قصة خطوبة ابن خالتي 👰💍
أنا في موقف غريب قوي. كنت مرتبط بواحدة اسمها “كيت” من حوالي سنتين. وعلاقتنا خلصت بطريقة وحشة جدا لما اكتشفت إنها بتخوني. وقتها بدأت تبقى باردة معايا، وكانت طول الوقت ماسكة تليفونها، ولما دورت وراها، لقيتها بتبعت رسايل لواحد تاني بإسم مستعار. ولما واجهتها وسألتها ليه، ردت بكل برود وقالتلي “طالما عرفت، خلاص مابقاش ليه لازمة الكلام” ومشيت. الفترة دي كانت صعبة قوي في حياتي.
من كام يوم، ابن خالتي “توني” أعلن خطوبته على “كيت”. ورغم إن علاقتي ب توني مش قوية أوي، بس بنتواصل من وقت للتاني.
أنا كنت عارف إنه مرتبط، بس ماكنتش أعرف إن اللي البنت اللي مرتبط بيها تبقي كيت.
توني كلمني وطلب مني أصوّر فرحهم، والظاهر ساعتها “كيت” فهمت وربطت الأحداث وعرفت إن أنا وتوني قرايب. “واضح انها ماكنتش تعرف”.
هي بعتتلي رسالة، بتتحايل عليا وبتقولي أنسى اللي حصل ومقولش لتوني على اللي كان بينا. وبتقول إن لو الحقيقة اتكشفت، ده هيبوظ حياة توني.
بصراحة، أنا ماكنتش ناوي أتكلم، بس رسالتها حسستني إن في حاجة غريبة.
دلوقتي أنا محتار ومتلخبط ومش عارف أخد قرار. أختي وخطيبتي شايفين إن توني من حقه يعرف الحقيقة. بيقولوا إن مش عدل إنه يتجوزها وهو مش عارف الماضي، خصوصًا وإحنا قرايب.
أنا اتخطيت العلاقة دي من زمان، ومش حابب أرجع الدراما القديمة دي تاني. كمان خايف شوية من رد الفعل.
أفرض توني ماصدقنيش؟أو لامني على إني بوظتله سعادته.
توني بجد شخص طيب وحنين، وأنا مش عايز أوجعه. وكمان باقي العيلة لازم أحسب حسابهم؛ أمي وخالتي (أم توني) قريبين جدًا من بعض، ومش عايز أتسبب في مشكلة بينهم.
بس في نفس الوقت، حاسس إنه لو كنت مكان توني، كنت هبقي عايز حد يقولي الحقيقة، خصوصًا اني اصلا مش مطمن ل كيت وخايف تعمل معاه زي ماعملت معايا.
علي فكرة واضح ان توني فعلًا بيحبها بصدق.
تفتكروا هكون غلطان لو حكيتله عن اللي حصل بيني وبين كيت؟
▪️ تحديث:
قررت أتكلم مع توني وأعرفه الحقيقة.
أختي قابلت توني الأول وقالتله كل حاجة، بعدها توني اتصل بيا وطلب نتقابل. لما قعدت مع توني وشرحت له الموقف، قاللي إنه كان عارف إن كيت خانت حبيبها القديم، لكن ماكنش عارف إن ده كان معايا.
كان طول الوقت بيعتذر ويقول إنه ماكنش عارف، وأنا كنت بقول له إن ده مش غلطه، بس كان باين عليه إنه زعلان جدًا.
توني واجه كيت، واللي عرفته ان الموضوع ماكانش سهل أبدًا. الظاهر كده انها في الأول أنكرت، لكن في النهاية اعترفت. مش عارف اللي حصل بالظبط، بس سمعت إن الشرطة اتدخلت.
ومن وقتها و توني بقى بعيد عني جدًا. ومش بيتكلم معايا خالص، وأعتقد إنه عملي بلوك، وأنا فاهم هو عمل معايا كده ومش عايز اضغط عليه.
للأسف الموضوع اتعرف لباقي العيلة، وأمي وخالتي غضبوا مني جدًا عشان فتحت الموضوع ده. وشايفين ان ماكنش ليه لازمه نتكلم في المواضيع القديمة. هما شايفين إني تصرفت كده علشان انتقم واخرب علاقتهم.
باقي العيلة مختلفين، في ناس معايا وناس ضدي.
أما بالنسبة لكيت، فواضح إنها اتواصلت مع توني علشان يقعدوا مع مستشار علاقات، وتوني الظاهر إنه موافق.
