“صاحب ابني”
انا عمري 28 سنه
وابني عمره 8 سنين
للاسف طليقي مش بيدفع اي نفقه للطفل (حاولت كتير ومافيش فايده)
انا سيبت المدرسه الثانوي , اشتغلت في وظايف كتير جدا
علشان اقدر اصرف علي نفسي وعلي ابني
احنا مش تحت خط الفقر
بس يادوب المرتب بيكفي احتياجاتنا الاساسيه
للاسف مش بقدر اوفر لابني الكماليات , وبعترف انه محروم من حاجات كتير ممتعه.
انا وابني عايشين في شقه من غرفه واحده
بس ان شاء الله خلال السنتين الجايين الوضع يتحسن.
انا ربيت ابني علي القناعه , وهو عارف ان مش كل حاجه نفسه فيها يقدر يشتريها.
بحاول علي اد ما اقدر اخلي اعياد الميلاد والعطلات ممتعه
مش بعمل حاجات كبيره بس علي اد امكانياتي.
في المدينه الي احنا عايشين فيها , المدارس بتمشي بنظام القرعه
المدرسة اللي في منطقتنا مش كويسة وموجودة في منطقة مش حلوه، فقررت ادخل ابني مدرسة تانية في الطرف التاني من المدينة. المدرسة دي قريبة من شغلي، علشان كده هي مناسبه جدا.
السنة اللي فاتت، لما ابني كان في الصف الثاني، اتعرف على صديقه “تشارلي”
بدأ ابني “اوين” يخرج معاه كتير بعد المدرسه كمان بيروح بيت “تشارلي”
قابلت مامته تشارلي وباباه “نيت و بايج” , حبيتهم وكانوا لطاف معايه جدا
بدأ “اوين” يقضي وقت كويس قوي في بيتهم. احيانا تشارلي بيجي بيتنا بس مش كتير . معظم الوقت ابني الي بيروح عندهم .وده طبعا منطقي
لاني بشتغل والبيت اصلا مافيهوش اي حاجه ممتعه.
(مامت تشارلي ربه منزل)
“تشارلي” كان رايح مخيم في اجازه الصيف لمده اسبوع
مامته طلبت مني اسمح ل “اوين” يروح معاهم
انا كنت متردده , بس هي اصرت.
ابني راح فعلا و استمتع جدا بالانشطه
حاولت اسدد جزء من الفلوس الي ادفعت لابني , بس “بيج” رفضت تاخد مني اي فلوس.
بصراحه وقتها ماكنتش مرتاحه انهم دفعلوا المبلغ ده كله لابني
بس في نفس الوقت مش عايزه احرم ابني من الحاجات دي.
مره تانيه “نيت وبايج” طلبوا ان ابني يروح معاهم معسكر تاني.
للمره التانيه كنت متردده بس بصراحه انا عارفه انها تجربه جميله لابني
وانا مش هقدر اقدمله كل ده وعارفه هو اد ايه هيستمتع علشان كده وافقت.
شكرتهم من قلبي علي كل الي بيقدموه لابني , وقولتلهم اني مش عارفه ارد جمايلهم ازاي.
قالولي انهم بيحبوا ابني جدا لانه طفل رائع ولطيف ومحترم.
بعد فتره ضغطت علي “بيج” وكنت مصممه اعرف هي ليه مصره قوي كده ان ابني يكون معاهم معظم الوقت؟
اعترفتلي ان هي وجوزها كانوا بيتمنوا ينجبوا طفل تاني علشان يكون اخ ل تشارلي , هما مش عايزين ابنهم يكون وحيد , لكن كان في مشاكل في الانجاب.
هما شايفين ان ابني صاحب كويس قوي لابنهم علشان مايحسش انه وحيد.
المفروض كنت اخد بالي اكثر من الكلام ده , واركز ان في حاجه غلط
بس الحقيقه وقتها فكرت ان الكلام لطيف , وكويس ان ابني و تشارلي يكونوا زي الاخوات.
في عيد الميلاد اشتروا لابني هدايا اكثر مني
كالعاده قبلت الهدايا وقولت مش مشكله كبريائي , المهم ابني يكون مبسوط.
كنا في اجازه الربيع والمره دي ماطلبوش انهم يهتموا بأبني طول النهار زي ما بيعملوا كل يوم (لما بكون انا في الشغل)
لاء طلبوا ان ابني يقضي الاسبوع كله عندهم.
بصراحه فكرت اني كده اقدر اشتغل اكثر من ورديه , وده معناه فلوس اكثر وبكده ممكن اشتري لابني الدراجه الي نفسه فيها في عيد ميلاده.
