قالت لي أنها مع صاحبتها!!
أنا (28) سنة ناوي اتقدم لخطوبة أديلين قريب.احنا نعرف بعض من 3 سنين. هي عمرها (26).
بصراحة، أنا مش شاطر في اختيار المجوهرات. أنا من النوع اللي مش شايف أي مشكلة في المجوهرات على شكل قلب (بجد ليه الناس بتعتبرها وحشة؟)، فكل مرة أحب أشتري حاجة ل أديلين، عادةً بحتاج مساعدة من واحدة من اصحابنا المشتركين.
أنا اعرف كل صاحباتها المقربين, وبنتعامل كويس مع بعض، فعشان كده بطلب منهم المساعدة دايمًا في اختيار المجوهرات.
لما جه وقت اختيار خاتم الخطوبة، طلبت مساعدة صاحبة أديلين المقربة، “جوستين” (اسم مستعار). هي تعرف خطيبتي أكتر مني، فهي أحسن حد يساعدني.
لما أديلين راحت تزور أختها وابن أختها، طلبت من جوستين تقابلني عشان نختار الخاتم.
قعدنا أنا وجوستين نبص علي كام كتالوج، لكن حسينا إننا مش هنلاقي حاجة مناسبة، واتفقنا إن الأحسن نروح محل مجوهرات عشان نشوف أشكال تانية.
ما كنتش عارف إمتى أديلين راجعة، ففكرنا نبعت لها رسالة لطيفة نعرف منها هتقعد عند أختها قد إيه.
بعت لها وسألتها هترجع إمتى.
ردت عليا وقالت إن هترجع بعد كام ساعة، وإنها قابلت جوستين عشان يروحوا يشتروا حاجات مع بعض!!!
طبعًا، أنا اتفاجأت، لأن جوستين كانت واقفة جنبي! وريتها الرسالة، وكانت متفاجئة زيي بالضبط!!!
طبعًا واضح إن الكلام ده مش حقيقي.
لما شوفت أديلين كانت بتتصرف عادي جدًا، وأنا عملت نفسي طبيعي، لكن الموضوع كان صعب جدًا إني أتصرف كأن مفيش حاجة.
طلبنا أكل، وأكلنا مع بعض، فضلنا قاعدين عادي. هي بدأت تحس شوية إن في حاجة مضايقاني، بس مش قادر أقول لها علي اللي مضايقني. كل ما أبصلها بحس بالألم.
مش عارف أعمل إيه. أنا و أديلين علاقتنا مفيهاش أي مشاكل ثقة، وبنحكي كل حاجة لبعض، فالكذبة دي تعباني جدًا.
نفسي أسألها عن الموضوع، لكن لو قلت لها إني عارف إنها كذبت عليا، هبقى مضطر أشرح لها إزاي عرفت، و أنا مش عايز أعمل كده. أتصرف إزاي؟
عارف إنها كدبت عليا لكن مش عارف أواجهها إزاي. هل أتجاهل الموضوع؟
مش عارف أطلع الموضوع من دماغي. محتاج نصيحتكم!
تحديث:
قررت أواجه أديلين. فكرت استخدم الافكار اللي الناس اقترحها ، لكن مفيش فكرة كانت هتبقى منطقية.
لو قلت إني قابلت “جوستين” في مكان صدفة: طيب أنا كنت قايل لها إني مضطر أقعد في البيت و أعمل شوية حاجات، وده السبب اللي منعني إني أروح معاها أشوف أختها.
ولو قلت إن جوستين كانت معاية و بتساعدني أختار مجوهرات: مش منطقي إنها تيجي معاية عشان مجرد قطعة مجوهرات إلا لو كانت حاجة جدية زي خاتم الخطوبة. لو كنت عايز أشتري لها قطعة مجوهرات كهدية، كنت هسأل صحباتها يقترحوا حاجة أو يبعتوا لي صور لحاجات ممكن تعجبها، وعادة بيحصل ده كله في الرسائل. مفيش عذر كان هيبقى منطقي أني قابلتها، فقررت أكون صريح.
قلت لها بصراحة إننا كنا بنتكلم عن الجواز، وهي أكيد عارفة إن الخطوبة قربت، فطلبت من جوستين تساعدني أختار الخاتم المثالي، وده حصل بالصدفة في نفس اليوم اللي قالت لي إنها خارجة تقابلها، فإيه الموضوع؟
على طول بدأت تضحك زي العبيطة وتسألني عن الخطوبة والخاتم، لكن رجعنا تاني لموضوع هي كانت فين، واعترفت باللي كانت بتعمله. لاء، مكنتش بتخوني، ولا كانت بتختار لي خاتم (كمية الناس اللي قالت الاحتمال ده كانت مجنونة).
بصوا، في ناس بتحب الكلاب وفي ناس بتحب القطط. وأنا؟ أنا بحب الأفاعي. اتربيت طول عمري عندي أفاعي في البيت. لكن عمري ما حسيت إني أقدر أجيب واحدة، لأن أديلين دايمًا كانت متوترة من الفكرة، وأنا كنت بحترم ده تمامًا.
كمان عملية شراء وتربية الأفعى مختلفة تمامًا عن الكلب أو القطة، ومعقدة شوية. فتقدروا تتخيلوا دهشتي لما ورّتني صورة ليها وهي شايلة “ثعبان ساند كيني” كيوت جدًا!
اللي حصل إن أديلين كانت ناوية تفاجئني بثعبان! هنروح نجيبه الأسبوع الجاي (قولوا لي لو عايزين تشوفوا صورة، الثعبان كيوت أوي).
بصراحة ماكنتش متوقع خالص، وحاسس بالذنب إني خربت المفاجأة، لكن يلا مش مشكلة. الحياة حلوة!
(القصة حقيقية )
#قصص
