هل أنا غلطانة إني طلبت من أعز صديق ليا إنه يسيب خطيبتة اللي مش متعلمة ومش بتشتغل عشان نكون مع بعض؟
عارفة إن العنوان ممكن يخليني أبان كأني شخص وحش، بس ده مش حقيقي. خلينا نسمي صديقي “دين” وخطيبتة “هيلين”.
باختصار، أنا طالبة جامعة، وكنت بعمل تدريب صيفي في شركة تسويق آخر كام صيف. “دين” كان مديري هناك وبقينا اصحاب قريبين جدًا. صداقتنا خرجت بره نطاق الشغل، وأنا دلوقتي ماعنديش أي علاقة بالتدريب هناك.
كل ما كنا بنتكلم أكتر، كل ما كنت بحس إن مشاعري تجاهه بتكبر. هو شخص رائع، مجتهد، ناجح، دمّه خفيف، وكل حاجة حلوة ممكن تتخيلها.
خطيبتة في رأيي مش كده خالص، بصراحة أنا بشوفها فاشلة. مش متعلمة ومش بتشتغل. هيلين سابت المدرسة الثانوية بسبب مشاكل في عيلتها. الظاهر إن مامتها كانت بتعاني من قلق شديد واكتئاب. مامتها كانت بتنهار وتهدد إنها تأذي نفسها لو اتسابِت لوحدها. علشان كده، هيلين فضلت قاعدة معاها في البيت، ولسه بتعمل كده لما يكون ضروري، لأن باباها ماينفعش يطلع على المعاش دلوقتي.
على مر السنين، هيلين اعترفت إن ده أثّر على صحتها النفسية هي كمان، وبتتعالج عند دكتور نفسي وبتاخد أدوية. هي بتعاني من القلق الزايد.
هي اشتغلت شغلانات بسيطة على مدار السنين (في الساعات اللي باباها بيبقى في البيت مع مامتها بعد شغلة)
هيلين كان بتجيلها نوبات هلع وصراخ وبكاء وهي في الشغل. النوبات دي كمان بتحصلها أحيانًا في البيت بالليل، بس الظاهر إنها بتعرف تهدي نفسها بشكل كويس. علشان كده، عمرها ما كملت تعليمها أو استمرت في شغل لفترة طويلة.
أنا ودين اتكلمنا عن الموضوع ده كتير. هو بيصر إنها بتعمل اللي تقدر عليه، وبيقول إنها بتعمل كل حاجة في بيت باباها: الطبخ، التنضيف، الغسيل، شغل الجنينة، إلخ. باباها بيديها مبلغ صغير جدًا أسبوعيًا مقابل ده.
كمان بتعمل بث لألعاب الفيديو وبتكسب منه شوية فلوس، بس في رأيي دي حاجة بسيطة جدًا.
هما مع بعض من 5 سنين، وهو تقبّل فكرة إنها عمرها ما هتشتغل أو تكمل تعليمها (دين معاه شهادة في التسويق)، لكن الظاهر إنه مش فارق معاه. بيقول إنه هيصرف عليها ماليًا، وإنه ماعندوش مشكلة إنها تكون ربة منزل في المستقبل و مجرد زوجة وأم في البيت.
أنا بعت له رسالة وسألته: “إنت ليه أصلًا بتحبها؟ إزاي وقعت في حبها؟ ايه السبب؟” بصراحة مش قادرة أفهم. هو يستاهل حد أحسن بكتير.
رد عليا وقال: “أنا وقعت في حبها لأسباب كتير.”
“هي طيبة، لطيفة، وجميلة، ودايمًا بتحاول تشوف أفضل ما في الناس رغم كل اللي مرت بيه أنا شايفها دمها خفيف، جميلة، ذكية، ودايمًا بتحاول تعمل حاجات كويسة. بحب إنها عفوية، مجنونة شوية، غريبة الأطوار، ومتحمسة جدًا. بحب إنها تنافسية، لأن أنا كمان تنافسي. وبحب إنها رياضية. بحب طريقتها في الطبخ، بتخترع أكلات من دماغها من غير ما تحتاج تدور على وصفات (زيي أنا). بحب ابتسامتها جدًا. بحب صوتها وهي بتغني، وبموت فيها.”