علشان كده وافقت.
عدي الاسبوع وروحت علشان اجيب ابني من عندهم , كان بيلعب مع صاحبه
وقتها طلبوا يتكلموا معايه.
قالولي انهم بيحبوا “اوين” قوي , ووجوده معاهم بيحسسهم بالسعاده.
شكرتهم.
مامت تشارلي قالتلي خليه قاعد معانا اسبوع كمان , وهي الي هتوديه المدرسه وترجعه.
استغربت قوي , ورفضت
قولتلهم كفايه ولازم ابني يرجع بيته.
ردت عليه انهم هيهتموا بيه جدا , وانا اقدر اشوفه وقت ما احب!!!
اعتقدت انها بتهزر وضحكت , قولتلها انتي ناويه تتبني “اوين “ولا ايه؟
سكتوا الاتنين……
بدأوا يوضحوا ان الاجراءات القانونيه هتكون سهله وهما هيساعدوني
وبلاش تفكري في نفسك , فكري في مصلحه ابنك.
طبعا اتصدمت من طلبهم الغريب ومسكت ابني وماشيت
عملتلهم بلوك 🚫
ابني مش عارف اي حاجه بتحصل.
انا عارفه ان من الناحيه القانونيه مايقدروش ياخدوا ابني من غير
إرادتي , بس بصراحه انا مرعوبه , وبفكر اخد اجازه من الشغل علشان اعرف هعمل ايه؟
بفكر انقله لمدرسه تانيه؟ اسيب المنطقه خالص؟
مش عارف ايه التصرف السليم انا تايهه …….
كان لازم اكون حريصه اكثر واخد بالي من نواياهم
دلوقتي انا عارفه ان ابني هيزعل جدا علي “تشارلي وبايج ونيت”
ومش عارفه اقوله ايه؟؟؟
🌹#تحديث
🌿الناس الي بتقولي ان نيتهم كويسه ومش عايزيين حاجه وحشه.
دول عرضوا عليه يتبنوا ابني , مش مجرد يقعد معاهم كام يوم وخلاص
مستحيل اقبل ده.
🌿والناس الي بتقولي وافقي
انا مش عارفه بصراحه انتوا بتفكروا ازاي!!!
اخدت بنصيحه الناس واتواصلت مع المدرسه وقولتلهم مش مسموح ابدا ل “بايج ونيت” ياخدوا ابني مره تانيه , وشرحتلهم ان ابني مش في امان معاهم.
للاسف مش مسموح ان ابني يروح فصل تاني دلوقتي
بس السنه الجايه اكيد هنقله فصل تاني بعيد عن “تشارلي”
كمان بلغت الشرطه , مفيش اي حاجه ضد القانون , ده كان مجرد طلب
بس عملت كده علشان ابني يكون في امان اكثر.
ابني لسه بيلعب في المدرسه مع “تشارلي”
مفيش مشكله بالنسبه لي علشان هما جوه المدرسه.
دلوقتي انا بفكر في طريقه اشرح لابني ليه ممنوع يروح او يبات عندهم مره تانيه.
لو في اي جديد هعمل تحديث
🌹#تحديث
اتكلمت مع ابني وقولتله انه مش في امان معاهم.
كان مستغرب
قولتله “نيت وبايج” عايزين ياخدوك بعيد عني ومش هعرف اشوفك مره تانيه ابدا
ابني خاف قوي , حضنته
قالي انه مش عايز يسيبني , ووعدني انه مش هيورح معاهم لاي مكان تاني.
قولتله مفيش مشكله تلعب مع صاحبك جوه المدرسه
قالي انه مش عايز
كنت خايفه ابني يكرهني بس الحمد لله لما قولتله الحقيقه فهم واستوعب الموقف.
🌹#تحديث
ابني بيركب الاتوبيس بعد المدرسه علشان يروح مركز ترفيهي مخصوص للرعايه بعد المدرسه , هو بيستني هناك لغايه ما اخلص شغلي.
لما ابني وصل هناك ومرت نص ساعه
حد اتصل بيه من مركز الرعايه , الي فاهمته ان “بيج” وصلت وكانت عايزه تستلم ابني
الموظفين هناك عارفين انها ممنوعه تاخد ابني
علشان كده رفضوا يسلموا الولد
“بيج” رفضت تمشي من غير ابني , علشان كده اتصلوا بالشرطه
هي ما اتحجزتش في قسم الشرطه , بس انا دلوقتي معايه تقرير واقدر اروح المحكمه واعمل امر حمايه.
ابني لما عرف كان خايف جدا وقالي انه مش عايز يسيني ابدا ❤
