تلميحات مراتي ✨
أنا راجل متجوز وعندي أطفال. مراتي عندها صفة غريبة شوية… بدل ما تطلب الحاجة اللي هي عايزاها علي طول بصراحة ووضوح، لاء تفضل تلمّح وتقول كلام يوصل اللي في دماغها، وعايزاني أنا أفهم طلباتها من غير ماتنطق!
يعني مثلًا لو عايزة تشرب حاجة ساقعة، ما تقوليش “ممكن تجيبلي حاجة ساقعة؟”، لأ، تفضل تقول: “ياااه الجو حر جدًا النهارده”، “إنت مش حاسس إن الدنيا حر؟”، “انت مش عطشان!”… وتستنى إني أفهم لوحدي وأقوم أجيب لها.
ولو سألتها: “تحبي أجيبلك حاجة؟” تقول: “لا لا، ماتتعبش نفسك، أنا تمام… بس لو انت نفسك في حاجة، روح اشتريها.”
المشكلة بقى حصلت الأسبوع اللي فات، كنا طالعين أنا وهي والأولاد نتغدى في مطعم لطيف، بعد ما خلصنا الغدا، بدأت تلمّح إنها عايزة تاخد حلويات بعد الأكل، قعدت تقول: “المطعم ده بيعمل حلويات شكلها يفتح النفس جدًا على فكرة”، “شايف الناس اللي في الترابيزة اللي جنبنا؟ شكل الحلو بتاعهم تحفة”، “أنا سمعت إن تشيز كيك هنا لذيذ!”
بس هي ما طلبتش بصراحة، ولا حتى قالتلي: “نفسي في كذا”.
الويتر جه وسألنا لو عايزين حاجة تاني، أنا والأولاد طلبنا حاجات، وهي قالت “لا شكرًا”.
رجعنا البيت، لقيتها قلبت عليا وقالتلي إن اللي حصل ده قلة ذوق، وإن مش من الرجولة إني ما خدتش بالي من تلميحاتها، وإنها حست إنها مش مهمة!!
قلت لها: “مش إنتِ قولتي لاء للويتر بنفسك!”
ردت وقالت: “ما أنا قولت لاء علشان أشوف هتتصرف ولا لاء! الراجل المفروض ياخد باله من مراته، مش يستناها تطلب!”
ومن ساعتها وإحنا بنتخانق ونتجادل، وأنا بصراحة تعبت! أنا بحبها ومش عايز مشاكل، ومش قادر أعيش كل يوم في قصه الفوازير دي. ما تقول علي طول اللي هي عايزاه.
تفتكروا أنا غلطان؟؟
🔔 تحديث:
قعدت أفكر كتير في الاخر قررت أكلمها بهدوء. قلت لها: “أنا مش ضدك والله، بس لو عايزة حاجة قوليها لي صراحة، مش عارف ايه الصعب يعني انك تكوني واضحة.”
هي سكتت شوية وبعدين ضحكت وقالتلي: “ماشي… هحاول أكون أحسن، بس برضه خليك ذكي كده وأفهم احتاجاتي مش لازم يعني كل حاجه أطلبها!”
ومن ساعتها، بدأنا نضحك كل مرة تقول تلميح، وأقول لها: “ده تلميح ولا طلب رسمي؟”
الحمد لله الدنيا بقت أخفّ وأهدى شوية…ربنا يهدي الحال يارب ❤️
