أنا “مديرة” في شركة “سوفت وير”.. واحدة من الموظفات عندنا في الشركة للأسف باباها ومامتها فقدوا حياتهم في حادثة عربية.
الموظفة دي صغيرة جدًا “عندها 22 سنة” وبتشتغل معانا من 10 شهور.
الحقيقة هي موظفة ممتازة جدًا. لدرجة اننا كنا بنفكر نرقيها كمان 6 شهور.
وعلي فكرة احنا مقدرين انها شاطرة. علشان كده هي بتاخد مرتب عالي جدًا بالنسبة لخريجة جديدة، (حوالي 90 ألف دولار في السنة) مرتب أساسي +عمولات، وطبيعي نكون متوقعين منها في المقابل شغل ومجهود كبير.
بعد الحادثة إديناها شهر أجازة مدفوعة الأجر، الشهر خلص ورجعت. بس المشكلة أن أدائها في النازل جدًا. مش متحمسه خالص، ولا بتكلم عملاء جدد ولا بتتواصل مع حد.
هي رجعت من 3 أسابيع. ومن ساعة ما رجعت. وكل فريق الإدارة واخد باله من أدائها السيء. علشان كده قررنا نستغنى عنها. لأننا حاسين إنها هتحتاج شهور طويلة جدًا عشان ترجع تنتج زي الأول. وإحنا مش هنقدر نستنى كل المدة دي.
إحنا عملنا معاها اجتماع وبلغناها بالخبر الوحش ده.
هي في الاول كانت هادية قوي. بس فجأة بقت وقحة جدًا. وقالت لنا ” غوروا في ستين داهية” وقامت وراحت لمكتبها جمعت كل حاجتها ومشيت.
أنا بصراحة شايفة إن رد فعلها كان مش مهني خالص. وماينفعش تشتم الاداره كده” احنا صبرنا عليها كتير.
لما حكيت لجوزي عن اللي حصل. قالي إن أنا وفريق الإدارة بتاعي ناس ماعندناش قلب ولا رحمة!
بصراحة كلامه ضايقني. علشان كده فكرت أسأل. تفتكروا عندي حق امشيها وكفايه صبرنا عليها شهر و 3 أسابيع.. ولا جوزي عنده حق والمفروض كنا نصبر أكتر؟
🔔 تحديث:
يا نهار أبيض الموضوع كبر جدًا! وكل الناس بالاجماع قالوا اني غلطانه.
دلوقتي أتأكدت إن اللي عملته كان غلط فعلًا.
أنا كلمتها عشان أطمن عليها وأشوف هي عاملة إيه دلوقتي.
طلعت قاعدة عند صاحبتها المقربة وهي واقفة جنبها جدًا اليومين دول.
عرضت عليها إني أوصلها بصديقي اللي شغال (في شركة توظيف) لما تكون جاهزة تاني للشغل، وهي وافقت.
_________
مقتبسة عن قصة منشورة في ريديت.. أصحاب القصة أجانب.
