خطيبه بابا عايزه تتخلص مني!!!
#حواديت_الاجانب
انا بنت عمري 15 سنه
امي اتوفت من 5 سنين , انا بفكر فيها كل يوم
بعد وفاتها بابا جاله اكتئاب شديد علشان كده كان لازم اعتمد علي نفسي في حاجات كتير
من قريب بابا قالي ان ارتبط بواحده ست (43سنه) , واضح انه اتعرف عليها من فتره.
لاحظت ان بابا سعيد
انا كمان كنت فرحانه علشانه
اكيد مش عايزه بابا يفضل وحيد للابد
بس بعد كده حاسيت ان امي بتتمحي تماما
مبقاش عايز يتكلم عليها خالص
واتخلص من كل الصور الي بتجمعهم مع بعض
بابا قالي ان خطيبته هتقضي عيد الميلاد معانا
بصراحه الخبر كان سيء بالنسبه لي وماكنتش فرحانه , انا حتي ما اعرفهاش,
بس ماقولتش حاجه وسكت
شوفتها في يوم عيد الميلاد
انا وبابا من زمان عندنا طقوس معينه بنعملها اليوم ده من سنين
لازم نحط النجمه علي الشجره مع بعض , ونتفرج علي فيلم The Grinch.
احنا بنعمل ده من وقت ما كانت ماما لسه معانا
لما خطيبته جت عندنا هي الي حطت النجمه معاه مش انا , وقتها كنت في الحمام , كمان ما اتفرجناش علي الفيلم لانها بتكرهه 😢
انا عارفه اني ممكن ابان طفوليه ومدلعه
بس بصراحه كنت غضبانه جدا علشان دي حاجه احنا بنعملها مع بعض طول عمرنا , تيجي هي في لحظه تدمر كل حاجه 😢
خطيبته ماحاولتش ابدا تتعرف عليه طول الليله , كانت بتتكلم مع بابا وبتتجاهلني
قولت لبابا اني زعلانه علشان ماعملناش الحاجات الي متوعدين عليها كل سنه , قالي الامور بتتغير واني لازم اكبر
بصراحه مش بحب خطيبه بابا ومش بقرب منها ابدا, لانها بتسببلي شعور سيء
هي اشتكت لبابا , زعل مني وقالي بلاش ترفضيها
انا عايزه بابا يكون سعيد علشان كده حاولت اكون ودوده معاها اكثر
المشكله انها غريبه, لما بابا يكون موجود تمثل قدامه انها لطيفه معايه
ولما نكون لوحدنا بتتجاهلني او بتتكلم معايه بوقاحه , ومره قالتي اني مدلعه وبصعب علي بابا حياته
لما اشتكيت ل بابا رفض يصدقني وصرخ عليه وقالي اني بحاول اخرب علاقته بخطيبته , واني عايزاه يفضل وحيد طول عمره ووصفني بالانانيه
انصدمت جدا لان ده مش حقيقي
بعدها بابا بدأ يعاملني كأني مش موجوده
يومها جالي نفس الشعور الي حاسيته يوم وفاه امي 😢
في يوم كنت صاحيه لوقت متأخر
ماكنتش عارفه انام وحاسيت بالجوع وقررت ادخل المطبخ اعمل لنفسي وجبه خفيفه
اكتشفت ان خطيبته واقفه في المطبخ بتتكلم في التليفون مع صاحبتها
جالي فضول اسمع هي بتقول ايه
خطيبته كانت بتتكلم عن بابا واد ايه هي بتحبه
بعد كده قالت :
بس عنده “بنت غبيه”, تفتكري الاطفال ممكن تتعرض للتبني لغايه كام سنه؟
وفضلت تضحك هي وصاحبتها
قالت عليه “وقحه صغيره” وانها بتكرهني وبدأت تتكلم عن دخولي مدرسه داخليه!!!
رجعت اوضتي وماسمعتش باقي الكلام…………..
كنت تعبانه ومنهكه من كتر العياط ونمت
لسه ماقولتش ل بابا حاجه ومش متأكده اصلا المفروض اقوله ولا لاء
خايفه يكذبني
انا بجد مفتقده امي , وبفكر اروح اعيش مع جدو وتيته (من امي)
بس مش عايزه بابا يفتكر اني بسيبه
اعمل ايه ؟
ازاي اخلي بابا يسمعني ويصدقني؟
لو ماشيت ابقي غلطانه؟؟؟
🌹#تحديث
اتكلمت مع جدو وتيته وقولتلهم علي كل حاجه , وسألتهم لو ينفع اعيش معاهم؟؟؟ وافقوا
بعدها اتكلمت مع بابا وحاولت احكي الي سمعته
قولتله اني محاولتش اسجل لخطيبته او اصورها علشان عارفه ان ده هيزعله
مفيش فايده
برضه رفض يصدقني 😢
وقالي اني حاسه بالغيره من خطيبته , واني رافضه ان واحده تانيه تشاركني فيه
غضبت وقولتله انا همشي علشان تعرف تعيش حياتك بسعاده للابد
من غير ما اكون عبيء عليك
شكله كان مصدوم بس ماقالش حاجه…………..
حضرت شنطي علشان انقلها لبيت جدو (كنت من الاول مجهزه الشنط)
بابا ماتكلمش معايه لاخر اليوم
جدو وصل واخدني معاه
من وقتها وانا ماروحتش البيت خالص , و ما اعرفش اي حاجه عن بابا
جدو قالي ان هو الي هيتعامل في الموضوع ده مع بابا , وبلاش انا ادخل في حاجه
انا حزينه علشان بابا مش بيتواصل معايه ولا حتي حاول يبعتلي رساله يطمن عليه 😢
بس بصراحه انا مرتاحه جدا في بيت جدو
تيته هي اطيب انسانه في الدنيا كلها 😍
جدو يبان من بره قاسي شويه , لكن في الحقيقه هو قلبه طيب ❤
🌹#تحديث
بابا زارني في بيت جدو , وخطيبته كانت معاه
قالي ان اتكلم مع خطيبته وشايفين ان من الافضل اعيش هنا علي طول
قالي تعالي نظفي غرفتك بالكامل , وهو هيساعدني انقل باقي اغراضي كلها الي لسه موجود هناك , لبيت جدو وتيته
وبعدها لازم ناخد استراحه من بعض علشان نعيد تقييم الامور
الاستراحه ممكن تكون كام شهر , او أياً كان الوقت الي هنحتاجه 😢
خطيبته قالتي ان هي الي هتراعي بابا وتهتم بيه…………..
بعد كام يوم هروح مع جدو الم باقي اغراضي واوراقي المهمه
اعتقد ان مش هروح البيت تاني لفتره طويله , انا دلوقتي عندي بيت جديد
بصراحه في تعليقات زعلتني جدا
في ناس كتبوا اني بفكره ب ماما , علشان كده هو بيتصرف كده معايه
وان بابا عايز يتخلص من اي حاجه بتفكره ب ماما , وانا كنت اخر جزء من ذكرياته معاها , علشان كده من المنطقي انه مابقاش عايزني
انا شايفه ان بابا عايز يبدأ من جديد وانا للاسف مش في خطته الجديده……….
#قصص
