فرح بنتي👰💍✨
أنا ست عمري 50 سنة..وحاليًا في موقف صعب جدًا ومحتاجة لنصيحة.
عشان أوضح الصورة، من حوالي 24 سنة، اتعرضت لاغت””*اب من واحد كان يعتبر “أقرب صديق ليا”.
وللأسف اكتشفت بعدها إني حامل، وساعتها كنت عايشة في مكان ممنوع فيه الإجهاض. فضلت منهارة لفترة طويلة ومكنتش عارفة أرجع لحياتي الطبيعية تاني.
جوزي كان فعلاً هو سندي الوحيد، ومش عارفة بصراحة كنت هعمل إيه من غيره. هو قال لي إني أقدر أعرض الطفلة للتبني لو مش عايزة أربيها، أو تعيش معانا وهو هيربيها مع بقية أولادنا.
فكرت وفي الآخر قررت إني مفرّطش فيها، بس بصراحة تربية البنت ما كنتش سهلة خالص.
أنا وجوزي من ألمانيا وبولندا. وإحنا الاتنين بشرتنا فاتحة، وشعرنا أشقر وعيونا زرقا، وكمان إحنا الاتنين طوال. لكن بنتنا “لونا” قصيرة، وشعرها غامق وبشرتها سمراء. زي والدها البيولوجي.
كنت دايمًا بسمع تعليقات سخيفة جدًا من الناس وتلميحات إني ست خاينة، عشان كان باين قوي إن لونا مش بنت جوزي. وده كان بيوجعني جدًا.
ده غير إنها كانت شبه والدها البيولوجي قوي وهي صغيرة. علشان كده جوزي كان هو اللي بيراعيها معظم الوقت، لإني كل ما كنت ببص في وشّها، كانت بتجيلي ذكريات مؤلمة وبفتكر اللي حصل.
بس الحمد لله مع مرور السنين، المشاعر دي خفّت شوية، بس أحيانًا كان بيجيلي نوبات هلع فظيعة لما كنت بشوفها لابسة لبس شبه الأولاد.
بسبب نوبات الهلع دي، لونا بقت قريبة لجوزي أكتر مني بكتير. وكمان جوزي بقه بيدلعها أكتر شوية من إخواتها، علشان يعوضها عن اللي أنا مش قادرة أقدمه لها.
إحنا عمرنا ما قلنا لها إنها جت نتيجة إغ،،،اب، لإني كنت حاسة بإحراج رهيب من الموضوع ده، وجوزي ما كانش عايزها تحس إنها مختلفة عن إخواتها.
كنت دايمًا بقول لها إني أنا ووالدها البيولوجي حصل بينا خناقة كبيرة ومارجعناش نتكلم مع بعض تاني.
من حوالي سنتين، “لونا” عملت اختبار الـDNA ودخلت النتيجة في برنامج يقدر يعرفها مين أهلها، وفعلاً قدرت توصل لحد من عيلتها البيولوجية.
قريبها ده وصلها بوالدها، وابتدوا يتكلموا مع بعض، رغم إني وقتها كنت معترضة جدًا.
هو الظاهر كده، كان عايز يكلمني في موضوع مهم وكان مصرّ إنه يوصل لي.
لونا حاولت تقنعني إني أتكلم معاه، لكن أنا صممت علي الرفض. وعرفتها إن أنا ووالدها مستحيل نكون مع بعض في مكان واحد أبدًا.
دلوقتي، “لونا” هتتجوز شاب محترم وجميل. وكنا متفقين أن جوزي هو اللي هيمشي مع لونا في الممر ويسلمها لجوزها. بس للأسف جوزي عنده مشكلة صحية وتعبان.
لونا قالتلي إنها قررت تعزم والدها علي الفرح. وكمان عايزاه هو اللي يمشي معاها في الممر.
العزومة دي مش بس صدمة كبيرة بالنسيه لي، دي كمان تعتبر إهانة كبيرة للرجل اللي ربّاها ووقف جنبها طول حياتها.
جوزي كان باين عليه الصدمة والحزن، وأنا غضبانة جدًا.
أنا بكره الراجل ده من كل قلبي، وقلت لها بصراحة إني مستحيل أوافق إنها تعزمة.
هي ردّت عليّا وقالتلي إن ده فرحها وهي حره تعمل اللي هي عايزاه. وهي محتاجة أبوها معاها في اليوم ده.
قلتلها من الآخر كده لو عزمتي الراجل ده. أنا مش هحضر الفرح. وده آخر كلام عندي.
زعلت وقالتلي إني بعاقبها بسبب حاجات حصلت من 100 سنة، والمفروض خلاص بقه أنسي الماضي.
قولت لها إنتي ما تعرفش اللي حصل بيني وبينه زمان، وماتقعديش تتكلمي في حاجات ماتعرفيهاش.
أنا عارفة إني غلطانة علشان ماقولتش لبنتي الحقيقة. بس حاسة إنها لازم برضه تسمع كلامي وتحترم رغبتي.
أنا دلوقتي ماعنديش مشكلة إنها تتواصل مع أبوها، بس أنا مش عايزة أشوفه تاني طول حياتي.
وكمان، بصراحة، شايفه إن قلة ذوق منها جدًا إنها تستبدل أبوها الحقيقي — اللي ربّاها طول عمرها — براجل تاني ما تعرفوش غير من سنتين، لمجرد إنه تعبان شوية ومش هيقدر يمشي.