في المجمل، الموقف كان صعب وبايخ قوي، ولغايه دلوقتي أنا لسه عندي احساس بالذنب بسبب اللي حصل، مع إني عارف إن اللي عملته كان هو الصح.
_____________
*قصة جديدة: فرح بنت عمي 👰💍
أنا بنت عمري (32 سنة) كنت مخطوبة لـ “ترافيس” (33 سنة). لكن قبل الفرح بكام أسبوع، فجأة قالي إنه مش عايز يتجوز!
سألته لو كان بيخوني؟ وقال لأ.
قالي إن أغلب أصحابه ابتدوا يتجوزوا ويعملوا عيله، فكان فاكر إنه جه الوقت إنه يستقر هو كمان، لكن أخد باله إنه مش عايز يتجوز دلوقتي.
في الآخر، الفرح اتلغى وعلاقتنا انتهت.
عدت سنة من وقت اللي حصل ده. نفسيتي مكنتش كويسة قوي، بس كنت بحاول أكون أحسن.
من كام يوم، وصلتلي دعوة فرح بنت عمي “تايلور” (26 سنة). وتقدروا تتخيلوا صدمتي لما فتحت الدعوة واكتشفت إن العريس هو خطيبي السابق!
أنا كنت بشوفهم يادوب بيتكلموا مع بعض كام كلمة بس في تجمعات العيلة، وماخدتش بالي خالص إن كان فيه بينهم حاجة.
علي فكره بنت عمي شخصيتها مختلفة قوي ومش تقليدية نهائي، هي بتشتغل فنانة. بتصبغ شعرها بألوان غريبة (زي الأزرق أو الأخضر مثلًا)، ولبسها دايمًا ملفت وغريب قوي. ودايمًا بتقول إنها مش بتحب تمشي ورا كلام المجتمع والناس، وإن مش بتسمع كلام حد غير دماغها وبس.
على طول، كلمت أهلي. سألتهم إذا كانوا يعرفوا حاجة عن الموضوع ده؟ للأسف، آه، كانوا عارفين، بس ماكانوش ناويين يقولولي علشان مازعلش. بس كمان قالولي إنهم متوقعين إني أحضر الفرح علشان احنا عيله ولازم ندعم بعض!
في اللحظة دي انفجرت فيهم، وصرخت وقلت إنهم عايشين في الوهم لو فاكرين إني هاروح فرح خطيبي السابق الكداب الخاين ومعاه البنت المجنونة اللي عاملة نفسها ملاك.
قالولي إني ماينفعش أفضل حاسه بالكره والغل طول عمري، ولازم أنسي وارمي كل حاجة ورايا! قفلت السكة في وشهم.
علي فكرة عيلتنا مترابطة جدًا، وأهلي ربوني على إن العيلة دايمًا بتيجي قبل أي حاجة.
دلوقتي أنا حزينة ومحبطة قوي وزعلانة من عيلتي. بس رد فعلهم خلاني أشك في نفسي. قولوا لي ان أنا عندي حق.
▪️ تحديث:
بعد ما فكرت كويس، قررت إني مش هاحضر الفرح.
كمان حكيت لكل صحابي على اللي حصل، وكانوا غضبانين قوي. قلتلهم على اقتراح إننا نسافر في نفس أسبوع الفرح، وفعلاً بدأنا نخطط للرحلة خلاص.
حصل كمان حاجة غريبة. ترافيس اتصل بيا وطلب يقابلني علشان نتكلم. عارفة إن ده تصرف غبي مني، بس وافقت.
قابلته في مكان عام، وقلتله إني عايزة أعرف بالظبط إيه اللي كان ما بينه وبين تايلور. وده اللي قاله:
أول حاجة، قعد يقسم ويأكدلي إنه عمره ما خاني. (بصراحة مش متأكدة لو الكلام ده حقيقي ولا لاء). قاللي إنه هو كمان كان زعلان ونفسيته تعبانه بعد مابعدنا عن بعض، وإنه في يوم كان خارج مع اصحابه عادي، وبالصدفة بنت عمي كانت موجوده في نفس المكان، وبدأوا يتكلموا، وبعدها بفترة ارتبطوا. وانه قرر يتجوزها بسبب حاجة خاصة بينهم.
بعد الكلام ده، كل واحد راح في حاله. هو قاللي “بتمنالك التوفيق”، وأنا رديتله نفس الكلمة. وأول ما رجعت البيت، عملتله بلوك على طول.
خلاص، دي كانت آخر حاجة. ومش هعمل تحديث تاني. وبجد، شكرًا ليكم مرة تانية على دعمكم وقت ما كنت فعلا محتاجاه ❤️
