جوزي السابق ومراته الجديدة عملوا لبنتي “دعامة ضهر” من الخشب والحديد وخلوها تلبسها غضب
عنها 😡😤
بنتي عندها تسع سنين، والحضانة مشتركة بينا “بنتي بتقعد عندي أسبوع وعند طليقي أسبوع”.
دلوقتي بنتي بتقول إن ضهرها بيوجعها ودراعها فيه تنميل. أنا حجزت لها معاد عند الدكتور يوم الاتنين.
حاولت أكون هادية وسألت طليقي ليه عمل كده؟
رد علي رسالتي، وقال إن مراته الجديدة ما عجبتهاش طريقة قعدة بنتي على ترابيزة الأكل!!
همّا مش دكاترة، وبنتي ما عندهاش أي مشكلة تستدعي إنها تلبس دعامة.
أنا حرفيًا عايز أق*تل الاتنين.
في طريقة أقدر أقدم بيها على “ميعاد سريع” في المحكمة أو أقابل قاضي؟ لأني مش عايزة بنتي تروح عندهم تاني.
لما اتطلقنا، موضوع الحضانة أخد وقت طويل عشان نوصَّل لاتفاق.
المكان “ولاية فلوريدا”.
🌿تحديث:
واحدة زميلتي في الشغل قالتلي إن ابن عمها محامي. اتواصلت معاه وساعدني.
جوزي السابق عمل نفسه مش فاهم حاجة في المحكمة، لكن القاضي خلي الزيارة تكون في وجود مشرفين، واتحكم عليه ياخد كورس في التربية.
وبنتي راحت علاج طبيعي.
بعد فترة، المحكمة رجّعتله حق الزيارة كاملة، لما أقسم إنه اتعلم الدرس وانه ندمان، وعشان دي أول غلطة، المحكمة وافقت.
أنا كنت معترضة، بس مفيش حاجة أتغيرت.
اشتريت لبنتي موبايل عشان تقدر تكلمني في أي وقت لو حصل حاجة.
أول زيارة عدت عادي، وفي الزيارة التانية حصل نفس الشيء تاني. المرة دي أجبروها تلبس دعامة من الحديد والقماش بدل الخشب، وكمان أخدوا منها الموبايل.
تاني يوم بليل، بنتي استغلت إنهم مش واخدين بالهم وخرجت، وراحت لجار في الشارع شغال ظابط شرطة. الجار اتصل بالإسعاف وزمايله في الشغل، واضطروا يقطعوا الدعامة ويشيلوها من عليها.
جوزي ومراته اتقبض عليهم، هما خرجوا من القسم بسرعة، بس عندهم محاكمة، وطفلهم الرضيع أتاخد منهم وموجود دلوقتي مع “خدمة حماية الطفل”.
وجوزي خسر حق الزيارة والحضانة.
________________
*قصة جديدة:
العربية بتاعتي 🚗
أنا شاب، كان عندي عربية “شيفروليه إمبالا 1967″ اشتريتها في 2019.
من كام شهر اشتريت أول بيت ليا، والبيت فيه جراج يكفي عربيتين ونص. أنا نقلت العربية للجراج وبدأت أفكها بالكامل عشان أعملها ترميم شامل. كان جسم العربية في ناحية، والشاسيه الناحية التانية، والجراج كله مليان قطع غيار.
من حوالي شهرين، حبيبتي جات تعيش معايا، وطول الوقت وهي بتكره العربية. هي عايزة تركن عربيتها في الجراج وطبعًا عشان العربية بتاعتي واخدة الجراج كله مفيش مكان لعربيتها.
بس أنا عندي أرض قدام البيت وفي أماكن كتير مناسبة تقدر تركن فيها تحت الشجر، أو حتى في الحظيرة لو عايزة مكان مقفول.
قولتلها العربية لسه محتاجة شغل، وبعدين مش هينفع أجمعها بسرعة كده وخلاص.”
