تفتكروا أنا وماما عندنا حق نشك في مرات أخويا ونتكلم عليها؟!
أنا عمري 22 سنة، أخويا الكبير “جون” 32 سنة، متجوز “جين” 30 سنة، من أربع سنين وعندهم دلوقتي بيبي عمرة 4 شهور.
لما جين اكتشفت إنها حامل في الشهر الأول، على طول كلمت ماما عشان تبلغها هي أول واحدة. ماما استغربت شوية، بس كانت مبسوطة جدًا.
جين قالت إنها هتقول لجون لما يرجع من رحلة الشغل.
بعد كام ساعة، كلمت ماما تاني وهي بتعيط، وفضلت تقول إنها “علي طول جعانة جدًا ومش بتشبع خالص”.
ماما هزرت معاها وقالت مش بدري شوية على الكلام ده؟ جين اتنرفزت وردت علي ماما وقالت “إن ده حملها هي وبس، ومحدش ليه دعوة”.
رد فعلها كان غريب، بس بصراحة هي اعتذرت بعد كده وقالت إن الهرمونات هي السبب.
لما أخويا رجع من رحله الشغل، أخد جين وسافروا عشان يقعدوا عند والدتها، ومن ساعتها ما شفناهاش خالص غير بعد ما البيبي اتولد.
جون قال إن مراتة كانت خايفة تفقد البيبي وعايزة تقعد مع مامتها، وإننا لازم نحترم رغبتها.
المشكلة إن كل ما كنا بنسأل عن جين أو البيبي، كانوا بيردوا بإجابات غامضة كده وغريبة.
كمان ما شاركوش أي حاجة عن الحمل—لا صور سونار، ولا حفلة بيبي شاور، وجين رفضت إن أي حد يكون موجود معاها وقت الولادة.
كمان اكتشفت إن كل الأكلات اللي قالت إنها نفسها فيها، كانت جايباها من مقال عن الوحم، وحتى كانت بتقولها بنفس الترتيب اللي في المقال.
لما البيبي اتولد، أخيرًا قدرنا نشوف جين وجون (والبيبي طبعًا). اللحظة كانت فيها فرحة وحزن في نفس الوقت، لأننا كنا نتمنى نكون موجودين جنب جين ونساعدها. لكن أخويا قال إننا فعلاً ساعدناها لما سبناها براحتها وقت الحمل.
أغرب حاجة بقى لما جين كانت بتحكي عن الولادة. قالت إنها أخدت إبرة الضهر عن طريق محلول في إيدها!! ودي مش الطريقة اللي بتتاخد بيها الإبرة أصلًا.
لما سألتها شوية أسئلة عشان أفهم أكتر—لأنها ممكن تكون اتلخبطت، وده طبيعي— قفلت الموضوع ورفضت تجاوب، نفس اللي كانت بتعمله وهي حامل.
جين قالت إن البيبي كان عنده “مشكلة في الرضاعة”
ولما حاولت أفهم السبب، قالت برضة كلام غريب جدًا ومش منطقي!
الحاجة بقة اللي أكدت لي إن في حاجة مش طبيعية، لما قالت إن البيبي اتولد بمنتهي السهولة، وفي أقل من ساعة من بداية الطلق! رغم إن أخويا قبلها كان بيحكي قد إيه الولادة كانت صعبة، لدرجة إنهم قرروا ما يخلفوش تاني!
ماما كمان كانت ملاحظة كل الحاجات الغريبة دي، بس مش عارفة تفتح الموضوع معاهم إزاي. خصوصًا إنهم كل شوية يتعصبوا علينا.
من كام يوم، أخويا بعت لماما رسالة وقال، إن عيب قوي نشك في جين، ولازم إحنا الاتنين نعتذرلها على “تنمرنا”عليها.
مع إني عمري ما وجهتلها أي اتهامات صريحة، ولا قلت الكلام ده قدام جين. كل اللي عملته إني كنت بسألها أسئلة عادية لما هي كانت بتتكلم عن الحمل أو الولادة.
تفتكروا إحنا فعلاً غلطانين عشان شاكين فيها؟
▪️تحديث:
طلع عندي حق. واتضح إن جين فعلاً مش هي أم البيبي.
للأسف أخويا كان بيخون جين مع واحدة تانية وطلعت حامل.
الظاهر إن أخويا ومراته عرضوا على الست دي فلوس “25,000 جنيه إسترليني” عشان تسمح لهم يتبنوا البيبي لما يتولد، وبعدها تبعد عنهم وعن البيبي خالص.
هم ما كانوش عايزين موضوع الخيانة ده يتعرف، عشان كده عملوا التمثيلية دي (وأم جين كانت عارفة كل حاجة).
الكلام ده كله اتعرف دلوقتي لأن أم البيبي قررت ترجع في كلامها وعايزة ابنها تاني. وقالت إنها لما مضت علي عقد التنازل علي البيبي ماكنتش فاهمة كل حاجة قوي، عشان هي مش بتعرف تقرأ إنجليزي كويس. وأخويا ومراته ضغطوا عليها.
دلوقتي هي رافعة عليهم قضية عشان تاخد الحضانة الكاملة للبيبي. قالت إنها استنيت لحد دلوقتي عشان هي مهاجرة وكانت خايفة الموضوع ده يأثر علي وضعها في البلد.
الظاهر كمان إن جين كانت مرعوبة أن حد يلاحظ عيون البيبي (الخضراء). لأن جون وجين عيونهم زرقاء.
خلاص مش هعمل تحديث تاني.
إحنا مصدومين دلوقتي، وبصراحة الموقف صعب جدًا.
_________________
القصة مترجمة من ريديت، أصحاب القصة أجانب.
