مدرس أختي عايز يتجوزها!!!
أختي الصغيرة (19 سنه) هتتجوز أستاذها من المدرسة الثانوية اللي عنده ٣٦ سنة كمان كام يوم، وكل الناس حوالينا باين إنهم موافقين ومبسوطين!
هي اتخرجت من المدرسة من حوالي سنة، وبعد التخرج على طول أعلنوا إنهم كانوا مرتبطين. أنا كنت مصدومة وزعلانة جدًا، بس الناس اللي حوالينا كانوا فرحانين وداعمين ليهم.
المدرس ده كان مطلق مراته من سنتين، وبدأ يدي أختي اهتمام خاص بعد كده. كان بيكلمها بعد الحصص بانتظام وبيساعدها كتير في دراستها. أنا استغربت جدًا من الموضوع ده وكلمت أختي فيه، لكن هي قالت لي إنه بيساعدها عشان هي أحسن طالبة في الفصل، وده حقيقي.
من كام شهر،أعلنوا خطوبتهم. حاولت أكلم أهلي عن الفرق الكبير في السن والحاجات اللي مضايقاني، لكن رفضوا يسمعوني.
كلمت أختي وقالت لي إنها مبسوطة وإنها بتحبه.
إحنا عايشين في مدينة صغيرة وكل الناس حواليهم بيشجعوهم على الجواز.
أنا حاسة بالعجز دلوقتي، وزعلانة من نفسي. حسيت إني فشلت في حماية أختي، وإن مهمتي كأخت كبيرة راحت مني. أنا مش طايقة أي حد حواليا. إزاي مش قادرين يشوفوا اللي بيحصل هنا….
🌹تحديث
الجواز حصل فعلاً. كنت بفكر ماحضرش الفرح، بس مكنتش عايز أجرح أختي الصغيرة، فرحت غصب عني.
طول الحفل، كان دمي بيغلي. كل الناس اللي حضروا كانوا بيباركوا لهم، وأنا مش قادرة حتى أبص في وش المدرس من كتر الغضب. كرهت كل حاجة في الحفلة دي.
أنا مسافرة من بلدنا دي بكرة. عملت مقابلات مع كام شركة، وفعلاً اتقبلت في واحدة منهم. الشغل في مدينة تانية وأنا همشي بكرة. مش قادر أستحمل الناس هنا.
أهلي شايفين إن جوازها من “رجل محترم” عنده وظيفة مستقرة أحسن حاجة ممكن تحصل لها، وقرايبنا متفقين معاهم.
هو استغلها وهي صغيرة، ليه محدش غيري شايف ده؟ كنت عايزة أصرخ فيهم كلهم.
لما قلت لأختي إني حسيب المكان، بكت. طمنتها وقلت لها إني مش زعلانة منها. وضحت لها إنها ممكن تتواصل معايا لو حصل أي حاجة في أي وقت، وإني هكون دايمًا موجودة جنبها.
اشتريت لها موبايل وقلت لها إني هكلمها بانتظام.
حاولت على قد ما أقدر ما استفزش حد عشان عايزاهم يكلموني لو حصل أي حاجة. كان الموضوع صعب جدًا عليا. كنت قريبة جدًا من إني اتخانق مع كذا حد.
أختي كانت من المتفوقين. كنت دايمًا شايفة إنها هتدخل جامعة كبيرة وتبقى شخصية ناجحة. لكن دلوقتي، هتبقى ربة منزل. الفكرة دي بتدمرني.
مكنتش قاسية عليها لأن عندي أمل تصحى قريب، وعايزة أكون جنبها لما ده يحصل.
نفسي أدعمها وأشوفها بتحقق احلامها كلها، وبتمني ده يحصل قريب.
🌹ملحوظة: قلت لها ما تجيبش أطفال إلا لما تكون متأكدة. ولازم تستني الأول كام سنة. وطلبت منها تكلمني لو حد ضغط عليها عشان الحمل. بتمنى بجد إنها تسمع نصيحتي.
🌹ملحوظة تانية: كنت بشوف التعليقات والناس اللي بيدافعوا عن المدرس بشكل هستيري. الناس اللي زيكم هم المشكلة. هي اتعرضت للاستغلال من وهي عندها 16 سنة. ليه مش قادرين تشوفوا ده؟ مكنتش هاعترض على اختياراتها لو هي مش مراهقة صغيرة. كونه رجل أكبر منها مش مشكلتي، مشكلتي إنه كان مدرسها. وبرضه، مفيش مشكلة في إنها تكون ربة منزل. اللي مش راضية بيه أن عندها فرص تختار حاجات أحسن.