المهم، كنت مسافر يومين في رحلة شغل تبع الشركة المحلية اللي بشتغل فيها. ولما رجعت، لقيت حبيبتي مبسوطة جدًا، بتعمللي أكل حلو، وشايلة كل شغل البيت، وكل حاجة تمام.
افتكرت في الأول إنها فرحانة برجوعي، بس بعدين اخدت بالي إن عربيتها مش مركونة في مكانها.
سألتها مركونة فين، فقالت لي “ما تقلقش، ركنتها في الجراج.” سألتها إزاي، قالت لي “روح شوف بنفسك.”
اكتشفت إني لما كنت مسافر، حبيبتي جابت ناس ونقلت كل حاجة تخص العربية، بما فيها الموتور، الجسم، الشاسيه، وكل القطع، وودّتهم لمقلب الخردة 😲
كنت مصدوم حرفيًا. أنا صرفت أكتر من 11 ألف دولار على العربية، ما بين قطع غيار جديدة، وتصليحات، وسعر العربية نفسها.
قولتلها إني هرفع عليها قضية بسبب اللي عملته، بس اتعاملت معايا كأني ببالغ. قولتلها إن كل حاجة خلصت بينّا، ولازم تاخد حاجتها وتسيب البيت.
بصراحة أنا كنت غضبان جدًا. وكلمت محامي.
أنا عندي كل الفواتير اللي تثبت الفلوس اللي صرفتها، وكمان كاميرات المراقبة في البيت مسجلة وهي بتدخل العمال وكانت واقفة وهما بياخدوا كل حاجة. فحاسس إن عندي فرصة كبيرة إني أكسب القضية.
أهلها وأصحابها مش سايبيني في حالي، بيقولوا إنها مجرد عربية قديمة خردة، وإنها مش هتقدر ترجع لي الفلوس اللي صرفتها، ولازم أنسى الموضوع.
بس أنا قضيت سنة ونص بحط وقتي، تعبي، وفلوسي في العربية دي، ومستحيل أسيب اللي حصل يعدي من غير ما آخد حقي. هل أنا غلطان؟
🌿تحديث:
من حوالي 20 دقيقة، أمها اتصلت بيا وقالت لي إني بخرب حياة بنتها عشان عربية تافهة. قولتلها هي اللي خربت حياتها بنفسها.
أنا بجمع كل الأوراق والمستندات اللازمة، وعلى وشك أروح قسم الشرطة وأقدم بلاغ، زي ما ناس كتير هنا نصحوني.
🌿تحديث:
رُحت قسم الشرطة وقدمت بلاغ رسمي ضدها بتهمة السرقة.
وريتهم كل الفواتير اللي عندي للعربية، وكمان تسجيل الكاميرات وهي بتدخل العمال ويسرقوها، بالإضافة لملكية العربية باسمي. قالولي إنهم هيتواصلوا مع التلات أطراف قريب (أنا، حبيبتي السابقة، والناس بتوع الخردة)، وإنهم ممكن يقدروا يرجعوا جزء من العربية أو كلها. دلوقتي مفيش غير إني أستنى.
🌿تحديث:
لقوا عربيتي أخيرًا!!
الناس بتوع الخردة كانوا حرفيًا بيحاولوا يخبوا العربية لما الشرطة جات تسألهم. كانت محطوطة على ونش، وكانوا ناويين يخبوها.
قالوا إن العربية بتاعتهم وإن عندهم ورق ملكيتها، بس طبعًا ما كانش معاهم أي حاجة تثبت كلامهم. الشرطة شافت رقم الشاسيه، وأثبتوا أنها عربيتي.
لسه ما قدروش يتواصلوا مع حبيبتي السابقة، بس شغالين على الموضوع.
أنا مبسوط جدًا إنهم لقوا عربيتي 🎉🥳🎊
(القصة مترجمة من ريديت، أصحاب القصة أجانب).
