فساتين خطيبتي!!
أنا راجل عندي 43 سنة.
بصراحة، مش شايف إنّي غلطان في حاجة، لكن أمي غضبانة مني جدًا، وخطيبتي قالتلي إنّي شخص فظيع!
خطيبتي عندها 34 سنة، وبتشتغل مدرسة لأطفال مرحلة الـ KG.
ولسبب مش مفهوم بالنسبة لي، خطيبتي بتحب تلبس لبس شبه Ms. Frizzle (الصورة في التعليقات).
يعني فساتين عليها رسومات وأشكال متعلقة بالمواد اللي بتدرسها للأطفال، وبتفصل الفساتين دي بنفسها، وبتخيط عليها الأشكال، وكمان بتعمل قبعات بنفس قماشة الفستان.
الأطفال بيحبوا لبسها جدًا، وواضح إن أمهات الأطفال شايفين إن ده شيء لطيف. بس أنا بصراحة مش عاجبني اللي هي بتعمله.
كنت ممكن أتغاضى عن الموضوع لو كانت بترجع البيت وتغير هدومها قبل ما تخرج مشاوير تانية.
المشكلة حصلت يوم الجمعة.
خطيبتي قررت تخرج مع أمي بعد الشغل تساعدها تشتري شوية حاجات، وكانت لسه لابسة الفستان الغريب ده. أنا قلتلها إن تصرفها ده مش عاجبني، وإني شايف اللبس ده غير مناسب، لكن هي ردّت وقالتلي إن ده مش من حقي، وإنها حرة تلبس اللي هي عايزاه.
أنا اتضايقت جدًا، وقلت لها كذبة صغيرة: قلتلها إن أمي كانت محرجة من لبسها، وطلبت منها ماتخرجش كده تاني وهي معاها. ماكنتش متوقع إنها تتصل بأمي، بس للأسف ده اللي حصل.
خطيبتي كلمت أمي علشان تعتذر لو كانت أحرجتها، لكن أمي استغربت جدًا، وقالتلها إن مفيش أي مشكلة، وإنها حرة تلبس اللي يريحها، وبالعكس، شايفة إن ده شيء جميل منها إنها بتقضي وقت في تفصيل فساتين مخصوص علشان تفرّح الأطفال.
دلوقتي أمي غضبانة مني جدًا، وصرخت عليّ علشان كذبت على خطيبتي،وقالتلي إني كنت هأبوّظ علاقتهم ببعض.
دلوقتي أنا وخطيبتي متخاصمين، وهي زعلانة ومش راضية تكلمني. بس أنا لسه شايف إن اللبس لازم يكون مناسب أكتر للمكان اللي هي فيه.
هل أنا فعلاً غلطان للدرجة دي؟
▪️ تحديث:
أنا متأكد إن كل الناس هنا هيفرحوا بالخبر ده…
خطيبتي انفصلت عني.
قالت إني مسيطر، وماعنديش استعداد أسمع غير نفسي، وسابتني.
أنا حزين جدًا.
(القصة حقيقية ومترجمة من ريديت).
