“خطه تسويق الكاتشاب”
صاحبي “زولتار” مهووس بالكاتشاب
هو طول الوقت بيجرب وصفات مختلفه علشان يعمل الكاتشاب المميز الي نفسه فيه , و بيطلب مني ومن اصحابنا التانيين نجربه علشان يعرف رأينا
اخيرا وصل لوصفه كاتشاب مميزه , هو بيقول انه افضل كاتشاب صنعه في حياته , انا جربته و فعلا مش وحش بالعكس طعمه رائع.
هو مقتنع إنه هيبدأ شركته الخاصة للكاتشب ويخليها واحدة من أكبر الشركات اللي بتبيع كاتشب في أمريكا. الراجل حرفياً عنده صورة لزجاجة كاتشب هاينز على لوح رمي السهام “dartboard” وبيفضل يرمي عليها سهام وهو بيقول حاجات زي “جايلكوا يا شويه برطمانات!” 😂.
المهم، هو عامل خطة تسويق عايزني أنا و اصحابنا التانيين نشارك فيها. الخطة بكل بساطة إننا نروح مطعم، ونقعد على ترابيزات مختلفة كأننا مانعرفش بعض ، وكل واحد فينا يمثل دور من مشهد هو كاتبه، والمفروض ان في نهايه المشهد كلنا نجرب الكاتشب بتاعه ونتجنن عليه ونقنع مدير المطعم إنه يشتريه. عايزنا كلنا نحفظ الأدوار ونتقمص الشخصية 😅.
الفكرة ببساطة إن واحد مننا المفروض ينادي على الويتر ويقوله إنه معجب جدا بالبطاطس ، لكن الكاتشب وحش. أنا المفروض أكون قاعد على ترابيزة تانية وأميل عليه وأقول “آسف على التطفل” بس بصراحة معاك حق. أنا زهقت من الكاتشب القديم ده اللي بيتعمل في المصانع. فين طعم الطماطم الحقيقي؟” وبعد كده كام حد تاني يعمل نفس الحركة.
في الآخر صاحبي “زولتار” هيقول “مش هتصدقوا، بس أنا شيف متخصص في الكاتشب، ومعايا شوية عينات. تحبوا تجربوا؟”
ساعتها المفروض كلنا نجرب الكاتشب ونتصدم من جماله، وكل واحد فينا يبدأ يقول إنه أحسن كاتشب جربه في حياته. وأنا المفروض أقوم أقف على الترابيزة وأعمل صوت بوق 😂 “هووووو” وبعدين أصرخ لكل اللي في المطعم واقول “عندنا هنا أحسن كاتشب اتعمل في التاريخ! كله ييجي هنا!”
واحد صاحبنا المفروض يجيب مدير المكان ونقعد كلنا نحاول نقنعه يشتري كاتشب صاحبي. صاحبي بقى هيعمل فيها “متفاجأ ومحرج” وهيقول لنا “بطلوا تحطوا الراجل الغلبان في الموقف ده” 😂 قصده علي المدير
صاحبي متوقع إنه هيعمل “صفقة كبيرة” بعدها. وبعد كده عايز يعمل نفس التمثيليه دي في مطاعم تانية في المدينة.
أنا قلت له مستحيل أعمل كده. أنا بكره التمثيل قدام الناس، ومش بحب إن كل الانتباه يكون عليه، وفوق ده كله الفكرة سخيفة ومجنونة بالنسبة لي.
قلت له الكلام ده بصراحة. هو زعل واتضايق وقال إني “بخرب له أحلامه”.
أنا مصدوم من الموضوع، بس في ناس من أصحابي متفقين معاه وبيقولوا إنه مكافح ومتحمس ولازم نساعده إنه يطلق شركته للكاتشب. بظرف النظر عن هوسه الغريب بالكاتشب.
“زولتار” ده واحد من أعز أصحابي، لكن واضح إن صداقتنا ممكن تتأثر بسبب الموضوع ده. ناس كتير بتقولي إني شخص مش لطيف لأني ضد حلمه ومش عايز أساعده.
انتوا رأيكوا ايه؟؟؟
🌿انتهت القصة الأولي.
🌹قصة جديدة.
السؤال كان “ايه هو السر الي هيدمر حياتك لو اتعرف؟
انا بدير شركه كيك الزفاف (تورت) باخد من الناس حرفيا مئات الدولارات مقابل التورت الجميله الي بعملها
المفاجأه بقه اني سيئه جدا في الخبز , انا مش بعرف اعمل كيكه
كل الكيك الي بعمله بيكون من علب “خلطات الكيك سريع التحضير” الي بشتريه من السوبر ماركت بدولار
كل مره حاولت اصنع كيكه لوحدي من الصفر فشلت والنتيجه كانت مش حلوه 😭
اصحابي بينادوني “بفتاه الكيك” والناس كلها بتقولي اد ايه التورت بتاعني لذيذه و انها احسن بكثير من علب الكيك الجاهزه الي بيشتروها 😂 وبيأكدوا انهم مايعرفوش ابدا يعملوا كيكه لذيده زي بتاعني.
بضحك و بيكون هاين عليه اقول بدولار واحد هتعملي كيكه شبه بتاعتي بالظبط , بس اخلطي البودر الجاهز مع البيض والزيت واللبن.
الموضوع كأن حياتي كلها كذبه
الحقيقه انا بحب تزيين الكيك وبعمل عجينه السكر بنفسي من الصفر , بس بكره خبز الكيك اللعين 😭
اسعاري بحددها علي مجهود تزيين الكيكه مش علي الكيكه نفسها اعتقد ان ده منطقي
مافيش حد يعرف الحكايه دي خالص غير جوزي كل اصحابي فاكرين اني بتعب في الفرن والخلط والخبز.
انا من سنين وانا بعمل كده وعارفه لو السر اتكشف سمعتي اكيد هتضر
كل مره بقول لنفسي لازم اتعلم اعملها لوحدي من غير خلطات العلب الجاهزه 💪
بس ولا مره عرفت اعملها لوحدي صح 🤭
(القصه حقيقيه مترجمه). قصص حقيقية
