كل الناس عارفة قد إيه أنا بكره الخيانة، ومستحيل أسامح شخص خاين 😤
قابلت (جيمي) من 4 سنين، اتخطبنا وحاليًا متجوزين من سنتين، وعلاقتنا كانت ممتازة.
قبل ما اتجوز كنت مخطوبة لشخص تاني، وللأسف خطيبي السابق خاني، الموضوع كان مؤلم جدًا، وجوزي عارف كويس أد ايه موضوع الخيانة حساس بالنسبه لي.
من كام شهر كنت قاعدة وسمعت أخت جوزي (ليزا) بتتكلم في التليفون، وبتحكي إن في علاقة سرية بين جوزي وزميلته في الشغل!
أنا عارفة زميلته دي كويس، وهي أصلًا متجوزة.
ليزا كانت بتحكي علاقتهم بالتفصيل.
طبعًا جريت عليها وسألتها: “إيه اللي أنا سمعته ده؟”
ارتبكت جدًا واتصدمت إني سمعت الكلام، واعتذرت وفضلت تتحايل عليّا وتقولي: “بلاش تخربي جوازك وسامحي جوزك.”
وقالت لي: “على فكرة، جيمي بيحبك جدًا، وأنا كمان بعتبرك أختي.”
لما أصريت أفهم إيه اللي بيحصل وصممت إنها لازم تحكي لي كل اللي تعرفه بالتفصيل، ورّتني صور ورسايل بين جوزي وزميلته.
قالت لي: “أرجوكِ بلاش تقولي لجيمي إنك عرفتي مني، علشان العلاقة بيني وبين أخويا ما تتأثرش وما يزعلش مني ويعمل مشكلة.”
وافقت ووعدتها إني مش هقول مين اللي عرّفني بالخيانة.
طبعًا واجهت جوزي، والباشا أنكر ورفض يعترف بأي حاجة!
اللي قهرني أكتر إنه مش بس مش عايز يعترف، ده كمان محاولش إنه يعتذر أبدًا.
سألني: “جبتي الصور والحاجات دي منين؟”
رفضت أقوله إن أخته اللي قالت لي، وقلت له حد مجهول بعتهالي.
كان نفسي يتأسف ويندم، مش كل اللي بيفكر فيه مين اللي بعت الصور!
من غضبي جبت رقم الزوج المخدوع (زوج زميلة جوزي في الشغل) وقلت له: “مراتك خاينة.” كنت حاسة إن ده التصرف الصح وقتها.
على فكرة، زميلة جوزي دي ست جميلة جدًا (خلينا نسميها سارة)، وكانت بتشتغل مع جوزي بالساعات كل يوم، وأنا أصلًا من الأول كنت بحس بالغيرة منها وكنت خايفة جوزي يتشدّ لها، وأهل جوزي عارفين ده.
طبعًا طلبت الطلاق، وكمان جوز سارة (زميلة جوزي) عمل كده.
بعدها اختفت أخت جوزي ليزا من حياتي تمامًا، استغربت جدًا لأنها كانت بتمثل طول الوقت إنها صاحبتي جدًا، حتى أوقات كانت بتناديني “أختي”، وفجأة كده ما بقتش موجودة في حياتي خالص!
مرت شهور وأنا لسه حزينة جدًا.
جوزي يأس مني ووافق على الطلاق بعد محاولات كثيرة منه إننا نرجع وإنّي أفكر بالعقل والمنطق.
لكن لما حس إن مفيش فايدة مني، استسلم وقال لي: “خلاص، كل واحد يشوف حياته.”
جوزي وأخته عندهم صاحبة مقربة ليهم جدًا اسمها “إيما”.
جوزي جيمي عمره (29 سنة)، أخت جوزي ليزا (32 سنة)، وصديقتها المقربة إيما (32 سنة).
التلاتة أصحاب مقربين من الطفولة، ويعتبروا متربين سوا، وكانوا دايمًا قريبين من بعض.
إيما اتجوزت بدري لما كان عمرها 20 سنة، وخلفت طفلين، للأسف جوزها طلع راجل مش كويس وكان بيؤذيها، واتطلقت أخيرًا منه بعد 10 سنين زواج.
هي عانت جدًا في فترة جوازها هي وأطفالها ولسه بتتعالج لغاية دلوقتي من الإساءة اللي اتعرضت لها.
نرجع لدلوقتي.
أنا متابعة ليزا وإيما على إنستجرام.
جوزي تقريبًا بدأ يخرج معاهم كل أسبوع، وكل شوية صور وستوري فيها جوزي وإيما وأطفالها!
بدأت أحس بالشك!
ليه ليزا بتعمل معايا كده دلوقتي؟ ليه مش عايزة ترد أبدًا على مكالماتي ورسايلي؟ وليه لما كانت بتحكي عن الخيانة في التليفون كان صوتها عالي جدًا وكأنها قاصدة تسمعني الكلام؟ وليه جوزي كان مصمم انه مظلوم؟
هل ممكن الصور والرسايل تكون مزيفة؟ مجرد صور معدلة بالفوتوشوب!
ليزا، أخت جوزي، مخطوبة، وعلاقتي بخطيبها (مايك) كويسة جدًا.
بصراحة، كلمته وحكيت له عن كل شكوكي، وقلت له: أنا حاسة إن ليزا كان قصدها توقع بيني وبين جوزي. وطلبت منه يساعدني علشان أقدر أعرف الحقيقة.
