مصاريف الجامعة 💰🎓
أنا بنت هندية. جدتي الكبيرة” قريبة جدتي” كانت عاملة حسابات توفير لكل قريباتها البنات. لأن في ثقافتنا تعليم البنات مش مهم قوي وهي كانت شايفة إن ده كلام فارغ.
هي عاشت زمان مع والدها في لندن واتعلمت هناك كويس جدًا، وبعد كده دخلت الجامعة وبقت دكتورة. واتجوزت راجل بريطاني وسافروا أمريكا وعاشوا حياتهم هناك وبقوا مرتاحين جدًا.
هي طول حياتها حاولت تساعد أكبر عدد ممكن من بنات العيله إنهم يتعلموا ويحققوا نفس اللي هي حققته.
ولما توفّت، سابت فلوس لكل بنت في العيلة علشان تدخل الجامعة اللي نفسها فيها.
المشكله ان ماما قدرت توصل لحسابات التوفير اللي جدتي كانت عاملاها لي أنا وأختي. واخدت الفلوس دي وصرفتها على جواز أخويا الكبير.
أختي ما اهتمتش خالص بالموضوع لأنها اتجوزت بعد المدرسة الثانوية بسنتين ومكنش عندها نية تكمل جامعة أصلاً.
لما اتخرجت من المدرسة ورُحت البنك عشان أسحب فلوسي لقيت الحساب فاضي تقريبًا! كان فاضل مبلغ صغير مش هيكفي مصاريف الجامعة.
سألت ماما وبابا وقتها قالولي بمنتهى البساطة إنهم كانوا محتاجين الفلوس! ومع الوقت اكتشفت الحقيقة وعرفت إنهم اخدوا فلوسي وحقي علشان جواز أخويا.
طبعًا اتعصّبت جدًا وقررت أبعد عنهم. واضطريت آخد قروض عشان أكمل دراسة وادخل الجامعة. ودلوقتي أنا عايشه في بيت ايجار مع بنات اصحابي بعيد عنهم خالص.
من ساعتها وبيقولوا اني فضحتهم وجبتلهم العار!
دلوقتي أنا رافعة عليهم قضية عشان آخد حقي. المشكلة ان كل العيلة وقفة ضدي وبيقولوا إني بفضح أسرار العيلة! وبيقولوا إن الفلوس مش أهم من العيلة.
طيب أنا ذنبي ايه اتحمل ديون وأفضل سنين أسدد فيها!
أصحابي الأمريكان شايفين إن أنا صح وبيشجعوني، بس هما أصلاً مش فاهمين ثقافتنا الهندية الغريبة دي… وبصراحة أنا نفسي بقيت مش فاهمة ثقافتنا!
أخويا كلمني وعرض عليّا إنه يدفعلي مصاريف الجامعة لو اتنازلت عن القضية. أنا وافقت بس بشرط يكون بينا عقد قانوني يلزمه بالكلام ده.
رد عليّا وقاللي إني قليلة الأصل عشان مش واثقة فيه!
قلت له: «انت أصلاً مكنش المفروض تاخد فلوسي وتصرفها على جوازك!»
أنا بصراحة حاسة بشوية احراج إني وصلت للمرحلة دي مع أهلي… بس في نفس الوقت مش عايزة أتحمل دين كبير. أنا عايزة حقي برجعلي.
تفتكروا عندي حق أرفع قضية علي أهلي ولا أنا غلطانة؟
🔔 تحديث:
الحمد لله أخويا كلمني ووافق علي طلبي. وكتبنا عقد قانوني يلزمه إنه يدفع كل مصاريف جامعتي بدل الفلوس اللي أخدها.
أنا تنازلت عن القضية عشان خلاص حسيت إني كده حقي رجع.
بعدها بفترة ماما كلمتني لأول مرة من وقت المشكلة وقالت لي: «إنتِ مهما حصل بنتي، ومش عايزين نفضل طول عمرنا متخاصمين وقالت لي أنها وبابا هيساعدوا أخويا في دفع المصاريف.»
بصراحة فرحت إننا اتكلمنا تاني، مهما حصل هما عيلتي وأنا خلاص سامحتهم ❤️✨
