مش قادر ابطل تفكير فيها مهما حاولت
وكل ما بفتكر علاقتنا انتهت ازاي بزعل من نفسي قوي…………
انا راجل عمري 37 سنه
لما كنت في العشرينات
قابلت اجمل بنت في الدنيا كلها
(ليلي) الي كان عمرها وقتها 19 سنه
كانت جميله من جوه ومن بره
شعرها بني غامق بيجنن لما ضوء الشمس بيجي عليه
وعيونها البنيه ورموشها الي شبه باربي, وخدودها المليانه
عندها غمازه واحده بتبان لما بتبتسم
كانت اصغر مني بسنه
لكن كانت ناضجه عني و اذكي في كل حاجه.
كنا مع بعض لمده سنتين
باباها شرطي صارم
اول ما شافني بصلي بغضب بس بعد كده حبني
مامتها كانت بتعشقني
كانت دايما بتقولي تعليق مميز
“انها معجبه جدا بعيوني الخضراء الي بتبص لبنتها بكل رومانسيه”
كنت بحب مجاملتها ليه قوي
كنت دايما بلعب مع اخواتها لما بزورها
عيلتي كمان كانوا بيحبوا ليلي قوي
اخويه الصغير في نفس عمرها وكانوا بيدرسوا مع بعض, و بيساعدوا بعض في الدراسه
حتي كلبي كان بيحب ليلي اكثر ما بيحبني
ليلي كانت بتحكيلي احلامها
وانها ناويه تكون دكتوره اطفال علشان هي بتحب الاطفال قوي
ونفسها تكون ام
كانت طول الوقت بتحكي عن الاطفال وشكل اوضتهم والاسماء الي نفسها تسميها
انا كنت عايز احققلها كل الي بتحلم بيه
ونفسي انا وهي نتجوز واعمل معاها العيله الي هي بتتمناها
بعد سنتين ابتديت احس اني مش عايز اطفال
لاني كنت عايش مع عدد كبير جدا من الاطفال المشاغبين (اولاد عمي)
هما خلوني كرهت الفكره
كل ما افكر اني ممكن اكون اب احس بالرعب
انا مش عايز طفل صغير يبكي ويصرخ كل شويه
وبعدين يكبر ويبقي غضبان ومشاكس وبعدين مراهق مجنون وكل شويه بحال
انا رافض الفكره دي ومش عايز اتعرض لكل الضغط ده
انا عايز اسافر واعمل فلوس واكون حر 
في يوم مكنتش في وعيي وبدأت اتكلم مع ليلي في كل الي بفكر فيه ورفضي لفكره للانجاب
فاكر ان رد فعلها انها سكتت وبعدين قالتلي انها مش هتحاول تغيير رأيي , بس اكيد مش هتتخلي عن حلمها بالامومه
سخرت من كلامها وقولتلها احنا مش هنجيب اطفال!!!
قالتي انت حر وانا كمان حره . وانا مش هجبرك تعمل حاجه انت مش عايزها علشان متحسش انك تعيس!
وقتها حاسيت انها بتنفصل عني
رغم انها كانت هاديه وواضحه جدا معايه
بس انا فاكر اني حاسيت بغضب جامد
هي فضلت ساكته
وانا بصرخ فيها انا غبيه علشان عايزه تكون ام وان الاطفال مزعجين
وبدأت اهينها واقولها انها غبيه وضعيفه وان الامومه هتخليها مش عارفه تعيش حياتها
ليلي قالتي من فضلك اهدي واحنا خلاص مش متفقين ,و عايزين حاجات مختلفه في الحياه
كرهتها في الوقت ده علشان مكانتش عايزه توافق علي كلامي
وبدأت اضرب الجدار واخبط في الباب
وارمي الحاجات علي الارض
كانت شيفاني وانا بكسر في المطبخ والشقه من غير ما تتكلم ولا كلمه
سابتني وماشيت
يومها خسرت حب حياتي
لما اهلي عرفوا زعلوا مني قوي وماما كانت بتبكي
الكلام ده حصل من 15 سنه
من بعدها واي علاقه بدخل فيها بتنتهي بسرعه جدا
بسبب شغلي بسافر اماكن كتير
بس دلوقتي رجعت تاني للبلد الي ليلي عايشه فيها
الي عرفته ان ليلي اتجوزت واخدت الدكتوراه وعندها اطفال
اخويه فضل صديقها كام سنه بعد انفصالنا بس بعد كده كل واحد فيهم انشغل بحياته و اخويه كمان اتجوز.