تفتكروا عندي حق أرفض إني أروح فرح بنتي بسبب إنها مصممه تعزم أبوها؟
🔔 تحديث:
قبل ما أكتب التحديث، في شوية حاجات حابة أتكلم عنها:
ناس كتير سألتني ليه ما قلتش لبنتي الحقيقة من الأول. والجواب ببساطة إني كنت محرجة.
قبل ما أتجوز جوزي، كنت قريبة جدًا من الشخص ده وكنا أصحاب مقربين. إحنا اتربّينا سوا في مجتمع صغير، وعيلتنا كانت قريبة من بعض (وأهلنا كانوا نفسهم نرتبط).
هو كان دايمًا باين عليه إنه معجب بيا وبيحبني، وأنا مكنتش بديله فرصة. لكن ارتبطنا ببعض شوية وإحنا في الجامعة.
وبعد فترة، سبتُه وابتديت أخرج مع جوزي وحبيته قوي، بعدها اتجوزت وخلفت. بس ما قطعتش علاقتي بيه تمامًا، لإن صداقتنا كانت قوية جدًا.
في مرة عزمني علي مشروب. بعدها مكنتش في وعيي قوي و….
للأسف بعدها لما حاولت أفضحه. هو قال إني عملت كده بمزاجي وحاول يشوه سمعتي. هو كان معروف انه طيب ومحبوب وأغلب الناس صدقته. خصوصًا إن إحنا كنا مرتبطين قبلها.
حتي لما بلغت عنه. هو أنكر ومحدش عمل له حاجة.
عرفت بعدها إني حامل وقررت أسيب المنطقة كلها خالص وأبعد عن كل ده..كمان نفسيتي كانت تعبانه جدًا جدًا.
نرجع للتحديث:
اتكلمت مع بنتي وحكيت لها كل حاجة بصراحة. للأسف في الأول مكنتش مصدقاني.وريتها صورة المحضر. كانت مصدومة ومش مستوعبة. قولتلها خدي وقتك وفكري وبعدين نتكلم.
فعلاً بعدها قعدت تتكلم معايا وأعتذرت وقالت إنها مصدقاني. اتكلمنا في حاجات كتير وحاسيت إننا قربنا من بعض قوي.
عدت فترة ولقيت بنتي بتقولي إنها عزماني في مطعم لطيف. وافقت ولما وصلت أتفاجأت إنها عزمت والدها. وبتقولي لازم تتكلموا مع بعض وتتعاتبوا علشان ده هيساعدك تتحسني وتسامحي وتنسي الماضي.
اتصدمت وحاولت أمشي بس والدها مسك إيدي وقالي أرجوكي استني. مجرد ما لمسني أفتكرت كل الحاجات اللي بقالي سنين بحاول انساها.
طلعت أجري علي العربية وكنت هقع. ومن صدمتي مكنتش قادرة أسوق. اتصلت بابني يجي ياخدني.
بنتي اتصلت بيا. قولتلها ليه عملتي كده؟
قالتلي علشان تتعافي بقه وتنسي اللي فات. وفهمت من كلامها إنها لسه عايزة تعزمه علي الفرح.
أنا خلاص أخدت قرار نهائي. أنا مش هحضر فرحها وجوزي بيدعمني في قراري.
المشكلة دلوقتي إني خايفة أخواتها يعرفوا الحقيقة وساعتها ممكن يرفضوا يحضروا الفرح. ويقولوا لعيلة أبوهم. وأنا أكيد مش عايزة ده يحصل.
🔔 تحديث:
بدأت علاج مع دكتورة لطيفة جدًا..وهي نصحتني أقول لأولادي الحقيقة..فعلاً جمعتهم وحكيتلهم كل اللي حصل زمان.
كانوا زعلانين قوي وغضبانين علشان بنتي لسه بتتواصل مع أبوها وعايزة كمان تعزمة علي فرحها. حتي بنتي الكبيرة قعدت تبكي. (علي فكرة أنا عندي ولدين وبنت كمان غير لونا).
بنتي الكبيرة كانت زعلانة جدًا من لونا وبدأت تكتب منشورات علي الفيس بوك وتهاجم أختها وتقول إنها أختارت شخص حقير. بدل والدها اللي رباها طول عمره. وأعتبرها بنته وكان بيعاملها أحسن معاملة..
أنا زعلت وطلبت منها تمسح الكلام ده.. قالتلي ماشي. بس للأسف المنشورات وصلت لخطيب لونا وعرف الحقيقة وقرر يفسخ الخطوبة.
خطيب لونا السابق ومامته طلبوا يقابلوني. وقالوا إنهم مش عايزين بنتي تكون جزء من عيلتهم لإنها ناكرة للجميل. وحماتها قالتلي إنها صعب توافق علي الجوازة دي. لإنها شايفة إن البنت جاحدة..
دلوقتي بنتي عايشة مع أبوها. وعرفت إنها حزينة ومكتئبة وللأسف بعتتلي رسالة بتشتمني وبتقولي إني دمرت حياتها.
حاولت اتصل بيها. أبوها اللي رد عليا. وأنا قفلت المكالمة علي طول أول ما سمعت صوته.
طبعًا أنا زعلانة علشان بنتي وخايفة عليها من أبوها. بس الدكتورة بتقولي هي اللي اختارت. وهي اللي عملت في نفسها كده.
دلوقتي كل الناس بتنصحني أركز علي نفسي. وأنا مش قادة أبطل قلق عليها.
هي دي القصة كلها. شكرًا لكل حد سمعني ونصحني.
__________
القصة مترجمة من ريديت، أصحاب القصة أجانب.
