا وبتتعامل كأنها لسه خطيبتي
حتي بتتكلم عن ميعاد الزفاف كأنه مش ملغي
انا مش متأكد من الدافع الحقيقي لتصرف خطيبتي.
امي دلوقتي فاهمه وجه نظري , وبتدعمني في قراري.
بشكل عام انا واثق اني اخدت القرار الصحيح 👌
