ميدالية المفاتيح 🔑✨
أنا راجل. كنت مرتبط ب (آني) لمدة 8 سنين. وللأسف السنة اللي فاتت خنتها مع زميلتي في الشغل (چيس).
أكيد مفيش عندي أي عذر وبعترف أني غلطان. وعلي فكرة أنا فعلا أتعاقبت. لأن الخيانة خليتني أخسر شغلي ومعظم أصحابي، ده غير أني خسرت (آني) اللي كانت ست كويسة جدا معايا.
أنا استاهل كل اللي حصل، وأكيد مش بطلب من حد يتعاطف معايا.
آني لما اكتشفت الخيانة بعتتلي كل حاجتي على بيت أهلي. ما حاولتش حتي تواجهني ولا قالتلي ولا كلمة، هي قررت تخرجني من حياتها تمامًا من غير حتي عتاب.
وقتها كلمت كل الناس اللي نعرفهم وفضلت أترجاهم يخلوها توافق تكلمني، وبعتلها مئات الرسايل علشان أقولها قد إيه أنا ندمان وأمنية حياتي أنها تسامحني وترجعلي. بس هي للأسف ما ردتش عليا ولا مرة واحدة حتي.
“چيس” شافت الرسائل اللي ببعتها ل “آني”، وده طبعًا سبب مشاكل كتير بينا، بس بعد كده عرفت أنها حامل، فقررنا نتخطي الموضوع ونركز علي طفلنا اللي جاي.
أنا دلوقتي ملتزم 100%، ومش ببص حتي على أي ست تانية. وخلاص اتعلمت وحرمت.
قبل ما “چيس” تولد بكام يوم (كانت خلاص في آخر أيام الحمل)، وقتها شفت “آني” في مكان بالصدفة. دي أول مرة نتقابل فيها من ساعة ما انفصلنا.
هي اتعاملت معايا بمنتهي البرود، لكن قالتلي إنها لقت “ميدالية مفاتيح” كان جدي جايبهالي وأنا صغير. هي تمنها مش غالي قوي، بس” آني” عارفة إن الميدالية دي غالية عليا قوي.
قالتلي إني ممكن أعدي عليها في البيت يوم السبت علشان آخدها .
قلتلها إن “چيس” غالبًا هتكون ولدت (من 4 أيام ) في الميعاد ده. ولازم أبقى معاها في البيت.
“آني” قالتلي خلاص انت حر يا تيجي تاخدها يوم السبت الصبح. يا هرميها في الزبالة.
قولتلها خلاص هعدي عليكي واتفقنا علي الميعاد.
ابني اتولد متأخر شوية عن ميعاده، هو اتولد يوم الجمعة.
چيس كانت لسه في المستشفى، فقولت خلاص قبل ما أروحلها الصبح. هعدي علي آني بسرعة أخد منها الميدالية وأمشي علي طول. لكن لما وصلت، طلبت مني أدخل وقالتلي إنها حابة تتكلم معايا عن نهاية علاقتنا.
اتكلمنا واتعاتبنا وأنا أعتذرتلها واتفقنا خلاص نقفل الصفحة دي. وهي أقبلت أعتذاري واتمنت لي التوفيق مع عيلتي الجديدة.
وأحنا علي الباب هي سلمت عليا بحماس جامد. وأنا كمان ودعتها بنفس الحماس وكنت حاسس بالراحة علشان هي قبلت أعتذاري.
بعدها رحت على المستشفى. وطبعا ماكنتش ناوي أقول لـ چيس أني زورت آني، علشان ماتحسش بالغيرة وتعملي مشكلة.
لما وصلت المستشفى، اكتشفت إن چيس بلغتهم يمنعوني من الدخول عندها، ومديرة القسم رفضت تقولي السبب.
في الآخر، جالي فرد أمن وخرجني من المكان. لأني كنت عمال أزعق ومصدوم ومش فاهم ايه اللي بيحصل وليه بيحرموني أشوف ابني!
فضلت أتصل ب چيس ومامتها، ومفيش حد عايز يرد عليا. وفي الاخر چيس بعتتلي فيديو. الظاهر آني اللي كانت بعتاه لچيس
الفيديو متصور من الكاميرا اللي قدام باب آني. وأنا ظاهر في الفيديو وأنا بدخل بيتها الساعة 9:30 وبخرج حوالي 10:15. والفيديو بيوحي أن في حاجة بينا.
كمان آني بعتت كلام كدب وماحصلش. وقالت ل چيس: مبروك هتعيشي مع الراجل الخاين ده عمرك كله، وزي ما خاني معاكي.. دلوقتي خانك معايا.. يا رب تكوني مبسوطة بالراجل اللي كنتي بتحلمي بيه.
دلوقتي مفيش حد مصدق إن ده كان فخ. وأن آني بتشوه سمعتي وبتكدب.
الكل بيقول مستحيل آني تعمل كده، وأنا نفسي ماكنتش متخيل إنها ممكن تنتقم مني بالطريقة دي.
بعَتّ لها رسالة بسألها ليه عملتي كده؟ كنت متوقع إنها حظرتني. لكن المفاجأة إنها ردت وقالتلي:
“مش هسيبك تلعب دور البريء أنت عارف أنك خنت چيس معايا. وأكيد مسحت كل الرسايل اللي كانت بينا طول الشهور اللي فاتت.”
طبعًا مفيش أي رسايل بينا وهي مصممة تكدب، وأنا مش عارف أمسك عليها دليل. ومش لاقي طريقة أبرّئ بيها نفسي.
هي فضلت ساكتة تقريبًا سنة كاملة، وبعدين نفذت أبشع وأقسى انتقام ممكن يخطر على بال حد.
أنا شفت ابني مرة واحدة بس، ودلوقتي چيس رافضة تمامًا تتواصل معايا ومش راضية تخليني أشوفه.
القضية اللي في المحكمة لسه هتاخد شهور، وهفضل كل ده محروم من ابني.
عارف كويس إن اللي عملته في آني كان بشع، بس بصراحة… ما استاهلش اللي حصل ده.
مفيش حد عايز يصدقني. حتى أمي بتقولي انت اللي عملت في نفسك كده. وكان معاك ست زي الفل وانت اللي خسرتها.
أنا بجد زعلان قوي ونفسي الحقيقة تظهر. مش عارف أعمل ايه؟
