جواز مفاجيء 💍🎉
أنا وخطيبتي عندنا اتنين أصحاب مشتركين اتجوزوا الاسبوع اللي فات. وطبعًا كنا معزومين.
إحنا كمان كنا مخططين نتجوز، بس لسه مش محددين ميعاد معين. فجأة جاتلي فكرة:. ليه منستغلش الفرصة ونتجوز إحنا كمان في نفس الفرح طالما كل أصحابنا موجودين. والأكل كده كده موجود. كل اللي محتاجينه قاضي أو قسيس ممكن احجز معاه ميعاد أونلاين.
اقترحت الفكرة علي خطيبتي وعجبتها ورتبنا الموضوع بسرعة. علي فكره إحنا الاتنين أصلاً شخصيات عفوية جداً.
وأنا في الفرح، طلبت من الدي جي إنه يديني فرصة أقول حاجة صغيرة.
قلت للناس إني محتاج منهم حوالي أربع دقايق بس، وطلبت منهم يتجمعوا قدام القاعة.
كنا متفقين مع “قسيس” اتأكدنا إنه يقدر يعمل الجواز رسمي. ولما كل الناس اتجمعت حوالينا، أنا وخطيبتي اتجوزنا. كانت مراسم بسيطة وسريعة جدًا.
أول حاجة خليتني أحس أن في حاجة غريبة. هو “رد فعل” الناس بعد ما اتجوزنا. مفيش حد بان عليه الفرحة ومفيش تصفيق خالص!
أنا كنت متخيل إن الناس هتكون مبسوطة جدًا بالفكرة. لكن بدل كده، سمعت وشوشه كده مش مريحة.
ولما رجعنا على ترابيزتنا، كنت مستني الناس تيجي تبارك لنا، بس للأسف ٣ أشخاص بس هما اللي جم، وحتي دول كان باين عليهم كأنهم بيقولوا مبروك بالعافية!
كنت متلخبط جدًا، ومراتي كمان كانت مستغربة. وفجأة، العريس قالي عايزك بره. ولما خرجت معاه أنا ومراتي، فجأة اتجنن حرفيًا! فضل يزعق فينا ويقول. إيه القرف ده؟! وايه التصرف الزفت اللي انت عملته دلوقتي ده؟! وقال إن مراته قاعدة بتعيط في مكان لوحدها.
مكنتش عارف ليه كل ده يعني. أنا عملت ايه يعني لكل الغضب ده!!
بعدها اصحاب العريس جم، وكانوا برضه زعلانين مننا جدًا بس بيحاولوا يهدّوه. وواحد من اصحابنا وقال لنا إن الأحسن نمشي دلوقتي.
مشينا فعلاً. بس أنا لسه مش مستوعب اللي حصل. معقول يكونوا أنانيين للدرجة دي. ده هما ٤ دقايق بالظبط اللي اتاخدوا من وقت فرحهم؟ ده المفروض تكون مفاجأه حلوه ويفرحوا عشان اصحابهم اتجوزوا، مش يزعلوا للدرجة دي.
أنا دلوقتي عارف أن شكلي بوظت الدنيا، بس لحد دلوقتي حاسس انهم بالغوا في رد فعلهم قوي.
_______________________
القصة مترجمة من ريديت. أصحاب القصة أجانب.
#قصص
#قصص قصيرة