انا دلوقتي رجعت بلدي
المكان الي حبيبت فيه ليلي وعشت اجمل قصه حب
مش عارف ابطل تفكير فيها
وحشتني قوي
انا مفتقد عطرها الحلو وشامبو الفراوله الي كانت بتستخدمه
ولون شعرها الجميل
هي عمرها 36 سنه دلوقتي
نفسي اصلح الامور معاها تاني
نفسي اشوفها واقولها انا بحبك انا اسف
بس مش عارف لو ينفع ولا خلاص فات الاوان
بعتلها رساله علشان اعرف لو ممكن نرجع نتكلم تاني
مكنتش متوقع رد منها
بس المفاجأه انها ردت علي رسالتي
اتكلمنا شويه وبعدين سألتها لو ممكن نتقابل؟؟؟
وافقت
انا في قمه سعادتي
بس متوتر جدا
هشوفها تاني بعد 15 سنه
ميعادنا بكره بليل بعد ماتخلص شغلها
خايف افسد الامور مره تانيه
انا مش مصدقك لغايه دلوقتي انها وافقت تقابلني
انا هستغل اي فرصه ممكنه علشان اصلح علاقتنا تاني
اشتريت لها ورد
واستخدمت العطر الي هي بتحبه
وقعدت ادرب نفسي علي الكلام الي ناوي اقوله لما اشوفها
عايز احاول اسيطر علي التوتر الي انا فيه دلوقتي
قابلتها… لسه جميله زي ماكانت طول عمرها
خست شويه عن زمان , و خدودها الطفوليه اختفت
بس هي نفس البنت الي وقعت في حبها من سنين
قعدنا واتكلمنا
بصراحه مكنتش عايز اتكلم كتير عن نفسي بس هي سألتني عن حياتي
الحقيقه انا مكنتش حاسس بنفسي ومش مصدق انها قدامي
لما شوفتها عرفت هي كانت وحشاني اد ايه
سألتها عن حياتها؟
قالتي انها اتجوزت من 11 سنه وعندها بنتين
واحده 8 سنين والتانيه 6 سنين
شوفت سعادتها وهي بتحكي عن بناتها
بصراحه وقتها حاسيت بالذنب والغيره
كان لازم اكون انا ابو بناتها
بس انا كنت غبي
سألتها عن جوزها؟؟
قالتلي انها ارمله
جوزها اتوفي لما كانت حامل في طفلتها الصغيره
الموضوع كان غير متوقع خالص بالنسبه لي
سألتها لو في حد تاني في حياتها؟
قالتلي لاء
كنت عايز اعرف منها ايه الي حصل بعد انفصالنا؟
قالتلي انها كانت حزينه قوي ومكتئبه لانها بنت حياتها كلها علي علاقتنا
وحاسيت ان انا حطمت كل احلامها فجأه
قولتلها هو انتي كنت خايفه علي حياتك مني في يوم الانفصال؟؟؟
قالتي لاء انا مكنتش خايفه علي حياتي او سلامتي منك
اعتذرتلها عن الي حصل
وقولتلها انا فعلا ندمان من يومها
قالتي انها خلاص سامحتني من سنين
ليلي طول عمرها متسامحه ولطيفه ودي من الاسباب اني بعشقها
سألتها لو ممكن تسمحلي ادخل حياتها مره تانيه
كانت متردده
وسكتت شويه
وقتها حاسيت بالذعر
وبعدين قالتي انها معندهاش مانع
بس لازم الاول ترجع تثق فيه علشان نقدر نكون مع بعض
حاسيت بشويه احباط
بس كنت خايف اضغط عليها ترفضني خالص
قولتلها اني هكون سعيد وانا في حياتها بأي طريقه ممكنه
ووعدتها اني هعمل كل الي اقدر عليه علشان اثبتلها اني استحق فرصه تانيه
انا فرحان برجوع ليلي لحياتي
نفسي اعيش معاها تاني ونحقق كل الي مقدرناش نحققه زمان
لسه قدامنا وقت نعمل كل الي نفسنا فيه
نفسي قريب اعمل تحديث واقول انا وليلي بقينا اسره واحده…….
(القصه حقيقيه مترجمه من ريديت , اصحاب القصه اجانب)
#قصص