كنت متوقعة إنه يرفض، لكن اتفاجأت إنه وافق بمنتهى السهولة.
(مايك) معاه باسورد ليزا، فتح تليفونها وشاف الرسايل، واكتشف إن ليزا وصاحبتها إيما هما اللي دبّروا كل حاجة!
استغلوا نقطة ضعفي وكرهي للخيانة، وكمان غيرتي من زميلة جوزي سارة (اللي معروفة للكل).
استخدموا كل ده ضدي، ونجحوا إنهم يخلوني أتخلى عن أكتر إنسان حبيته في حياتي.
عملوا كل ده علشان ليزا كانت عايزة أخوها يتجوز إيما صاحبتها.
(مايك) بعت لي كل الأدلة والصور الأصلية اللي عدلوها علشان يخدعوني.
حياتي اتقلبت كلها ودخلت في اكتئاب حاد، كنت قاعدة على السرير مش قادرة أتحرك.
أنا مش بس دمّرت جوازي، أنا كمان دمّرت زواج زميلة جوزي اللي ملهاش أي ذنب!
أنا إزاي كنت غبية كده؟ كان لازم أثق في جوزي أكتر من كده. كان المفروض أبقى صادقة معاه وأقوله من الأول إن أخته هي اللي قالت لي. مكانش لازم أدمّر حياة بني آدمه تانية لمجرد غيرتي منها ومن جمالها.
للأسف، اللي عرفته إن سارة سابت الشغل وانتقلت مكان تاني.
لسه معايا رقم تليفون جوزها. اتصلت بيه وقابلته، وحكيت له كل الحقيقة.
كان غضبان مني جدًا، وقعد يزعق ويصرخ في وشي.
أنا أستحق كل الكلام الوحش اللي سمعته منه.
دورت على سارة على إنستجرام وبعت لها رسالة اعتذار طويلة، ما ردتش عليا.
أنا عارفة إن أنا ما أستحقش جوزي، وعارفة إنه خلاص ما بقاش عايزني، بس لازم يعرف الحقيقة، ولازم يعرف حقيقة إيما.
أنا مش بحاول أرجّعه، أنا بس عايزة أفهمه وأعتذر له.
🌿تحديث:
مش عارفة أحكي لجيمي الحقيقة كلها، كل مرة بمسك التليفون وأحاول أبعت له علشان يقابلني بحس بالرعب والخوف.
قررت أبعت له إيميل وأشرح له فيه كل اللي حصل. قعدت يوم كامل أكتب الإيميل، وكل شوية أعدل الكلام.
كمان بعت له كل الصور الأصلية والمزيفة اللي بعتهالي (مايك)، وفهمته إن ليزا وإيما هما اللي عملوا لي فخ 😢
قلت له إن واضح من الصور على إنستجرام إنك بدأت تواعد إيما، وأنا عايزة أعرفك حقيقتها.
بعت له الإيميل، بس مردش عليا!
تاني يوم، رجعت من شغلي لقيت ليزا وإيما واقفين قدام المبنى اللي أنا ساكنة فيه مستنياني.
سمحت لهم يدخلوا بيتي.
ليزا بدأت تزعق وتقول لي: “اتصلي بجيمي وقولي له إن الكلام اللي اتبعت في الإيميل كله كذب، أحسن لك”.
قعدت تهددني وتقول لي: “أنا ممكن أدمر حياتك كلها.
تجنبي أذيتي وبلاش نبقى أعداء، واتقي شري!” 😡
أعتقد أن ليزا كانت غضبانة قوي لأنها عرفت أن خطيبها مايك اكتشف حقيقتها.
إيما كانت هادية أكثر، ابتسمت وقالت لي إن جيمي أصلاً كان طول عمره معجب بيها، وإنه أكيد مش هيصدق كلامي لأنه أخيرًا بقى عنده الفرصة إنه يكون معاها.
حاولت أخرجهم من بيتي بس رفضوا يمشوا.
سيبت البيت أنا، واتصلت بجيمي وحكيت له اللي بيحصل.
بعد 15 دقيقة، شفتهم بيخرجوا من بيتي.
جيمي قال لي: “ممكن أجيلك نتكلم مع بعض؟”
طبعًا وافقت.
اتكلمنا في كل حاجة، وقال لي إنه اتصدم فيا علشان رفضت أسمعه وأصدقه، وقعد يعاتبني.
رجعنا نتكلم مع بعض في التليفون تاني. طبعًا هو مصدوم وزعلان من أخته وصاحبتها.
جوزي بيقول لي إنه بيحبني، لكن لسه متكلمش معايا عن إلغاء الطلاق، أعتقد إنه لسه زعلان مني. أنا فاهمة ده وعندي استعداد أستنى لغاية ما يسامحني.
الأخبار السعيدة بقى إن سارة رجعت لجوزها 😍
جيمي صمم يقابلهم واعتذر لهم بنفسه.
أما ليزا وإيما، فعلاقتهم اتوترت لأن إيما بتلوم ليزا إنها السبب في خسارتها لجيمي، وليزا حزينة لأن خطيبها مايك سابها.
بتمنى فعلاً جوزي يسامحني، وبوعده إني أحبه وأعوضه طول عمري ❤️
———
القصة مترجمة من ريديت، أصحاب القصة أجانب.
#قصص
#قصص حقيقية
