مسابقة بنت جوزي 🏆🤺
أنا (29 سنة) وجوزي عمره (32 سنة).
جوزي عنده بنت من مراتة السابقة عندها (12 سنة)، البنت رياضية وبتشارك في مسابقات “المبارزة بالسيف”.
علاقتي بالبنت كويسة قوي، هي عايشة مع مامتها، بس كل فتره بتيجي تقعد معانا، (عشان كده أنا قضيت وقت معاها كتير).
البنت عندها مسابقة يوم الخميس الجاي، وجوزي مسافر بكرة عشان يقعد معاها كام يوم الأول وبعدين يحضر معاها المسابقة. عادةً مكنش هيبقى عندي مشكلة في ده، بس أنا في الأسبوع الـ39 من الحمل (الشهر التاسع) و ده أول طفل ليا، وممكن أولد في أي لحظة، وأنا معنديش عيله.
طلبت منه مايسافرش واقترحت نبعتلها هدية بدل ما يروح. بس هو رفض ومصمم إنه لازم يسافر، وبيقولي إني هبقى كويسة، واقترح إن صاحبتي تيجي تقعد معايا الأيام دي عشان مبقاش خايفة.
والله لو في الظروف العادية ماكنتش همانع ابدا، وكنت حتى هشجعه، لكن أنا خايفة وعايزاه يكون معايا دلوقتي.
هو حاسس إن بنته هتزعل قوي لو مراحش المسابقة، وبيقول إنه لازم يحافظ على علاقته بيها، خصوصًا إنه منفصل عن أمها ودلوقتي كمان هيبقى عنده طفل جديد غيرها.
حاسّة بالذنب إني طلبت منه مايروحش، وحاسة إني أنانية لأن فعلاً بنته مهمة وأنا عايزة علاقتهم تكون كويسة، بس في نفس الوقت أنا مرعوبة جدًا من فكرة إني أولد وهو مش موجود.
هو قالي إنه كده كده هيروح لبنته مهما حصل، وإن طلبي ده مش منطقي.
مش عارفة، هل أنا فعلاً أنانية؟
🌿تعديل:
أكتر حاجة مخوفاني إني غالبًا مش هكمّل الأسبوع، الحمل بتاعي اصلا كان صعب جدًا، والدكتور قالي ان حالتي متصنفة انها حالة “عالية الخطورة” عشان عندي السكر. هو كمان مسافر بكرة وهيرجع الجمعة بالليل.
المفروض اني هولد يوم السبت بس أنا حاسه اني هولد قبل كده.
🌿تحديث:
الدكتور قرر إني محتاجة عملية قيصرية طارئة يوم الأربع. صاحبتي بجد ملاك، راحت معايا المستشفى وقعدت جنبي، بس ماكانش مسموح لها تدخل أوضة العمليات، فكانت طول الوقت بتحاول تتواصل مع جوزي. وماقدرناش نوصل له غير بعد ما بنتنا اتولدت.
أول ما عرف إن أنا والبنت بخير وكل حاجة تمام، ماكانش عايز يرجع. قال إننا كويسين دلوقتي، والمسابقة لسه يوم الخميس، فمفيش داعي يزعّل بنته، وإنه هيرجع يوم الجمعة زي ما كان مخطط.
كنت مرهقة ومش قادرة اتخانق في اللحظة دي، فسكت وماجادلتش معاه، لكن صاحبتي قالت عليه كل شتايم اللي خطرت على بالها. أكتر حاجة وجعتني بجد إنه ماطلبش حتى صورة لبنتنا ولا عمل مكالمة فيديو عشان يشوفها.
يوم الجمعة الصبح قالي إنه مش هيقدر يرجع لأنه حاسس إنه تعبان، ومش عايز يخاطر لانه (شاكك أن عنده كورونا). بصراحة الكلام ده كسرني قوي، سألته إذا كان مش عايز يرجع البيت أصلاً، قالي بطلي كلام فارغ.
في اللحظة دي كنت خلاص بجد زهقت وتعبت منه، قلتله انت حر أعمل اللي انت عايزه، بس أنا هقعد عند صاحبتي لما أخرج من المستشفى، عشان محتاجة أفكر في حاجات كتير.
هي أصلاً كانت بتتحايل عليا أروح أقعد عندها، عشان كده عارفه إنها مش هتضايق مني.
رد عليا ببساطة وقالي “ماشي روحيلها، وارجعي لما تخلصي “نوبة الدلع” بتاعتك دي.
أنا خلاص تعبت، ولا مرة سأل عن بنتنا أو حتى بين أنه مهتم بينا وأنا عامله عملية قيصرية. أنا اتربيت في دار رعاية، عشان كده أنا وحيده ومليش حد وده اللي خلاني أستحملت حاجات كتير عشان خاطر بنتي، كان نفسي يكون عندها عيله وتتربي وسط باباها ومامتها.
صاحبتي المقربة رجعت معايا بيتي هي ومامتها وباباها عشان يساعدوني أنقل أغراضي وأروح أقعد عندها.
من أول ماعرفت اني حامل في بنت، وأنا نفسي اسميها “فيوليت” علي اسم صاحبتي المقربة، لكن جوزي رفض وقالي انه اسم قديم. بس دلوقتي مفيش حد واقف جنبي وبيساعدني غيرها، عشان كده لازم اسمي بنتي علي اسمها.
هو ده حالي دلوقتي، بعاني من الام العاطفي والجسدي، بس الحمد لله أنا شايله بنتي بين ايديه.
قريب هكلم محامي عشان أسأله المفروض أعمل ايه؟
🌿تحديث:
لسه أنا وفيوليت قاعدين عند صاحبتي.
أنا اتواصلت مع محامي ورفعت قضية طلاق. كمان اتواصلت مع مراته السابقة وعرضت أبعت لها صور لـ “فيوليت” عشان بنتها تشوفها، لأن جوزي اللي هيبقى طليقي ماكانش مهتم يشوف أي صور.
واضح إنهم رجعوا لبعض تاني. عارفة إن كتير منكم كان شاكك في موضوع رجوعه لطليقته، وطلع فعلاً كان عندكم حق.
المحامي بتاعي عنده كل الرسايل اللي ممكن تفيدني في القضيه وفي موضوع الحضانة (مع إني أشك إن هيبقى في أي مشكلة اني أخد الحضانة الكاملة، خصوصاً إنه لحد دلوقتي حتى ماطلبش يشوف صورتها).
مش هعمل تحديث تاني خلاص..وشكرا لكل حد أهتم.
(القصة حقيقية مترجمة من ريديت..أصحاب القصة أجانب).
