قوانين الخصوصية 🛡️📜
الدكتورة اللي بتابع معاها هي الصديقة المقربة لأختي الكبيرة. (كنت بتابع مع دكتورة تانيه من زمان. ولما دكتورتي أخدت أجازه وضع. تابعت مع صاحبة أختي).
أنا عندي (اضطراب فرط الحركة ونقص الانتباه) ADHD وباخد أدوية بوصفة طبية بقالي كذا سنة عشان أخفف من اعراض الاضطراب، أنا ما قلتش لأي حد من عيلتي الكلام ده عشان خايفة من رد رد فعلهم السلبي.
أنا جايه من عيلة بيحبوا قوي الإنجازات المبالغ فيها وما بيؤمنوش بوجود ADHD، وبيعتبروا الموضوع مجرد كسل.
من كام يوم، كنت أنا وإخواتي قاعدين بنتفرج على برنامج و”الممثل” الضيف كان بيتكلم عن تجربته مع الإدمان. وأنا قلت تعليق على شكله. وإنه كان رفيع جدًا في المسلسل اللي كان بيمثل فيه.
أختي..فجأة، قالت: “أن مشكلة الممثل بدأت ب أدوية الدكتور هو اللي وصفها وبعدين أدمنها، فبصراحة أنا مش عايزاكي انتي كمان تتعودي عليها!”
على طول حسيت برعب جامد. إخواتي التانيين كانوا مستغربين وبصوا لها مستنيين توضيح أكتر، بس أختي ما قالتش حاجة زيادة.
قضيت الليلة كلها متجمده في مكاني هموت من كتر القلق والخوف.
بعد كده، لما بقينا لوحدنا، اضطرّيت أسألها عشان أفهم أكتر.
عرفت أن أختي كانت لسه راجعة من رحلة للتزلج مع صحباتها (الدكتورة بتاعتي) وهي وقعت في الكلام وقالت اني كنت عندها من كام يوم علشان تزود لي الجرعة، عشان كده أختي عرفت اني باخد دواء بقالي كذا سنة.
أنا دلوقتي هولع من كتر الغضب، وحاسه بالخيانة، وجوايا رغبة قوية إني أبلغ عنها علشان كسرت قوانين الخصوصية.
أختي طول اليوم بتبعتلي رسايل وتتصل بيا، وعماله تتحايل عليا إني ما أخربش حياة صاحبتها بعد سنين من شغلها وتعبها.
واضح إنها قلقانة على صاحبتها قوي، بس مش فارق معاها خالص إني حاسة بالإهانة وإن خصوصيتي اتداس عليها.
وأكتر حاجة قلقاني دلوقتي إن أختي ممكن تحكي ل بابا وماما، وساعتها عارفه أن رد فعلهم هيكون سلبي.
🌿تحديث:
بلغت عن الدكتورة بسبب انتهاكها لقانون الخصوصية وقانون سلامة المرضى.
ما قلتش لأختي ولا لأي حد تاني، لكن بعد كام يوم رجعت البيت علشان الأجازة. وشفت عيلتي كلها.
وقتها ما كانش لسه جالي أي رد بخصوص الشكوى. وغالبا كانت الدكتوره لسه مش عارفة اني بلغت عنها.
المشكلة أن أختي بلغت بابا وماما. والتلاته قعدوا يدوني محاضرة.
ماما كانت عايزاني أوقف الأدوية فوراً، وقالتلي: “إنتي أحسن وأذكى من كده بكتير”، وحتّى هددتني: “انها هتقول للدكاتره في الجامعة إني باخد مخدرات لو ما مسمعتش الكلام”.
بصراحة تعبت من طريقتهم معايا وتهديدهم ليا.
تاني يوم الصبح، قررت أطلب أوبر، وهما لسه نايمين، وسافرت ورجعت لجامعتي.
في يناير، عرفت إن الدكتورة كان فيه شكاوى قديمة ضدها، والتقرير بتاعي فتح تحقيق (لسه شغال دلوقتي). الدكتورة اتوقفت عن ممارسة المهنة مؤقتًا لحد ما القضية تتحل.
🌿قصة جديدة:
بدأت أروح لدكتور نفسي من كام شهر – مفيش حاجة كبيرة، بس مجرد اكتئاب عام، وتقلبات الجو في الشتا مأثرة عليا وكده.
العلاج كان مفيد جدًا.
من كام يوم، اتنين من زمايلي القدام كلموني وقالولي إن مديرتي القديمة بتتكلم عليا وبتقول حاجات زي.” دي بقت بتكره نفسها دلوقتي. سمعت إنها مش كويسة خالص، مكتئبة جدًا.”
المكالمات دي كانت مفاجأة، ومسجلتش أي حاجة عشان مكنتش متوقعة.
مديرتي القديمة فصلتني في يونيو (عشان مكنّاش متفاهمين، وأدائي مكانش أحسن حاجة، وكان في بينا خلافات).
في الأول افتكرت أن ممكن يكون حد من صحابي هو اللي قالها الكلام ده.
لكن لما دورت ورا مديرتي القديمة، اكتشفت إن جوزها هو الدكتور النفسي اللي بتابع معاه! اسم العيلة شائع جدًا، وأنا ما كنتش واخده بالي خالص إنهم قريبين لبعض.
أنا مستوعبة إن دي طبعًا مشكلة مع الدكتور النفسي، بس مش عارفة أعمل إيه؟ تفتكروا ايه الإدارة أو الجهة اللي ممكن أقدم لها الشكوى.
🌿تحديث:
لسه في حاجات كتير ماشية ببطء وإجراءات روتينية، لكن أكتر خبر مُرضي هو إن الدكتور النفسي بتاعي مبقاش بيشتغل خلاص. حتى شفت العيادة اللي كان شغال فيها معروضه للبيع على موقع عقارات. وأنا بدور على بيت لنفسي.
الدكتور النفسي كان بيحكي لمراته (مديرتي القديمة) عن واحدة من مرضاه (اللي هي أنا)، وشكله مكنش عارف أصلاً إنها كانت مديرتي في الشغل القديم.
أنا عندي ظروف عائلية خاصة جدًا، فغالبًا هو كان بيتكلم عنها مع مراته. لكن واضح إنه قال تفاصيل كتير خليتها تشك إن المريضة دي هي أنا.
واضح أن مديرتي دخلت مكتبه من وراه. وفتّشت في الملفات بتاعتي، وبعدها قررت إنها فكرة عظيمة إنها تقول لزمايلي القدام إني مكتئبة وعندي مشاكل عائلية….جميل جدًا.
واحدة من زمايلي قدمت استقالتها من الشركة عشان جوزها كان بينتقل لمكان تاني.
زميلتي وافقت تكتب بيان رسمي بكل اللي سمعته، وده ساعدني كتير. وطبعًا، مفيش حد تاني كان مستعد يعمل كده لأن الشركة سرّحت ناس كتير السنة اللي فاتت.
الدكتور غالبًا اتعاقب بسبب إنه شارك تفاصيل عني مع مراته، وكمان بسبب إهماله في حفظ الملفات. ومش عارفة إذا كان هيرجع يشتغل تاني ولا لأ.
(القصص مترجمة من ريديت..أصحاب القصة أجانب).
