مليونير في غمضة عين 💸✨💰
أنا راجل عندي بيزنس خاص شغال عليه من سنين طويلة. فجأة ربنا كرمني واتفقت على صفقة كبيرة وكسبت مبلغ خرافي. مش هقول كام بالظبط، بس ملايين. حتى وأنا بكتب الجملة دي دلوقتي لسة مش مصدق نفسي… المبلغ ده كافي إنه يغير حياتي وحياة عيلتي كلها.
مراتي السابقة وأم اولادي الاتنين. ست عظيمة بكل معنى الكلمة. وقلبها طيب قوي. إحنا اتطلقنا من ٦ سنين تقريبًا بسبب إني خنتها مع مراتي الحالية. بصراحة أنا بعترف اني غلطت غلطة عمري. وللأسف طليقتي اتوجعت جدًا بسببي واتصدمت فيا
ورغم كده فضلت زي الملاك وسمحتلي أشوف أولادي “اللي هما كل حياتي”، وعمرها ما قالت كلمة وحشه عليا قدامهم. ده غير انها خلت إجراءات الطلاق سهلة جدًا وماحبتش تعقد الأمور.
هي لحد دلوقتي لسه قريبة جدًا من أهلي، ولسه بتعاملني باحترام بس هي رافضة تمامًا تتعامل مع مراتي الحالية.
عارف مين كان أول حد كلمته بعد ما كلمت أمي وأبويا علطول لما عرفت إني بقيت مليونير؟ ايوه بالظبط! مراتي السابقة. كانت فرحانة جدًا، وقعدت تهزر معايا وقالتلي: «خد بقه العيال واعملوا رحلة حولين العالم»،ومطلبتش أي حاجة لنفسها ولا لمّحت حتى.
أول ما اتحولي المبلغ، كنت عارف من جوايا إني عايز أديها جزء كبير من الفلوس دي. أنا فعلا بقدرها وبحترمها. هي أم عيالي وتستحق كل خير.
أنا حاسس إن ده أقل حاجة أقدر أعملها علشانها. كمان نفسي أعوضها عن الوجع اللي عاشته بسببي.
هي بتشتغل شغلانة مملة في مكتبة ومرتبها ضعيف جدًا. والفلوس دي هتخلي حياتها وحياة أولادي أحسن بكتير.
أنا لحد دلوقتي ما قلتلهاش علي المبلغ اللي ناوي ابعته لها، بس قولت لأهلي وهما موافقين جدًا، كمان المحامي بتاعي كان متفاجئ جدًا في الأول بس في الآخر وافق وقالي تمام أنا هرتب كل حاجة.
المشكلة دلوقتي في مراتي. لما قولتلها إني ناوي أدي جزء كبير من الفلوس لمراتي السابقة… اتجننت! قعدت تصرخ وتزعق وتقولي اني مش بعملها حساب ولا بحترمها، واتهمتني إني لسه بحب طليقتي.
الحقيقة أنا مش بحبها الحب الرومانسي اللي بيكون بين الراجل والست. لاء إحنا خلاص كل واحد فينا راح لحاله، بس طبيعي لسه بحبها كأم أولادي وشريكتي في تربيتهم.
مراتي دلوقتي بتهدد إنها تسيبني… وبصراحة. حاسس براحة غريبة جدًا إني مش مضطر أسمع الزن ده تاني لو فعلاً نفذت تهديدها.
أنا مش ناوي أغير قراري. عايز أساعد أم ولادي وأضمن لها حياة أحسن.
هل أنا كده غلطان وبتخلي عن مراتي؟
🔔 تحديث:
كلمت طليقتي وقلت لها على المبلغ اللي ناوي أحوّله لحسابها. كانت مصدومة ومتفاجئة جدًا ومش مصدقة، وقالت لي إن المبلغ كبير قوي. ومش من حقها تاخده.
قلتلها ده حقك لأنك ست وأم عظيمة ولازم تعيشي حياة أحسن. شَكَرَتني من قلبها وقالت لي إن أنا كمان أب ممتاز وحنين.
مراتي فضلت غضبانة فترة وهددتني إنها هتاخد نص ثروتي، وبعد فترة شكلها فكرت كويس وبطلت تهديد وقررت تكمل في الجواز. لسه علاقتنا فيها توتر واضح، بس أنا مش ندمان أبدًا على قراري… بالعكس، حاسس إني عملت الصح ❤️✨
___________________
مقتبسة عن قصة منشورة علي ريديت. أبطال القصة أجانب.
