ما عنديش أي فكرة أختي الهبلة فين دلوقتي لأنها سافرت في رحلة مع اصحابها، كل اللي أعرفه إني لما أشوفها هشدها من شعرها!
#حواديت_الاجانب
أنا وأختي في نفس الجامعة، بس أنا أكبر منها ب 3 سنين.
إحنا شبه بعض جدًا لدرجة إن في ناس بتتلخبط وبتفتكرنا توأم. والنهارده اتعذبت بسبب الشبه اللي بيني وبين أختي!!
أول ما خرجت من الجامعة وأنا رايحة عربيتي، لقيت ست جرت عليا ومسكتني من شعري وبدأت تزعقلي وتشتم فيا كتير جدًا!
بدأت أرد عليها وأتخانق معاها، وبصراحة في الوقت ده كنت فاكرة إن دي واحدة ست مش مش في وعيها، أو واحدة مشردة وعندها مشكلة في دماغها ولا حاجة.
مسكتها من شعرها أنا كمان لحد ما اصحابي فصلونا عن بعض.
الست كانت عمالة تعيط، وكان معاها اتنين ستات كمان كانوا بيتخانقوا مع اصحابي. الست كانت بتصرخ في وشي وبتقول إني “مصاحبة جوزها”، أنا مكنتش فاهمة حاجة في الأول، بس فجأة كده دماغي اشتغلت وافتكرت حاجة، أختي مرتبطة براجل كبير في السن. هي مش بتحكيلي كتير عنه، بس دايمًا بتوريني الهدايا اللي بيجيبها لها 😳
قولت للست دي انتي بتتكلمي عن اختي، اصحابها قالولي ما انتي أكيد مش محترمة زيها (الحقيقية أنا مش كدة) فضلوا يتخانقوا معايا تاني لحد ما البوليس وصل وحاول يفض الخناقة ( بس الموضوع كان صعب ومحرج جدا).
دلوقتي فروة راسي متعورة وبتوجعني من كتر الشد، وضهري متخربش، والست هانم أختي مش بترد علي تليفونها.
بفكر اتصل بماما وبابا واحكيلهم كل اللي حصل، بس بصراحة متردده لأن بابا لو عرف حاجة زي كده مش هيدفعلها مصاريف الجامعة، لأن دي مش أول مصيبة تعملها.
حسه بالإهانة قوي، صعب جدا أضرب في جامعتي قدام زمايلي على حاجة أنا ماعملتهاش، بصراحة مش عارفة هعرف أواجه الناس ازاي بعد اللي حصل ده.
الست مسكينة، بصراحة أنا متعاطفة معاها، بس أنا ماستاهلش الضرب ده.. طيب على الأقل كانت تسأل عن اسمي الأول قبل ما تضربني! 😩
🌿تعديل:
قدمت بلاغ في الشرطة، الست بصراحة أعتذرت كتير لما عرفت أن مش أنا المقصودة، بس اصحابها هما اللي مكنوش عايزين يهدوا.
بس برضة ده مش مبرر للأهانه اللي حصلتلي.
دلوقتي أنا لسه مستنيه أختي ترجع من رحلتها.
🌿تعديل:
قررت أحكي لأهلي.
رحت لبابا وماما عشان اكلمها قدامهم لما ترجع، هما كانوا حاسين أن في حاجة، بس أنا رفضت اتكلم غير قدام أختي.
علي فكرة أختي مش أول مره تعمل كده، هي بتحب تاخد هدايا من الناس دي وبتحب الاهتمام. للأسف هي معندهاش ثقة في نفسها، ده غير انها عايزة تحس إنها بتقدر تاخد اللي هي عايزاه.
لما وصلت واتكلمنا عرفت أن ده اللي حصل:
الست لقت حساب أختي على إنستجرام وبعتتلها رسايل وقالتلها تبعد عن عيلتها، (لأن الراجل شكله أخد أولاده معاه وهو بيقابل أختي).
وأختي، اللي بجد هبلة جدًا، كملت الخناقة مع الست وشتمتها (ورّتني الشات وكان واضح إنها بتستفز الست وتقولها كلام جارح). وده السبب اللي خلاني أنا اللي آخد الضرب في الآخر 😤
على حسب كلام أختي، هي ماصدقتش إن الست فعلاً هتيجي تضربها!!
بعد كده لما بدأت أبعت لأختي رسايل علشان احكيلها اللي حصلي، كانت بتتجاهلني تمامًا، لأنها مش عايزة توتر نفسها، وكمان لأنها عارفة إنها غلطانة ومش عارفة تقول ايه.
صحيح أنا كنت غضبانة جدًا، لكن ماما كانت زعلانة أكتر مني بمراحل!
أختي حاولت تدافع عن نفسها!!
هي بررت تصرفها بإنها “سنجل” وحرة تعمل اللي هي عايزاه، لكن ماما ردت عليها وقالتلها إننا كلنا بنتأذي بسبب تصرفاتها الغلط، وإنها بتدمر حياة الناس بأنانيتها 😠
كل حاجة انتهت كالعادة بنوبة صريخ من أختي، لكن المرة دي بابا طردها من البيت. بصراحة، حسيت بشوية حزن و الموقف كان صعب.
كنت زعلانة كمان عشان أهلي بيعانوا بسبب تصرفاتها الطايشة 😔
وبالنسبة للست، هي اتواصلت معايا وقعدت تعتذر كتير جدًا. قالت إنها مستعدة تدفع أي مصاريف للعلاج، بس أنا كويسة ومش محتاجة حاجة. صوتها كان هادي أكتر وهي لوحدها من غير اصحابها، وقالت لي إنها عمرها ما عملت حاجة زي كده في حياتها، بس هي كانت حاسة بكراهية شديدة ناحية أختي وجوزها السابق (شكلها خلاص سابت جوزها).
كان واضح إنها ندمانة بجد.
بس ماحصلش حاجة جديدة غير كده.
(القصة مترجمة من ريديت أصحاب القصة أجانب)
