خايف يكونوا عملوا فيها حاجه!!!
أنا بقعد على Reddit كتير، ومش عارف أعمل ايه ، بس يارب ألاقي مساعدة هنا.
أنا ولد عمري ١٤ سنة، أمريكي بس عايش في آسيا، ومش هحدد تفاصيل كتير عشان ماحدش يقدر يعرفني لو الموضوع بجد زي ما أنا حاسس.
من حوالي ٧ شهور، كنت عايش مع ماما (٣٩ سنة)، وبابا (٤١ سنة)، ومعايا كمان أختي الصغيرة (٩ سنين). بقول “كنت” عشان أختي مش هنا دلوقتي، هما بيقولوا إنها في “مدرسة داخلية”.
احنا نص أمريكي ونص آسيوي، ولما جدي (من ناحية بابا) تعب من حوالي ٤ سنين، نقلنا هنا في آسيا عشان بابا يقدر يهتم بيه.
حابب أقول إننا مش أولاد وحشين، أنا وأختي اجتهدنا عشان نتعلم اللغة، وهي رغم سنها، كانت متفوقة عليّ، وكنت فخور بيها جدًا.
المشكلة بدأت مع جدتي، اللي كانت دايمًا تبص لأختي بنظرة استخفاف، وأنا بحب أختي ومكانش عاجبني ده.
ماما قالتلي إن ده بسبب الثقافة هنا ومش المفروض أعمل مشكلة، بس الموضوع كان صعب وجدتي بدأت تزيد أكتر، كانت تجيبلي لبس وألعاب وحاجات تانية، لكن أختي مكنتش بتاخد أي أهتمام.
خليني أقول إن من ٤ سنين لما سكنّا مع جدي وجدتي، في الوقت اللي كانوا بيدلعوني فيه زياده، أختي كانت بتتأدب وتتعاقب على أقل حاجة بتعملها، أقسم بالله كان ظلم مش طبيعي.
من حوالي سنة تقريبًا جدي توفى، ووالدي قرر نفضل هنا عشان أنا بقيت بتكلم وأقرا بطلاقة.
جدتي بقت تتكلم مع الناس وتقول إن أختي مش مؤدبة ومش “متربية” كفاية، وأهلي اتفقوا معاها وأنا شايف ده غلط تمامًا!
من ٧ شهور، خرجت أختي وجدتي مع بعض، وأهلي قالوا لي إنها هتقضي الصيف في
المدرسة الداخلية – المفروض أن ده في الصيف بس .
بعد ٣ شهور، بدأت أقلق وسألتهم إمتى هترجع، ماما قعدت تعيط لما سألتها!!!
وبابا قعد معايا وقال إن أختي بتحب المدرسة الداخلية ومش عايزة ترجع دلوقتي!!
يعني ايه…؟ هي المدارس الداخلية بتشتغل كده؟ مش مقتنع!!!
أكيد اللي كان بيحصل ده نوع من الإساءة النفسية.
الأسوأ إنه بعد ٥ شهور، مافيش أي تواصل، لا رسالة، ولا مكالمة، ولا أي حاجة، وكمان بابا بدأ يحول أوضتها لمكتب ليه؟؟؟
اتخانقت مع بابا خناقة كبيرة بسبب الموضوع ده، وبابا قرر يعاقبني، لكن ماجاوبش ليه بيعمل كده “أخد أوضتها” لو أختي هترجع قريب!!!
دلوقتي، أختي بقالها ٧ شهور مختفيه، وآخر حاجة كسرتني، كنت بدور في القبو علي ماما و أكتشفت صندوق فيه حاجات قديمة لأختي، ومنها تليفونها. ليه مش معاها تليفونها؟
كل اللي عايز أعرفه، هل فيه حاجة أقدر أعملها؟ مافيش حد راضي يقولي هي في مدرسة إيه، وبيقولولي مش لازم تقلق علشان إنت مش كبير.
عارف إني صغير ومش هقدر أعمل حاجات كتير، بس لو فيه حاجة ممكن أعملها، بالله عليكم ساعدوني.
مش قادر أنسى اليوم اللي ماما عيطت فيه، جسمي بيترعش، وبفكر في أسوأ حاجة، ومش هقدر أتحمل لو طلع إحساسي صح.
🌹 التحديث:
بفضل المجتمع هنا، قدرت أتواصل مع جهات كتير ، كمان الناس هنا ساعدوني أعمل مكالمة للمسئولين اللي بيدورا علي الأطفال اللي بيتاجر بيهم “الناس كانوا حاسين أن ده اللي حصل”.
عرفت إنهم هيحققوا مع عيلتي.
في بنت هنا اتواصلت معايه وقالت لي انها عرضت المشكله علي أهلها وطلبت منهم يوفقوا أني استخبي في بيتهم لفتره.
عيلتها وافقت أعيش معاهم فترة واتأكدوا إن ده مش مخالف للقانون، حتى إني وضحت للمسئول إن أنا مش هربان من البيت، وهارجع بعد التحقيق.
بعد كده السلطات كانت مش مرتاحة، واضطريت أرجع البيت، بس الموضوع بقه غريب.
رجعت البيت لقيته فاضي تمامًا، حتى جدتي مش موجودة، فكان مسموح لي أرجع للعيلة التانية لفترة. هما كانوا طيبين جدًا، وحقيقي ممتن لوالدتهم اللي قالت لي إن البيت بيتي مهما كانت النتيجة.
والأسبوع الأول ماوصلنيش أي أخبار عن أختي وبعد أسبوع تقريبًا، وصلني خبر إنهم لقوا أختي!
أهلي اتحقق معاهم واحتجزوهم لفترة، مش عارف ليه ماقالوش ده في الأول وكنا عايزيني ارجع البيت.
معرفش التفاصيل كلها، لكن أختي كانت عايشة في مكان حوالي ٧٠٠ كيلومتر بعيد، يعني تقريبًا يوم سفر، ومكنتش مدرسة صيفية، ولا داخلية، ولا أي حاجة زي كده – بابا باعها للجواز (أخد فلوس من شخص مقابل انه يتجوز أختي)
ماما طلعت براءة لأن:
١- أنا لسة محتاج حد يرعاني،
٢- مكانتش تعرف حاجه عن الموضوع في الاول.
بابا وجدتي اتقبض عليهم، وأنا دلوقتي عايش مع ماما وأختي.
لسة على تواصل مع العيله اللي ساعدتني، وهافضل شاكر ليها، مش متخيل إيه اللي كان هيحصل لو كنت في البيت لما الشرطة جت. هما فعلاً ملاكي الحارس!
الحزين في الموضوع أن أختي مش بتتكلم كتير، بس اتحسنت شوية لما خليتها تقرا البوست بتاعي. قالت إنها كانت حاسة إنها متسابة ووحيدة، بس كانت مبسوطة لما عرفت إن أنا وناس كتير ميعرفوهاش كان قلبهم معاها.
آسف إني مش بوضح تفاصيل كتير عشان أحمي هوياتنا. الحمد لله أختي معايا ، وده بفضلكم. شكرًا ليكم 🌷
#قصص