بالنسبة للموبايل، أهلي مكنوش بيسمحوا لأختي يكون عندها موبايل. كانت بتضطر تستخدم التليفون الأرضي عشان تكلم حد. عشان كده اشتريت لها موبايل.
🌹#تحديث
حبيت أشارك بتحديث عن وضع أختي بعد ما مر سنة، والوضع اتغير بشكل كبير للأحسن.
من ساعة الجواز السنة اللي فاتت، حرصت إني أكلم أختي بانتظام على الموبايل اللي جبتهولها.
بعد كام أسبوع من الجواز، جوزها بدأ يضغط عليها عشان تاخد دور “الزوجة التقليدية”، وده عمل فجوة بينها وبين أصحابها. لكن أنا فضلت محافظة على التواصل معاها، وكنت بزورها مرة كل شهر. جوزها مكنش بيحب ده، لكن كان بيستحمل عشان يبان إنه متفاهم قدام الناس.
عشان أتعامل مع إحباطي، اشتركت في جيم وبدأت أتمرن. الحمد لله، مديرتي في الشغل طلعت شخصية عظيمة، كانت بتسمعني وبتدعمني كتير بنصايحها. قالت لي إني ممكن أتكلم معاها لو احتجت مساعدة، وبقت زي أخت كبيرة ليا، وكمان بتديني مرتب كويس.
بعد كام شهر من جواز أختي، جوزها قدر إنه يسيطر عليها تمامًا – بطلت تخرج من البيت تقريبًا ومبقاش عندها أي حرية، وحاول يبعدها عني. لكن عشان أنا محافظة على علاقة قوية مع أختي، مكنش عارف يحقق ده.
من كام شهر، بدأ يلمح لها إنه عايز أطفال، وأنا فضلت أأكد عليها تستنى كام سنة قبل ما تفكر في ده.
الشهر اللي فات، قالها بصراحة إنه عايز أطفال، وأختي قالت له إنها عايزة تستنى. بدأ يضغط عليها أكثر ويصمم.
الأسبوع اللي فات روحتلهم البيت عشان أكلمه.
دايمًا بحاول أكون مهذبة معاه لما بزورهم، عشان ميبقاش عنده حجة و يبعدنا عن بعض.
في نص الكلام، اتكلمت في موضوع إنه بيضغط عليها عشان الحمل.
النقاش اتحول لخناقة، وهو قال إن من حقه يخلف من مراته. لما أعترضت علي كلامة ، اتعصب وحاول يضربني، بس الضربة ما جاتش عليا.
ما ترددتش لحظة وضربته في وشه. وقع لورا وبدأ يصرخ من الألم. كان نفسي أعمل كده من أول ما الموضوع ده بدأ، وبصراحة اللي عملته ريحني قوي.
أعتقد إن محاوله ضربه ليا خلت أختي فاقت لنفسها.
هو اتصل بالشرطة وقال لهم إني اعتديت عليه. لحسن الحظ، أنا حريصة دايمًا أسجل كل حاجة وأنا بزور بيتهم (بستخدم الساعة الذكية بتاعتي، أداة ممتازة لتسجيل الصوت بشكل سري).
اتصلت بمديرتي وقلت لها على اللي حصل، ووعدتني إنها هتبعت محامي لو احتجت.
لما الشرطة وصلت، أختي وقفت في صفي، وده صدم جوزها. وبما إني واحده ست، ومع وجود التسجيل، الشرطة وقفت معايا وكانوا في صفي.
بعد كده المحامي وصل، وقلت لجوزها إني هاخد أختي معايا. حاول يعترض، لكن المحامي حذره إني هقدم بلاغ لو منع أختي تروح معايا. فاضطر يوافق بالعافية، وأختي بقالها أسبوع عايشة معايا.
أهلي كانوا غضبانين جدًا لما عرفوا إن أختي سابت جوزها. ومكانوش مهتمين إنه حاول يضربني، يمكن عشان أنا بطلت أتكلم معاهم.
لسة بتكلم مع أختي عن اللي عايزة تعمله، واحتمال نبدأ إجراءات الطلاق خلال أيام.
جوزها وأهلي حاولوا يكلموها ويقنعوها إنها ترجع، لكن أنا أكدت عليها متتكلمش معاهم من غير ما أكون موجودة.
خلال كل ده، مديرتي كانت داعمة جدًا وبتدي أختي نصايح عن اللي ممكن تعمله بعد كده. الحمد لله حظي كويس إن أختي فاقت بدري كده، وإني لقيت دعم من حد زي مديرتي.
طول السنة اللي فاتت كنت قلقانة على مصير أختي، لكن دلوقتي حاسة بفرحة كبيرة 😍
( القصة حقيقية )
#قصص