لما قلتله مشاعري تجاهه، وإني بحبه، وإني بتمنى إنها ما تبقاش موجودة.
رد وقال: “طيب أنا محظوظ إنها موجودة. مش عارف كنت هعمل إيه لو ما كانتش في حياتي.”
قلتله إنه بس متعود عليها، وإنه مكمل معاها عشان العلاقة بقالها فترة طويلة. وقلتله إن في مرحلة في حياتي حسيت فيها إني مش هقدر أكمل من غير ناس معينة، لكن عدّت عادي وكنت كويسة بعدها، وهو كمان هيقدر.
رد عليا وقال: “طيب، أنا مش عايز. فهكون ممتن لو ما تقوليش عنها كدة. لو فعلًا يهمك أمري كنتي هتقولي إني محظوظ إني معاها وتحترمي ده”
هو مصر إنه مش هيسيبها، وأنا مش فاهمة ليه.
حتي الفلوس البسيطة اللي بتكسبها بتعمل له بيهم حاجات تافهة جدًا…وأنا ممكن أعمل له حاجات زي كدة وأحسن بكتير كمان.
“أنا بذاكر بجد، وبشتغل موظفة في كافيه علشان أقدر أكمل دراستي. بحب أتكلم معاه، وبحب أقضي وقتي معاه. هو بالنسبة لي الدنيا كلها.
هل في حد عنده نصيحة إزاي أقدر أكسب قلبه؟ أنا الخيار الأفضل ليه، هو بس مش مدرك ده دلوقتي. أعمل إيه في الموقف ده؟
🌿 رد “دين” عليها:
إنتي بعتيلي اللينك ده عشان أفهمك أكتر، ودلوقتي فهمتك. أنا بحب خطيبتي أكتر من الحياة نفسها. أحنا مع بعض من خمس سنين، مش عشان هي بتقدم لي حاجة مادية، لكن عشان شخصيتها وده اللي يهمني. ممكن أشتغل 3 شغلانات لو ده معناه إنها تفضل معايا.
مثلاً، مرة سافرت طريق طويل “لمدة ساعتين” في عز المطر علشان تروح لأمي وتعملها شوربة مخصوص علشان تعبانة. الفلوس ما تقدرش تشتري قلب زي ده. ما حكيتلكيش القصة دي قبل كده، لأنك كنتي هتنفعلي وتزعلي مني لمجرد إني جبت سيرتها.”
“أنا حاولت أبقى صديقك لأن كان شكلك وحيدة، لما كنا شغالين مع بعض. قلتي إن زمايلك في الشقة ما بيتكلموش معاكي، وإن عيلتك في بلد بعيدة.
عمر ما كان في مستقبل بينا، ولا حتى في احتمال أن ده يحصل.
أنا هفضل أحمي البنت دي مهما حصل، ووجعني جدًا أنك بتتكلمي عنها بشكل وحش قدام ناس غريبة على الإنترنت.
أتمنى يكون عندك الشجاعة إنك تشيلي البوست ده. يمكن الأحسن إننا نبعد عن بعض كأصحاب دلوقتي ونشوف الأمور هتمشي إزاي. إنتي بعتِ لي لينك الموضوع ده، وبعدها على طول عملتيلي بلوك على إنستجرام!! ليه؟ مش فاهم عايزة إيه مني دلوقتي.
بس خلاص الموضوع ما يستاهلش اهدر طاقتي. لو بقيتي مستعدة تنضجي وتحترمي علاقتي، كلّميني.”
(القصة مترجمة من ريديت)
#قصص
